ວີເຄເຄ ຜູ້ນໍາດ້ານໂຄງສ້າງເຫລັກທີ່ມີຄຸນນະພາບໃນ ສປປ ລາວ

  ພາຍຫລັງໂຮງງານ ວີເຄເຄ ອຸດສະຫະກໍາ ຈໍາກັດ (VKK) ທີ່ຕັ້ງຢູ່ບ້ານໂພຄໍາ, ເມືອງໄຊທານີນະຄອນຫລວງວຽງຈັນ, ໄດ້ຮັບການຢັ້ງຢືນມາດຕະຖານ ISO: 9001-2015 ຈາກສາກົນໃນປີ 2017 ເປັນຕົ້ນມາ, ໄດ້ເຮັດໃຫ້ຊື່ສຽງຂອງບໍລິສັດກາຍເປັນທີ່ຮູ້ຈັກຢ່າງກວ້າງຂວາງຂອງສັງຄົມ ແລະ ຖືໄດ້ວ່າເປັນຜູ້ນໍາດ້ານໂຄງສ້າງເຫລັກທີ່ມີຄຸນນະພາບໃນປະເທດ.

  ທ່ານ ບຸນທະວົງ ບຸນເລີດ ປະທານບໍລິສັດດັ່ງກ່າວໃຫ້ສໍາພາດນັກຂ່າວພວກເຮົາເນື່ອງໃນໂອກາດສົ່ງທ້າຍປີເກົ່າຕ້ອນຮັບປີໃໝ່ວ່າ: ໂຮງງານຂອງຕົນສ້າງຂຶ້ນໃນປີ 2004 ເບື້ອງຕົ້ນແມ່ນຜະລິດແຜ່ນມຸງຫລັງຄາເຄືອບສີ ແລະ ເຫລັກຮູບປະພັນເທົ່ານັ້ນ. ຕໍ່ມາພາຍຫລັງລັດຖະບານໄດ້ມີນະໂຍບາຍສົ່ງເສີມການຊົມໃຊ້ຜະລິດຕະພັນພາຍໃນກໍເປັນເງື່ອນໄຂອັນດີໃຫ້ກັບຜູ້ປະກອບການ ແລະ ນັກທຸລະກິດພາຍໃນປະເທດ ເພື່ອຂະຫຍາຍທຸລະກິດ ແລະ ແນໃສ່ຕອບສະໜອງຄວາມຕ້ອງການຂອງສັງຄົມ ກໍຄືການສ້າງສາ, ພັດທະນາປະເທດຊາດໃຫ້ຈະເລີນຮຸ່ງເຮືອງ, ໂດຍສະເພາະແມ່ນຮັບໃຊ້ການພັດທະນາພື້ນຖານໂຄງລ່າງ ເປັນຕົ້ນ: ຖະໜົນຫົນທາງ, ຕຶກອາຄານຕ່າງໆ, ຈຶ່ງໄດ້ຕັດສີນໃຈລົງທຶນຊື້ເຄື່ອງຈັກທີ່ທັນສະໄໝຈາກຕ່າງປະເທດເຂົ້າມາເພື່ອຜະລິດສີນຄ້າໃຫ້ມີຫລາຍຊະນິດຕາມຄວາມຕ້ອງການຂອງສັງຄົມ, ທັງເປັນການຫລຸດຜ່ອນການນໍາເຂົ້າຜະລິດຕະພັນສໍາເລັດຮູບຈາກຕ່າງປະເທດອີກດ້ວຍ. ຊຶ່ງປັດຈຸບັນ, ໂຮງງານຂອງຕົນສາມາດຜະລິດສີນຄ້າທີ່ເຮັດຈາກເຫລັກຫລາຍຊະນິດເພື່ອຮັບໃຊ້ວຽກງານຄົມມະນາຄົມ ແລະ ໂຍທາໄດ້ເປັນຢ່າງດີຄື: ແຜ່ນເຫລັກມຸງຫລັງຄາ, ເຫລັກຮູບປະພັນທຸກຊະນິດ, ຮາວເຫລັກປ້ອງກັນ ແລະ ຕະແກງເຫລັກຝາອັດຮ່ອງນໍ້າ, ເສົາໄຟຟ້າ, ໄຟເຍືອງ  ທາງ, ໄຟອໍານາດ ແລະ ເສົາສັນຍານຕ່າງໆທີ່ມີຄວາມແຂງແກ່ນທົນທານ ແລະ ເຄືອບດ້ວຍສານກັນໝ້ຽງມາດຕະຖານສາກົນ (ສານຮອດດິບກາວາໄນ Hot Dip Gavanize) ແລະ ເປັນໂຮງງານແຫ່ງດຽວທີ່ສາມາດເຄືອບສານກັນໝ້ຽງດັ່ງກ່າວ ແລະ ປັດຈຸບັນ, ໂຮງງານໄດ້ຍົກສູງຄວາມອາດສາມາດຂອງຕົນຫລາຍຂຶ້ນດ້ວຍການສະໜອງໂຄງສ້າງເຫລັກຂະໜາດໃຫຍ່ສໍາລັບການກໍ່ສ້າງອາຄານ, ໂຮງຈັກໂຮງງານ, ສາງສີນຄ້າ, ສະໜາມກິລາໃນຮົ່ມ ທີ່ມີຂະໜາດ ກວ້າງເຖິງ 80 ແມັດໂດຍບໍ່ມີເສົາກາງຄໍ້າ, ຊຶ່ງໂຄງສ້າງເຫລັກນີ້, ຊ່ວຍປະຢັດຄ່າໃຊ້ຈ່າຍ, ທັນສະໄໝ, ສວຍງາມ, ຕິດຕັ້ງວ່ອງໄວ, ແຂງແຮງທົນທານ ແລະ ປອດໄພ ແລະ ຜ່ານມາໄດ້ມີຫລາຍໆໂຄງການຂອງພາກລັດ ແລະ ເອກະຊົນໄດ້ນໍາໃຊ້ໂຄງສ້າງເຫລັກຂອງໂຮງງານພວກເຮົາມາແລ້ວ.

  ທ່ານ ບຸນທະວົງ ກ່າວວ່າ: ບໍລິສັດພວກເຮົາ ຍາມໃດກໍຖືວິໃສທັດທີ່ວ່າ: ສະໜອງຄວາມຕ້ອງການຂອງລູກຄ້າໃຫ້ດີທີ່ສຸດ, ໂດຍການແບ່ງປັນຄວາມຮູ້, ຄວາມສໍາເລັດ, ຍອມຮັບການຕິຊົມ ແລະ ເປັນເພື່ອນຮ່ວມທາງຂອງລູກຄ້າ ແລະ ສ້າງຄວາມແຕກຕ່າງໃນການບໍລິການໃຫ້ມີຄວາມເພິ່ງພໍໃຈ. ສິ່ງດັ່ງກ່າວເປັນພື້ນຖານສໍາຄັນທີ່ເຮັດໃຫ້ທຸລະກິດໄດ້ມີການເຕີບໃຫຍ່ຂະຫຍາຍຕົວຂຶ້ນເປັນລໍາດັບ, ມາຮອດປັດຈຸບັນມີພະນັກງານ ແລະ ກໍາມະກອນ ທີ່ກໍາລັງເຮັດວຽກຢູ່ຫລາຍກວ່າ 100 ຄົນ, ໂດຍສ່ວນໃຫຍ່ແມ່ນຄົນລາວ, ນອກຈາກຊ່ວຍສ້າງວຽກເຮັດງານທໍາທີ່ໝັ້ນຄົງໃຫ້ເຂົາເຈົ້າແລ້ວ ກໍຍັງມີສະຫວັດດີການດ້ານອື່ນໆ, ພ້ອມມີນະໂຍບາຍຊ່ວຍຍົກລະດັບຄວາມຮູ້ຄວາມສາມາດ ແລະ ສີມືແຮງງານຂອງເຂົາເຈົ້າດີຂຶ້ນເປັນລໍາດັບ, ໄປຄຽງຄູ່ກັບການປະກອບສ່ວນຊ່ວຍເຫລືອສັງຄົມດ້ວຍການມອບແຜນເຫລັກມຸງຫລັງຄາໃຫ້ໂຮງຮຽນຕ່າງໆທີ່ມີສະພາບເກົ່າແກ່ຊຸດໂຊມໃນເຂດຫ່າງໄກສອກຫລີກປີລະແຫ່ງອີກດ້ວຍ ແລະ ໃນໂອກາດປີໃໝ່ນີ້ VKK ຈະອອກແຮງພັດທະນາຕົນເອງໃຫ້ສືບຕໍ່ຂະຫຍາຍຕົວໄປຢ່າງບໍ່ຢຸດຢັ້ງ, ຄຽງຄູ່ກັບຄວາມຈະເລີນຮຸ່ງເຮືອງຂອງປະເທດຊາດລາວເຮົາ.