ບົດຂ່າວໜັງສືພິມລາວພັດທະນາໄດ້ຮັບລາງທີ 2 ຈາກໂຄງການຄັກເລືອກຜະລິດຕະພັນສື່ ແລະພິມຈຳໜ່າຍດີເດັ່ນໃນຫົວຂໍ້ “ປີທ່ອງທ່ຽວລາວ 2018”
ໂຄງການຄັດເລືອກຜະລິດຕະພັນສື່ ແລະພິມຈຳໜ່າຍດີເດັ່ນໃນຫົວຂໍ້ “ປີທ່ອງທ່ຽວລາວ 2018” ຂອງສະມາຄົມນັກຂ່າວແຫ່ງ ສປປ.ລາວ ເຊິ່ງບົດຂ່າວຂອງໜັງສືພິມລາວພັດທະນາກໍເປັນໜຶ່ງໃນບົດທີ່ໄດ້ຮັບລາງວັນ ພິທີໄດ້ຈັດຂຶ້ນໃນວັນ 31 ທັນວາ 2018 ທີ່ຜ່ານມາ ໂດຍແບ່ງປະເພດບົດອອກເປັນ 5 ປະເພດຄື: ຂ່າວ, ສາລະຄະດີ, ບົດປະກອບສຽງ, ຄລິບວີດີໂອ ແລະປຶ້ມຂໍ້ມູນຂ່າວສານດ້ານການທ່ອງທ່ຽວ ປະເພດລະ 2 ລາງວັນຄື: ລາງວັນທີ 1 ແລະທີ 2. ໃນນັ້ນມີບົດຂ່າວຈາກໜັງສືພິມລາວພັດທະນາ ຍາດໄດ້ລາງທີ 2 ຈາກບົດຂ່າວດີເດັ່ນທີ່ມີຊື່ວ່າ: “ບຸນກອງເຂົ້າໃຫຍ່ແຂວງໄຊຍະບູລີ ສ້າງຄວາມປະທັບໃຈໃຫ້ຜູ້ມາທ່ຽວຊົມເປັນຈຳນວນຫຼວງຫຼາຍ” ສະບັບອອກວັນທີ 10 ມັງກອນ 2018.
ເນື້ອໃນຂອງບົດຂ່າວແມ່ນໄດ້ກ່າວເຖິງ ພາບບັນຍາກາດການເປີດງານບຸນກອງເຂົ້າໃຫຍ່
ໃນວັນທີ 9 ມັງກອນ 2018 ໂດຍມີ ທ່ານສອນໄຊ ສີພັນດອນ ຮອງນາຍົກລັດຖະມົນຕີ ຜູ້ຊີ້ນໍາຈັດງານປີທ່ອງທ່ຽວລາວ
2018 ແລະໃຫ້ກຽດລັ່ນຄ້ອງ 9
ບາດເພື່ອເປັນສີລິມຸງຄຸນໃຫ້ແກ່ງານດັ່ງກ່າວດຳເນີນໄປດ້ວຍບັນຍາກາດຟົດຟື້ນ.
ໃນບົດຂ່າວຍັງໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ, ມູນເຊື້ອດຸໝັ່ນຂະຫຍັນພຽນ ແລະຮີດຄອງປະເພນີອັນດີງາມທີ່ເປັນເອກະລັກຂອງຊາວເມືອງພຽງ ເພື່ອໃຫ້ການຜະລິດກະສິກຳ ເປັນທ່າແຮງດຶງດູດນັກທ່ອງທ່ຽວເຂົ້າໄປທ່ຽວຊົມ ທັງເປັນປະກອບສ່ວນສົ່ງເສີມການພັດທະນາເສດຖະກິດ-ສັງຄົມຂອງເມືອງນັບມື້ນັບເຕີບໃຫຍ່ເຂັ້ມແຂງ.
ທ້າຍສຸດຂອງບົດຂ່າວຍັງໄດ້ກ່າວເຖິງກິດຈະກຳຕ່າງໆທີ່ເປັນສະເໜ່ດຶງດູດໃຈນັກທ່ອງທ່ຽວເຂົ້າມາທ່ຽວຊົມງານບຸນດັ່ງກ່າວ ເຊິ່ງຈະໄດ້ສຳຜັດກັບຄວາມງົດງາມຂອງຜ້າປ່າ, ພິທີສູ່ຂວັນເຂົ້າ, ການປະກວດອາຫານ ແລະສິນຄ້າໂອດອບຂອງທ້ອງຖິ່ນຕ່າງໆດ້ວຍຄວາມຫຼາກຫຼາຍ ເຊິ່ງເນື້ອໃນຂ່າວມີຄວາມຄົບຖ້ວນສົມບູນທາງດ້ານອົງປະກອບ, ຂັ້ນຕອນ ແລະອຸດົມສົມບູນໄປດ້ວຍເນື້ອຫາສາລະຂອງງານບຸນດັ່ງກ່າວ./
