ປີໃໝ່ຂໍໃຫ້ມີໂຊກມີໄຊ ດັ່ງປາຖະໜາ

ໂດຍ: ທ່ຽງທຳ

ສະບາຍດີ, ເພື່ອນຜູ້ອ່ານທີ່ຮັກແພງ, ປີເກົ່າ 2018 ໄດ້ ຜ່ານພົ້ນໄປແລ້ວ, ເຊິ່ງຜ່ານ ໄລຍະທາງດັ່ງກ່າວ, ແຕ່ລະ ຄົນກໍມີທັງຜົນສຳເລັດໂຊກລາບ ແລະ ມີຄວາມສຸກສົມ ຫວັງ ແລະ ຄຽງຄູ່ກັນນັ້ນ ກໍມີຈຳນວນບໍ່ໜ້ອຍທີ່ໄດ້ປະສົບອຸປະສັກຄວາມຫຍຸ້ງຍາກ ລ້ຳບາກນາໆປະການ, ເຊິ່ງ ຮ້າຍແຮງທີ່ສຸດກໍອາດແມ່ນຜູ້  ປະສົບເຄາະຮ້າຍຈາກໄພທຳມະຊາດໃນລະດູຝົນຜ່ານມາ ໂດຍສະເພາະແມ່ນເຫດການ ເຂື່ອນເຊປຽນ-ເຊນ້ຳນ້ອຍ ແຕກ ເຊິ່ງໄດ້ກືນກິນທັງຊີວິດ  ແລະ ຊັບສິນຂອງ ປະຊາຊົນ ເມືອງສະໜາມໄຊ ແຂວງອັດ ຕະປື ໄປເປັນຈຳນວນຫລວງຫລາຍຈົນມາຮອດປັດຈຸບັນກໍຍັງບໍ່ທັນສາມາດຟື້ນຟູຊີ ວິດການເປັນຢູ່ເປັນປົກກະຕິ ໄດ້ ແລະ ສະພາບນ້ຳຖ້ວມຢູ່ຫລາຍເຂດແຂວງອັນສົ່ງຜົນກະທົບບໍ່ໜ້ອຍຕໍ່ພື້ນຖານ    ການຜະລິດ, ໄຮ່ນາຮົ້ວສວນ, ເຮືອນຊານບ້ານຊ່ອງ, ຖະໜົນຫົນທາງເປເພເສຍຫາຍ ເປັນຈຳນວນຫລວງຫລາຍ ແຕ່ເໜືອລົງຮອດໃຕ້, ອັນໄດ້ ເຮັດໃຫ້ການສັນຈອນໄປ ມາໃນເຂດຕ່າງໆ ພົບຄວາມຫຍຸ້ງຍາກ.

ເຊິ່ງລັດເຮົາຈະຕ້ອງໄດ້ສຸມທຶນຮອນເປັນຈຳນວນມະຫາສານຈິ່ງຈະສາມາດ ຟື້ນຟູພື້ນຖານໂຄງລ່າງ ດັ່ງກ່າວນັ້ນໄດ້.

ດັ່ງນັ້ນໃນປີໃໝ່ 2019 ນີ້ ຂໍໃຫ້ພວກເຮົາຢູ່ເຢັນເປັນ ສຸກ, ມີໂຊກມີໄຊ ໄດ້ດັ່ງປາຖະໜາແຕ່ຢາກໄດ້ແນວນັ້ນ ພວກເຮົາຕ້ອງມີສະຕິຮັກ ສາສຸຂະພາບຂອງຕົນເອງໃຫ້ດີ, ເປັນເຈົ້າການຕີຕ້ານ ປະກົດການຫຍໍ້ທໍ້ຕ່າງໆ, ເຮັດອັນໃດກໍໃຫ້ຈົບໃຫ້ງາມ ມີຄຸນນະພາບຢຸດຕິການຕັດ ໄມ້ທຳລາຍປ່າໃຫ້ໄດ້ຢ່າງ ສິນເຊີງເມື່ອຮອດຍາມນັ້ນ ໄພທຳມະຊາດ ຈິ່ງຈະບໍ່ມາຂົ່ມຂູ່ຊີວິດການເປັນ ຢູ່ຂອງພວກເຮົາອີກ ແລະ  ທຸກຄົນກໍຈະມີເງື່ອນໄຂພັດທະນາຕົນເອງ ແລະ ປະເທດຊາດໃຫ້ນັບມື້ຮຸ່ງເຮືອງສີ ວິໄລຂຶ້ນ./.