ລຸກຊໍາບວກຊ່ວຍຍົກລະດັບຄວາມຮູ້ວຽກງານຕ້ານອາຊະຍາກຳ ແລະ ການຟອກເງິນໃຫ້ເຈົ້າໜ້າທີ່ 4 ແຂວງພາກເໜືອລາວ
ເມື່ອບໍ່ດົນມານີ້, ສະຖາບັນຊ່ວຍເຫລືອດ້ານກົດໝາຍ ແລະ ວິຊາການ(ILSTA) ຮ່ວມກັບອົງການໄອຍະການປະຊາຊົນສູງສຸດໄດ້ຈັດຝຶກອົບຮົມກ່ຽວກັບການຕ້ານອາຊະຍາກຳທີ່ມີການຈັດຕັ້ງ ແລະ ການຟອກເງິນ ໃຫ້ພະນັກງານ ແລະ ເຈົ້າໜ້າທີ່ກ່ຽວຂ້ອງ 4 ແຂວງພາກເໜືອຄື: ບໍ່ແກ້ວ, ຫລວງນໍ້າທາ, ຫລວງພະບາງ ແລະ ໄຊຍະບູລີ, ໂດຍໄດ້ເນັ້ນໃສ່ວຽກງານການຈຳແນກປະເພດອາຊະຍາກຳ, ການຄ້າມະນຸດ ແລະ ການລັກລອບນຳຄົນເຂົ້າ-ອອກເມືອງຜິດກົດໝາຍ, ໂດຍໄດ້ຮັບການຊ່ວຍເຫລືອຈາກກະຊວງການເງິນລຸກຊຳບວກ.
ຊຸດອົບຮົມດັ່ງກ່າວມີຈຸດປະສົງເພື່ອຍົກສູງຄວາມຮັບຮູ້, ເຂົ້າໃຈ ແລະ ແລກປ່ຽນບົດຮຽນວິທີຕ້ານບັນຫາອາຊະຍາກຳທີ່ມີການຈັດຕັ້ງ ແລະ ເກີດຂຶ້ນໃນປັດຈຸບັນ ແລະ ການເຊື່ອມໂຍງກັບຂະບວນການຟອກເງິນ, ເພື່ອໃຫ້ພະນັກງານ ແລະ ເຈົ້າໜ້າທີ່ກ່ຽວກັບຂ້ອງໄດ້ມີຄວາມສາມາດສູງຂຶ້ນໃນການ ແກ້ໄຂບັນຫາດັ່ງກ່າວ ແລະ ການຝຶກອົບຮົບລັກສະນະດຽວກັນຍັງຈະໄດ້ຈັດຂຶ້ນອີກຫລາຍໆຄັ້ງສຳລັບພະນັກງານບັງຄັບໃຊ້ກົດໝາຍໃນທ້ອງຖິ່ນຕ່າງໆ, ຊຶ່ງນອນໃນກອບການຮ່ວມມື 5 ປີລະຫວ່າງອົງການໄອຍາການປະຊາຊົນສູງສຸດແລະ ສະຖາບັນ ILSTA ເພື່ອສ້າງຄວາມເຂັ້ມແຂງໃນຂະແໜງກົດໝາຍ.
ຜ່ານມາສະຖາບັນ ILSTA ໄດ້ສະໜັບສະໜູນຢ່າງແຂງແຮງໃນຄວາມພະຍາມສ້າງຄວາມເຂັ້ມແຂງດ້ານກົດໝາຍ ແລະ ຊ່ວຍລັດຖະບານລາວໃນການພັດທະນາປະເທດໃຫ້ເປັນລັດທີ່ປົກຄອງດ້ວຍກົດໝາຍຫລາຍຂຶ້ນ. ຊຸດອົບຮົມດັ່ງກ່າວຈັດຂຶ້ນຢູ່ແຂວງບໍ່ແກ້ວ, ໂດຍການເຂົ້າຮ່ວມຂອງທ່ານ ບຸນຍັງ ຈັນດາລາສານ ຮອງປະທານອົງການໄອຍະການປະຊາຊົນສູງສຸດ ແລະ ທ່ານ ຣິຊາດ ຟິລີບປາດ ຫົວໜ້າສະຖາບັນ ILSTA.
