ໂຍຣິສ ຕັ້ງເປົ້າຂໍນຳ ສະເປີ ຄວ້າແຊ້ມ ໃຫ້ໄດ້ໃນລະດູການນີ້
ອູໂກ້ ໂຍຣິສ ຜູ້ຮັກສາປະຕູ ທ໊ອດແນ່ມ ຮ໊ອດສະເປີ ຕັ້ງເປົ້າຂໍນຳຕົ້ນສັງກັດຄວ້າແຊ້ມໃຫ້ໄດ້ໃນລະດູການນີ້ ຫລັງ ສະເປີ ຫ່າງຫາຍຈາກຜົນສຳເລັດມາດົນ ໂດຍບອກວ່າ: ພຣີເມຍລີກເປັນເລື່ອງຍາກ ແຕ່ທີມໄດ້ສະແດງໃຫ້ເຫັນເຖິງພັດທະນາການທີ່ດີຫລາຍ ແລະ ຈະສ້າງຜົນງານໜັກຕໍ່ໄປ.
ອູໂກ້ ໂຍຣິສ ຜູ້ຮັກສາປະຕູທີມ ທ໊ອດແນ່ມ ຮ໊ອດສະເປີ ສະໂມສອນແຫ່ງພຣີເມຍລີກ ກ່າວວ່າ: ລາວຕັ້ງເປົ້າໝາຍຈະນຳຕົ້ນສັງກັດຄວ້າແຊ້ມມາຄອງໃຫ້ໄດ້ໃນລະດູການນີ້ ຫລັງຈາກທີ່ທີມຫ່າງຫາຍຈາກຜົນສຳເລັດໄປດົນ.
ສະເປີ ສ້າງຜົນງານໜ້າປະທັບໃຈພາຍໃຕ້ການຄຸມທີມຂອງ ເມົາຣິຊິໂອ ໂປເຊດຕິໂນ່ ຜູ້ຈັດການທີມຊາວອາເຈນຕິນາ. ເຖິງຢ່າງໃດກໍຕາມ ພວກເຂົາບໍ່ໄດ້ແຊ້ມລາຍການໃດນັບແຕ່ຄວ້າແຊ້ມອີເອຟແອລ ຄັບ ໃນປີ 2008.
ຍອດທີມແຫ່ງນະຄອນຫລວງລອນດອນຢູ່ອັນດັບ 3 ໃນພຣີເມຍລີກເວລານີ້ ຕາມຫລັງ ລິເວີພູລ ຈ່າຝູງ 9 ຄະແນນ ຜ່ານເຂົ້າຮອບ 16 ທີມສຸດທ້າຍ ຢູຟາ ແຊມປ້ຽນລີກ ລວມທັງມີຕາຕະລາງເຕະກັບ ເຊລຊີ ໃນຮອບຮອງຊະນະເລີດ ການແຂ່ງຂັນຄາຣາບາວ ຄັບ.
