ກຸ່ມຕິດອາວຸດບຸກສະຖານີໂທລະພາບ-ວິທະຍຸຢູ່ປາກິດສະຖານ
ເຈົ້າໜ້າທີ່ ແລະ ຜູ້ເຫັນເຫດການລາຍງານວ່າ: ກຸ່ມຕິດອາວຸດບຸກໂຈມຕີສະຖານີໂທລະພາບ ແລະ ວິທະຍຸແຫ່ງຊາດ ຢູ່ເມືອງຈາລາລາບັດ ທາງຕາເວັນອອກຂອງອັບການິດສະຖານ ໃນວັນທີ 17 ພຶດສະພານີ້ ແລະ ຍິງປະທະກັບກອງກຳລັງຮັກສາຄວາມໝັ້ນຄົງ, ສ່ວນນັກຂ່າວຍັງຕິດຢູ່ພາຍໃນອາຄານ.
ປັດຈຸບັນນີ້ຍັງບໍ່ມີກຸ່ມໃດອ້າງວ່າສັ່ງການຢູ່ເບື້ອງຫລັງເຫດໂຈມຕີຢູ່ແຂວງນັນກາຮາ ເຊິ່ງເປັນທີ່ໝັ້ນຂອງກຸ່ມລັດອິສລາມ (IS) ແລະ ກອງກຳລັງອາເມລິກາຖິ້ມລະເບີດໃຫຍ່ໃນເດືອນຜ່ານມາ. ໂຄສົກລັດຖະບານທ້ອງຖິ່ນຖະແຫລງວ່າ: ມືປືນຢ່າງໜ້ອຍ 3 ຄົນບຸກອາຄານສະຖານີ RTA (ເຣດິໂອ ເທເລວິຊັນ ອັບການິດສະຖານ) ໃນຕອນເຊົ້າວັນທີ 17 ພຶດສະພານີ້ ໂດຍສອງຄົນເສຍຊີວິດແລ້ວ ແລະ ອີກຄົນໜຶ່ງຍັງຍິງຕໍ່ສູ້ຢູ່. ຊ່າງພາບເປີດເຜີຍວ່າ: ລາວຫລົບໜີອອກຈາກອາຄານມາໄດ້ໃນໄລຍະມືປືນບຸກເຂົ້າມາ, ແຕ່ຍັງມີເພື່ອນຮ່ວມງານບາງຄົນທີ່ຍັງຄ້າງຢູ່ຂ້າງໃນ ແລະ ມີສຽງຍິງປືນປະທະກັນໂດຍອ້ອມອາຄານ. ເມືອງຈາລາລາບັດເປັນເມືອງເອກຂອງແຂວງນັນກາຮາທາງຕາເວັນອອກຂອງອັບການິດສະຖານທາງຊາຍແດນຕິດກັບປາກິດສະຖານ ເຊິ່ງເປັນຖານທີ່ໝັ້ນຂອງນັກຮົບກຸ່ມ IS ແລະ ຍັງມີກຸ່ມຕິດອາວຸດຕາລີບັນໃນພື້ນທີ່ນຳ.
