ຄຄຊ ແຕ່ງຕັ້ງຜູ້ວ່າການທະນາຄານເປັນຜູ້ປະຈຳການ
ກອງປະຊຸມຄະນະກໍາມະການຄຸ້ມຄອງຫຼັກຊັບ (ຄຄຊ) ຄັ້ງທີ III ປະຈໍາປີ 2018 ໄດ້ຈັດຂຶ້ນໃນວັນທີ 26 ທັນວານີ້ ພາຍໃຕ້ການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານ ຄຄຊ ແລະກອງ ປະຊຸມ ຍັງໄດ້ແຕ່ງຕັ້ງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ເປັນຮອງປະທານ ຄຄຊ ແລະ ເປັນຜູ້ປະຈຳການຄົນໃໝ່; ແລະ ໃນຂະນະດຽວກັນຂົງເຂດການເງິນ-ການທະນາຄານ ກໍ່ໄດ້ມີການພົບປະກັບການນຳຂັ້ນສູງຂອງປະເທດໄທ ທີ່ມາເຂົ້າຮ່ວມກອງປະຊຸມແບບບໍ່ເປັນທາງການ ຄັ້ງທີ III (Joint Cabinet Retreat) ເພື່ອແນໃສ່ສົ່ງເສີມການພົວພັນຮ່ວມມືດ້ານຕະຫຼາດທຶນ.
ໃນຜ່ານມາ ຄຄຊ ກໍ່ໄດ້ເອົາໃຈໃສ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບຢ່າງຕັ້ງໜ້າ ແລະ ໄດ້ສຳເລັດການຄົ້ນຄວ້າຮ່າງນິຕິກຳລຸ່ມກົດໝາຍ 2 ສະບັບ, ສຳເລັດການຄົ້ນຄວ້າອອກຈຳໜ່າຍພັນທະບັດລັດຖະບານໃຫ້ແກ່ຜູ້ລົງທຶນທົ່ວໄປ ໃນວັນທີ 25 ທັນວາ 2018 (ເປັນເວລາປະມານ 1 ເດືອນ) ສາມາດອອກຈໍາໜ່າຍພັນທະບັດລັດຖະບານ ແລະ ສືບຕໍ່ເອົາໃຈໃສ່ພັດທະນາຕະຫຼາດທຶນລາວໃຫ້ມີປະສິດທິພາບ, ມີຄວາມເຊື່ອຖື ແລະ ມີມາດຕະຖານສາກົນ.
ໃນໂອກາດນີ້ ທ່ານຮອງນາຍົກລັດຖະມົນຕີ, ໄດ້ຕີລາສູງຕໍ່ຜົນສຳເລັດຂອງ ຄຄຊ ແລະ ເນັ້ນວ່າ: ເພື່ອສືບຕໍ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບໃຫ້ໜັກແໜ້ນເຂັ້ມແຂງກວ່າເກົ່າ; ຜູ້ປະຈຳການ ແລະ ສໍານັກງານ ຄຄຊ ຈົ່ງຮີບຮ້ອນປະສານສົມທົບກັບຂະແໜງການກ່ຽວຂ້ອງຕ່າງໆ ພ້ອມກັນຈັດຕັ້ງປະຕິບັດຕາມເນື້ອໃນຈິດໃຈທີ່ກອງປະຊຸມຄັ້ງນີ້ ໄດ້ຮັບຮອງເອົາໃຫ້ເປັນຮູບປະທໍາ, ມີການຕິດຕາມກວດກາ ແລະ ສະຫຼຸບຖອດຖອນບົດຮຽນແຕ່ລະໄລຍະຢ່າງເໝາະສົມ ຈາກນັ້ນ ໃຫ້ສະຫຼຸບຕີລາຄາການຈັດຕັ້ງປະຕິບັດດັ່ງກ່າວ ເພື່ອລາຍງານຕໍ່ກອງປະຊຸມຄະນະກໍາມະການຄຸ້ມຄອງຫຼັກຊັບຄັ້ງຕໍ່ໄປ ແລະ ມອບໃຫ້ຜູ້ປະຈຳການຊີ້ນໍາໂດຍກົງຕໍ່ການປະຕິບັດໜ້າວຽກດັ່ງກ່າວໃຫ້ມີປະສິດທິຜົນ.
# ຂ່າວ-ພາບ: ຣັດສະໝີ ດວງສັດຈະ
