ເມສຊີ ບໍ່ຮັບຄຳທ້າດວນ ໂຣນັລໂດ້ ທີ່ອີຕາລີ
ລິໂອເນລ ເມສຊີ ດາວຍິງ ບາເຊໂລນາ ກ່າວເອງວ່າ ບໍ່ສົນຮັບຄຳທ້າຂອງ ຄຣິສເຕຍໂນ ໂຣນັລໂດ້ ດາວຍິງ ຢູເວນຕຸສ ທີ່ຢາກໃຫ້ຕົນຕາມໄປຫລິ້ນຢູ່ ອີຕາລີ ໂດຍກ່າວວ່າ ຕົນມີຄວາມທ້າທາຍໃໝ່ໆທຸກລະດູການຢູ່ແລ້ວ.
ລິໂອເນລ ເມສຊີ ກອງໜ້າຄົນເກັ່ງຂອງ ບາເຊໂລນາ ສະໂມສອນຍັກໃຫຍ່ແຫ່ງ ລາ ລີກາ ສະເປນ ກ່າວວ່າຕົນບໍ່ຄິດຈະຍ້າຍໄປຫລິ້ນກັບທີມໃນ ກັລໂຊ ເຊເຣຍ ອາ ອີຕາລີ ເພື່ອຈະໄປດວນກັບ ຄຣິສເຕຍໂນ ໂຣນັລໂດ້ ນັກເຕະຊຸບເປີຊະຕາຂອງ ຢູເວນຕຸສ ຕາມທີ່ອີກຝ່າຍທ້າມາແຕ່ຢ່າງໃດ.
ເມສຊີ ກັບ ໂຣນັລໂດ້ ເຄີຍພົບກັນຢ່າງສູສີ ແລະ ດຸເດືອດໃນຕອນທີ່ ໂຣນັລໂດ້ ຫລິ້ນຢູ່ກັບ ຣີລ ມາດຣິດ ໂດຍພວກເຂົາແຂ່ງກັນຍິງປະຕູ ກ່ອນຊຳເມີ້ຜ່ານມາ ດາວເຕະຊາວໂປຕຸເກດຈະຍ້າຍໄປຢູ່ກັບ ຢູເວນຕຸສ ເຊິ່ງກ່ອນໜ້ານີ້ ໂຣນັລໂດ້ ໄດ້ຊວນໃຫ້ ເມສຊີ ຍ້າຍໄປຫລິ້ນຢູ່ ອີຕາລີ ຄືກັນ.
ດາວຍິງຊາວອາເຈນຕິນາໃຫ້ສຳພາດຕໍ່ ມາກ້າ ສື່ຂອງສະເປນວ່າ “ຂ້ອຍຈະຕອບຮັບຄຳທ້າຂອງ ໂຣນັລໂດ້ ທີ່ຢາກໃຫ້ຂ້ອຍໄປຫລິ້ນໃນ ອີຕາລີ ຫລື ບໍ່ນັ້ນ ? ຂ້ອຍບໍ່ຈຳເປັນຕ້ອງປ່ຽນແປງຫຍັງ ຕອນນີ້ຂ້ອຍຢູ່ກັບທີມທີ່ດີທີ່ສຸດໃນໂລກແລ້ວ, ສ່ວນຄວາມທ້າທາຍຂອງຂ້ອຍເກີດຂຶ້ນໃໝ່ທຸກໆລະດູການ ຂ້ອຍບໍ່ຈຳເປັນຕ້ອງປ່ຽນທີມ ຫລື ປ່ຽນລີກເພື່ອຕັ້ງເປົ້າໝາຍໃໝ່ໆ.
