ອາສາສະໝັກກາແດງ ລາວ-ເກົາຫລີ ຮ່ວມກັນສ້ອມແປງໂຮງຮຽນຢູ່ເມືອງທ່າພະບາດ ແຂວງບໍລິຄຳໄຊ

ໃນລະຫວ່າງວັນທີ 20- 26 ທັນວານີ້, ທີ່ໂຮງຮຽນ ປະຖົມສົມບູນ ບ້ານ ປ່າໄລ່ ເມືອງທ່າພະບາດ ແຂວງ ບໍລິຄຳໄຊ ໄດ້ຈັດກິດຈະກຳ ແລກປ່ຽນຊາວໜຸ່ມອາສາສະໝັກກາແດງລາວ ແລະ ສ.ເກົາຫຼີ.

ໂດຍການປັບປຸງອາຄານຮຽນຊັ້ນອະນຸບານ ແລະ ຊັ້ນປະຖົມ, ພ້ອມທັງໄດ້ສະໜອງອຸປະກອນການກໍ່ ສ້າງຈໍານວນໜຶ່ງ ເພື່ອສົມທົບການກໍ່ສ້າງໂຮງຮຽນ ປະຖົມສົມບູນບ້ານ ປ່າໄລ່, ໂຮງຮຽນປະຖົມສົມບູນ ບ້ານ ທວາຍແບ່ງ ແລະ ໂຮງຮຽນ ປະຖົມສົມບູນ ອຸດົມໄຊ ເມືອງ ທ່າພະບາດ ແຂວງ ບໍລິຄຳໄຊ ແລະ ປັບປຸງອາຄານຮຽນ ອະນຸບານບ້ານໜອງບົວທອງ ເມືອງປາກງື່ມ ນະຄອນຫລວງວຽງຈັນ,

ຍ້ອນອາຄານເກົ່າແກ່ ສ້າງຄວາມຫຍຸ້ງຍາກໃຫ້ແກ່ການຮຽນ- ການສອນ ຂອງຄູ-ອາຈານ ແລະ ນັກຮຽນ; ຫລັງຈາກນັ້ນ, ກໍໄດ້ມອບອຸປະກອນການຮຽນ- ການສອນ ແລະ ໃຫ້ຄວາມຮູ້ດ້ານການປະຖົມພະຍາບານ, ຮຽນຮູ້ວັດທະນະທຳລາວເຊັ່ນ: ການໃສ່ບາດ, ການນຸ່ງຖື, ການປຸງ ແຕ່ງອາຫານ, ບາສີສູ່ຂວັນ ແລະ ການສະແດງສິລະປະຮ່ວມກັນ. ການຊ່ວຍເຫຼືອ ຄັ້ງນີ້, ແມ່ນໄດ້ຈາກການ ລະດົມທຶນຂອງແຂວງ ຈອງນຳ  ສ.ເກົາຫຼີ ລວມມີມູນ ຄ່າ 27 ພັນໂດລາສະຫະລັດ.