ສະຖານທູດຈີນ ປະຈຳລາວມອບລົດເມ 2 ຄັນ ໃຫ້ ມຊ
ສະຖານທູດ ສປ ຈີນ ປະຈໍາລາວ ໄດ້ມອບລົດເມ 25 ບ່ອນນັ່ງ ຈໍານວນ 2 ຄັນໃຫ້ ແກ່ມະຫາວິທະຍາໄລແຫ່ງ ຊາດ (ມຊ) ລວມມີມູນຄ່າ 340 ລ້ານກີບ ເພື່ອນໍາໃຊ້ເຂົ້າ ໃນວຽກງານການບໍລິຫານການສຶກສາພາຍໃນມະຫາ ວິທະຍາໄລແຫ່ງຊາດ. ພິທີ ມອບ-ຮັບລົດດັ່ງກ່າວ, ໄດ້ຈັດຂຶ້ນໃນວັນ 27 ທັນວານີ້, ຢູ່ ມຊ, ລະຫວ່າງ ທ່ານ ຈ່ຽງ ຈ້າຍຕົງເອກອັກຄະລັດຖະທູດ ສປ ຈີນ ປະຈໍາລາວ ແລະ ທ່ານ ສົມສີ ຍໍພັນໄຊ ວ່າການອະທິການບໍດີ ມຊ, ມີຜູ້ຕາງໜ້າກໍາມາທິການ ຮ່ວມມືລາວ-ຈີນ, ພ້ອມດ້ວຍ ພະນັກງານ, ຄູ-ອາຈານ ແລະ ນັກສຶກສາເຂົ້າຮ່ວມ.
ໂອກາດນີ້, ທ່ານວ່າການອະທິການບໍດີ ມຊ ໄດ້ກ່າວສະແດງ ຄວາມຂອບໃຈຕໍ່ສະຖານທູດດັ່ງກ່າວ ທີ່ໃຫ້ການຊ່ວຍ ເຫຼືອຕະຫຼອດມາ, ເຊິ່ງໃນໄລຍະຜ່ານມາ ມຊ ກໍ ໄດ້ຮັບການຊ່ວຍເຫຼືອດ້ານ ພາຫະນະຈາກສະຖານເອອັກຄະລັດຖະທູດ ສປ ຈີນ ປະຈໍາລາວ ເປັນຕົ້ນແມ່ນລົດສົ່ງຄົນເຈັບ ແລະ ລົດໄຟຟ້າ.
ນອກນີ້, ສະຖານທູດ ຈີນ ຍັງໄດ້ມອບທຶນການສຶກສາໃຫ້ແກ່ນັກສຶກສາທີ່ຮຽນດີ ແລະ ຮຽນເກັ່ງ ແຕ່ມີຖານະທຸກຍາກ, ຂາດເຂີນດ້ານ ທຶນການສຶກສາ ແລະ ທຶນການຄົ້ນຄວ້າວິທະຍາສາດ ຈໍານວນໜຶ່ງໃຫ້ແກ່ ມຊ. ເພື່ອປະກອບສ່ວນເສີມຂະຫຍາຍສາຍພົວພັນຂອງ 2 ປະເທດ ລາວ-ຈີນ ໃຫ້ແໜ້ນ ແຟ້ນຍິ່ງຂຶ້ນ./.
