ຣັດເຊຍທົດລອງລູກສອນໄຟ ໄຮເປີໂຊນິກ Avngard
ກອງທັບຣັດເຊຍປະສົບຜົນສຳເລັດໃນການທົດລອງປະສິດທິພາບຂອງລູກສອນໄຟຄວາມໄວເໜືອສຽງ Avngard ພ້ອມເຂົ້າປະຈຳການໃນປີ 2019.
ສຳນັກຂ່າວຕ່າງປະເທດລາຍງານວ່າ: ປະທານາທິບໍດີ ວະລາດິເມຍ ປູຕິນ ເດີນທາງໄປກະຊວງປ້ອງກັນປະເທດໃນນະຄອນຫລວງມົດສະກູ ວັນທີ 26 ທັນວານີ້ ເຊິ່ງຜູ້ນຳຣັດເຊຍຮ່ວມສັງເກດການການທົດລອງປະສິດທິພາບຂອງຕົ້ນແບບລູກສອນໄຟໄຮເປີໂຊນິກ ຫລື ລູກສອນໄຟຄວາມໄວເໜືອສຽງໃນຊື່ Avngard ຫລື ວາຍຢູ-71 ແລະ ວາຍຢູ-74 ໂດຍລູກສອນໄຟລອຍຂຶ້ນສູ່ອາກາດຈາກຖານຍິງດອມບາຣອບສະກີ ຕັ້ງຢູ່ທາງຕອນໃຕ້ຂອງພູຢູຣັລ ແລະ ສາມາດທຳລາຍເປົ້າໝາຍທີ່ຢູ່ຫ່າງອອກໄປທາງຕາເວັນອອກໄກອີກ 6.000 ກິໂລແມັດ ໄດ້ຢ່າງແມ້ນຢ້ຳ.
ທັງນີ້, ກອງທັບຣັດເຊຍທົດລອງປະສິດທິພາບຂອງລູກສອນໄຟຄວາມໄວເໜືອສຽງຊື່ Kinzhal ໃນເດືອນມີນາຜ່ານມາ ໂດຍການພັດທະນາລູກສອນໄຟຄວາມໄວເໜືອສຽງ ຫລື ລູກສອນໄຟໄຮເປີໂຊນິກເປັນໜຶ່ງໃນອາວຸດຕາມໂຄງການຍົກລະດັບປະສິດທິພາບດ້ານປ້ອງກັນປະເທດຂອງລັດຖະບານມົດສະກູ ທີ່ທ່ານ ປູຕິນ ປະກາດໃນເດືອນມີນາຜ່ານມາ ເຊິ່ງລູກສອນໄຟ Avngard ຄາດວ່າຈະເຂົ້າປະຈຳການໄດ້ໃນປີໜ້າ.
