ເປີດພິທີຊື້-ຂາຍພັນທະບັດລັດຖະບານ ຜ່ານ ຕລຊລ ເປັນຄັ້ງທໍາອິດ
ກະຊວງການເງິນ ຕາງໜ້າໃຫ້ແກ່ລັດຖະບານ ສປປ ລາວຮ່ວມກັບຕະຫຼາດຫຼັກຊັບລາວ (ຕລຊລ), ບໍລິສັດຫຼັກຊັບ ລ້ານຊ້າງ ມະ ຫາຊົນ, ບໍລິສັດຫຼັກຊັບ ທຄຕລ-ກທ ຈຳກັດ ແລະ ບໍລິສັດຫຼັກຊັບ ລາວ-ຈີນ ຈຳກັດ ໄດ້ຈັດພິທີເປີດການຊື້-ຂາຍພັນທະບັດ ຄັ້ງທໍາອິດ (First trading day) ໃນຕະຫຼາດຫຼັກຊັບລາວ ຊຶ່ງຈັດຂຶ້ນໃນວັນທີ 25 ທັນວານີ້ ໂດຍການເປັນປະທານຂອງທ່ານ ວັນຄໍາ ວໍລະວົງ ຜູ້ອໍານວຍການໃຫຍ່ ຕລຊລ ແລະ ມີທ່ານ ສໍາເພົາ ເລົາສີ ຮອງຫົວໜ້າຫ້ອງການກະຊວງການເງິນ, ມີຄະນະກໍາມະການຄຸ້ມຄອງຫຼັກຊັບ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ເພື່ອເປີດການນຳເອົາພັນທະບັດລັດຖະບານມາຈົດທະບຽນ ຜ່ານຕະຫຼາດຫຼັກຊັບລາວ ແລະ ມັນມີຄວາມສຳຄັນຕໍ່ການສົ່ງເສີມ ແລະ ພັດທະນາວຽກງານຕະຫຼາດທຶນ ສປປ ລາວໃຫ້ມີຜະລິດຕະພັນຫຼາກຫຼາຍ ເພື່ອຮັບຮອງການພັດທະນາ ແລະ ຂະ ຫຍາຍຕົວໃນອານາຄົດ; ການຈົດທະບຽນຜ່ານຕະຫຼາດຫຼັກຊັບລາວຂອງພັນທະບັດດັ່ງກ່າວ ຈະສາມາດອຳນວຍຄວາມສະດວກໃຫ້ນັກລົງທຶນຕ່າງໆ ບໍ່ວ່າຈະເປັນບຸກຄົນ, ນິຕິບຸກຄົນທັງພາຍໃນ ແລະ ຕ່າງປະເທດ ສາມາດແລກປ່ຽນຊື້-ຂາຍພັນທະບັດຜ່ານຕະຫຼາດຫຼັກຊັບລາວໄດ້.
ຊຶ່ງມີປະເພດພັນທະ ບັດດຸ່ນດ່ຽງງົບປະມານ ຈຳນວນ 285.130 ໜ່ວຍ, ມູນຄ່າກໍານົດ 1.000.000 ກີບຕໍ່ໜ່ວຍ, ລາຄາຂາຍ 1.000.000 ກີບຕໍ່ໜ່ວຍ (ສະກຸນເງິນກີບ), ເຊິ່ງມີອາຍຸ ແລະ ອັດຕາດອກເບ້ຍທີ່ແຕກຕ່າງກັນຄື : ອາຍຸພັນທະບັດ 1 ປີ ຈໍານວນ 189.110 ໜ່ວຍ ມີອັດຕາດອກເບ້ຍ 5,3%/ປີ; ອາຍຸພັນທະບັດ 3 ປີຈໍານວນ 60.000 ໜ່ວຍ ມີອັດຕາດອກເບ້ຍ 6,80%/ປີ; ອາຍຸພັນ ທະບັດ 5 ປີ ຈໍານວນ 36.020 ໜ່ວຍ ອັດຕາດອກເບ້ຍ 6,95%/ປີ ແລະ ອາຍຸພັນທະບັດ 7 ປີ ຈໍານວນ 0 ໜ່ວຍ ອັດຕາດອກເບ້ຍ 7,10%/ປີ; ງວດການຈ່າຍດອກເບ້ຍ ສອງຄັ້ງຕໍ່ປີ ແລະ ຈ່າຍດອກເບ້ຍໃນວັນທີ 16 ມີຖຸນາ ແລະ 16 ທັນວາ ຂອງແຕ່ລະປີ ຊຶ່ງມີຕົວແທນຈໍາໜ່າຍບໍລິສັດຫຼັກຊັບ ລ້ານຊ້າງ ມະຫາຊົນ (ຕົວແທນຈຳໜ່າຍຫຼັກ); ບໍລິສັດຫຼັກຊັບ ທຄຕລ-ກທ ຈຳກັດ.
ການນໍາເອົາພັນທະບັດແລກປ່ຽນ ຊື້-ຂາຍ ໃນຄັ້ງນີ້ຖືເປັນຄັ້ງທຳອິດຂອງ ສປປ ລາວ ທີ່ຈະນໍາເອົາພັນທະບັດດັ່ງກ່າວມາຈົດທະບຽນ ໃນຕະຫຼາດຫຼັກຊັບລາວ ສາມາດແລກປ່ຽນ ຊື້-ຂາຍ ໄດ້ ແລະ ຖືເປັນຊ່ອງທາງການລົງທຶນອີກປະເພດໜຶ່ງ ທີ່ໃຫ້ຜົນຕອບແທນສະໝໍ່າສະ ເໝີ, ປາສະຈາກຄວາມສ່ຽງ, ມີອາຍຸການລົງທຶນທີ່ຊັດເຈນ, ອັດຕາຜົນຕອບແທນທີ່ໜ້າສົນໃຈ ແລະຖືເປັນອີກທາງເລືອກໜຶ່ງໃນການກະຈາຍ ຄວາມສ່ຽງໃນການລົງທຶນ; ຕໍ່ກັັບຜູ້ທີ່ສົນໃຈລົງທຶນໃນພັນທະບັດລັດຖະບານຜ່ານບໍລິສັດຫຼັກຊັບ.
ໂດຍ: ຣັດສະໝີ ດວງສັດຈະ
