ໂຄງການປະຕິສັງຂອນພະທາດຫລວງສຳເລັດແລ້ວ 95%

            ເຊົ້າວັນທີ 17 ພຶດສະພານີ້, ຄະນະຮັບຜິດຊອບລະດັບຊາດໂຄງການປະຕິສັງຂອນພິພິທະພັນພະທາດ ຫລວງວຽງຈັນຄັ້ງທີ IV, ນຳໂດຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ທັງເປັນປະທານ ຄະນະກຳມະການໂຄງການດັ່ງກ່າວ ລົງຕິດຕາມກວດກາຄວາມຄືບໜ້າ ແລະ ຊີ້ນຳການປະຕິສັງຂອນຄັ້ງນີ້.

ທ່ານ ບຸນມີ ສອນມີໄຊ ປະທານບໍລິສັດ ມີພູນຊັບກໍ່ສ້າງ ຈຳກັດ ໃຫ້ຮູ້ວ່າ: ການດຳເນີນໂຄງການປະຕິສັງ ຂອນດັ່ງກ່າວສຳເລັດແລ້ວ 95% ແລະ ຄາດວ່າເດືອນຕຸລານີ້ຈະໃຫ້ສຳເລັດ 100%, ປັດຈຸບັນ ພວມເລັ່ງວຽກມຸງຫລັງ ຄາ, ທາສີຝາກົມມະລຽນ, ສ້ອມແປງຫໍໄຫວ້ ແລະ ຊຸ້ມປະຕູໃຫຍ່ທິດຕາເວັນຕົກ, ແກ້ໄຂຮ່ອງລະບາຍນ້ຳ, ໄຟຟ້າ, ເດີ່ນຫຍ້າ, ວຽກຈັດວາງສະແດງວັດຖຸພັນ ແລະ ລະບົບປ້ອງກັນການຕິດຕັ້ງກ້ອງວົງຈອນປິດດ້ານໃນ ແລະ ນອກ ກົມມະລຽນ ແລະ ໃນຂະນະດຽວກັນ, ທ່ານເຈົ້າຄອງ ກໍໄດ້ຊີ້ນຳໃຫ້ເລັ່ງໜ້າວຽກປູກຫຍ້າໃສ່ກົມມະລຽນພະທາດ ຫລວງໃຫ້ເປັນພື້ນສີຂຽວ, ສະອາດສວຍງາມ, ພ້ອມທັງປັບປຸງຮ່ອງລະບາຍນ້ຳ ເພື່ອໃຫ້ນ້ຳໄຫລຜ່ານສະດວກສະບາຍ ໃນລະດູຝົນອີກດ້ວຍ.