ແພດໝໍ ຂໍໃຫ້ຈັນຍາບັນເປັນກົກ

ໂດຍ : ມຶກບໍ່ແຫ້ງ

ແພດໝໍ ແມ່ນອາຊີບທີ່ສຳຄັນທີ່ສຸດ ທີ່ເວົ້າເຖິງ ການມີຊີວິດຢູ່ ຫຼື ຄວາມຕາຍ ເພາະສະນັ້ນ ຈັນຍາບັນໃນອາຊີບນີ້ ຈຶ່ງຄວນຖືໄວ້ທີ່ສູງສຸດ.

ຈັນຍາບັນ ຂອງແພດໝໍ ແມ່ນຖືກສົນທະນາກັນຫຼາຍທີ່ສຸດ ໃນທ່າມກາງຫາງສຽງການບໍລິການ ແລະການເຮັດວຽກຂອງ ແພດໝໍ ໂດຍສະເພາະໂຮງໝໍລັດໃນ ສປປລາວ ທີ່ມີບາງຜ່ອງຂາດຄວາມຮັບຜິດຊອບ ແລະປະລະໜ້າທີ່ຂອງຕົນ ເຊິ່ງເຮັດໃຫ້ປາໂຕດຽວເໜົ່າໝົດຂ້ອງກໍມີ.

ແຕ່ແນວໃດກໍຕາມ ຜູ້ຂຽນກໍຍັງເຊື່ອໝັ້ນວ່າ ແພດໝໍລາວ ຈຳນວນຫຼາຍຍັງຢຶດໝັ້ນ ຖືໝັ້ນໃນໜ້າທີ່ຂອງຕົນ ຢ່າງເຄັ່ງຄັດ ໂດຍບໍ່ຈຳແນກແຍກແຍະ ຄົນເຈັບ ວ່າຜູ້ໃດພີ່ນ້ອງ ຫຼື ຜູ້ອື່ນ, ຜູ້ທຸກຍາກ ຂາດເຂີນ ຫຼື ຮັ່ງມີ ໂດຍໃຫ້ການບໍລິການ ແລະເອົາໃຈໃສ່ຢ່າງເທົ່າທຽມ ເຊິ່ງບໍ່ຫວັງຜົນຕອບແທນ ທີ່ພິເສດໃດໆ.

ດັ່ງປະສົບການ ທີ່ຜູ້ຂຽນໄດ້ພົບພໍ້ເມື່ອອາທິດທີ່ຜ່ານມາຢູ່ໂຮງໝໍມິດຕະພາບ ເຊິ່ງໄດ້ພາຄອບຄົວໄປອອກລູກ ຢູ່ທີ່ນັ້ນ, ກ່ອນໜ້ານັ້ນ ມີໝູ່ຄູ່ ເອື້ອຍ ອ້າຍຫຼາຍຄົນ ມາບອກວ່າ “ຄືບໍ່ພາກັນໄປອອກລູກຢູ່ ປະເທດໃກ້ຄຽງເອົາ ເພາະແພດໝໍເພິ່ນມີຈັນຍາບັນສູງ, ການບໍລິການກໍດີ ມີອາຫານໃຫ້ພ້ອມ ແລະອື່ນໆ” ແຕ່ສິ່ງເຫຼົ່ານັ້ນ ບໍ່ໄດ້ປ່ຽນໃຈ ໃຫ້ຜູ້ຂຽນ ໃນການໃຊ້ບໍລິການໂຮງໝໍລັດຢູ່ປະເທດເຮົາ.

ເມື່ອໄດ້ສຳພັດກັບຄວາມຈິງແລ້ວ, ບັນດາພະນັກງານແພດໝໍຢູ່ໂຮງໝໍມິດຕະພາບ ແມ່ນໄດ້ເອົາໃຈໃສ່ເປັນຢ່າງດີ ທີ່ສຸດ ໃນຂະບວນການອອກລູກ ເຊິ່ງກໍໄດ້ແນະນຳຢ່າງລະອຽດກ່ຽວກັບບັນຫາຕ່າງໆ ທີ່ກ່ຽວຂ້ອງຕໍ່ການກຽມ ພ້ອມໃນການເກີດ ເຊັ່ນວ່າ  ເພິ່ນບໍ່ແນະນຳໃນການຜ່າຕັດ ເອົາລູກນ້ອຍອອກ ຖ້າບໍ່ແມ່ນເຫດສຸດວິໄສ ແທ້ໆ ເຊິ່ງຄຳແນະນຳ ອັນນີ້ ກໍສອດກັບ ອົງການອະນາໄມໂລກ ທີ່ເພິ່ນພະຍາຍາມຊຸກຍູ້ສົ່ງເສີມ ການເກີດລູກແບບທຳມະຊາດຫຼາຍກວ່າການຜ່າຕັດເອົາລູກນ້ອຍອອກ.

ການດຳເນີນການ ເພື່ອການກຳເນີດລູກແບບທຳມະຊາດ ຫຼື ເກີດເອງຂອງຄອບຄົວຜູ້ຂຽນ ແມ່ນໄດ້ດຳເນີນໄປ ດ້ວຍດີ ແລະມີຄວາມປອດໄພຮອບດ້ານ ເຊິ່ງບັນດາແພດໝໍ ໄດ້ສະແດງເຖິງຄວາມເອົາໃຈໃສ່ຢ່າງເຖິງຖອງ ເຮັດໃຫ້ ອົດຍ້ອງເພິ່ນບໍ່ໄດ້ ອັນນີ້ຈຶ່ງຮຽກວ່າ ແພດໝໍຂອງປະຊາຊົນ.

ເມື່ອເປັນເຊັ່ນນັ້ນ ຈຶ່ງເຊື່ອໝັ້ນວ່າ ບັນດາຂະແໜງການອື່ນ ນອກເໜືອຈາກ ຂະແໜງການອອກລູກ ກໍຄື ໂຮງໝໍແຫ່ງອື່ນໆ ກໍຈະປະຕິບັດໃນມາດຖານຄືກັນ, ໃກ້ຄຽງ ຫຼື ດີລື່ນຈາກທີ່ ຜູ້ຂຽນໄດ້ປະສົບມາ. ອັນນີ້ ມັນໄດ້ສະແດງໃຫ້ເຫັນວ່າ ຄວາມພະຍາຍາມ ຂອງລັດຖະບານເຮົາໃນການປັບປຸງ ຄຸນນະພາບໃນການ ບໍລິການຂອງຂະແໜງສາທາລະນະສຸກໃນສປປລາວ ກຳລັງກ້າວຂຶ້ນສູ້ລະດັບໃໝ່ ທີ່ດີກວ່າເກົ່າ ໂດຍສະເພາະ ຈັນຍາບັນຂອງແພດໝໍ ທີ່ຕ້ອງເຮັດຕາມໜ້າທີ່ຂອງຕົນຢ່າງເຕັມສ່ວນ ແລະມີຄວາມຮັບຜິດຊອບສູງ.

ຂໍໃຫ້ ປະຊາຊົນລາວ ຈົ່ງເຊື່ອໝັ້ນໃນການບໍລິການຂອງແພດໝໍ ຂອງບັນດາໂຮງໝໍໃນປະເທດເຮົາຫຼາຍຂຶ້ນ ເຊິ່ງຈະຫຼຸດຜ່ອນການຫຼັ່ງໄຫຼໄປໃຊ້ບໍລິການ ຂອງໂຮງໝໍຢູ່ປະເທດໃກ້ຄຽງໃຫ້ນັບມື້ນັບຫຼຸດລົງ ແຕ່ພ້ອມດຽວກັນນັ້ນ ບັນດາແພດໝໍ, ໂຮງໝໍ ໃນ ລາວ ກໍຕ້ອງເດັດດ່ຽວ ປັບປຸງຕົນເອງຢ່າງຕັ້ງໜ້າ ຫາທຸກວິທີທາງໃນການປັບປຸງ ຄຸນນະພາບຂອງການບໍລິການ, ຍົກສູງຈັນຍາທຳຂອງຕົນ ໃນອາຊີບແພດໝໍຢ່າງ ໝັ້ນທ່ຽງ ຈຶ່ງຈະສ້າງຊື່ສຽງ ໃຫ້ແກ່ແພດໝໍລາວ ກ້າວຂຶ້ນສູ່ຄຸນນະພາບທີ່ປະຊາຊົນລາວຍອມຮັບໃຫ້ໄດ້.