ສວນພຶກສາ ຈະຈັດງານບຸນກິນຈຽງບັນດາເຜົ່າຕ້ອນຮັບປີໃໝ່ 2019
ໃນພິທີຖະແຫລງຂ່າວທີ່ໄດ້ຈັດຂຶ້ນຢູ່ສວນພຶກສາ ບ້ານດ່ານຊີ ເມືອງນາຊາຍທອງ ນະຄອນຫລວງວຽງຈັນ ໃນເຊົ້າວັນທີ 24 ທັນວານີ້, ທ່ານ ພູວົງ ພະມີສິດ ເຈົ້າຂອງສວນພຶກສາ ໃຫ້ຮູ້ວ່າ: ໃນລະຫວ່າງວັນທີ 9-13 ມັງກອນ ນີ້, ສວນພຶກສາຂອງຕົນຈະໄດ້ຈັດງານ ບຸນກິນຈຽງບັນດາເຜົ່າຂຶ້ນເປັນປີທີ 2 ເພື່ອຕ້ອນຮັບປີໃໝ່ສາກົນ 2019 ແລະ ແນໃສ່ອານຸລັກຮັກສາວັດທະນະທຳບັນດາເຜົ່າ ແລະ ສົ່ງເສີມປີທ່ອງທ່ຽວລາວ ໃຫ້ມີບັນຍາກາດຝົດຝຶ້ນຍິ່ງໆຂຶ້ນດ້ວຍຫລາຍກິດຈະກຳຄື: ການປະກວດນາງສາວຊົນເຜົ່າມົ້ງ, ການສະແດງສິລະປະວັນນະຄະດີ, ພ້ອມການຂີ່ມ້າ, ຂີ່ສະລິງ, ຂີ່ລົດຖີບ, ເກືອປາ, ຕຶກເບັດ, ຂີ່ລົດເອທີວີ ແລະ ອື່ນໆ ຢ່າງເບີກບານມ່ວນຊື່ນ, ພາຍຫລັງລະດູການເກັບກ່ຽວຂອງປະຊາຊົນເຜົ່າຕ່າງໆໄດ້ສຳເລັດລົງແລ້ວ, ຊຶ່ງການປະກວດນາງສາວເຜົ່າມົ້ງແມ່ນ ເພື່ອສົ່ງເສີມຄວາມສາມາດຂອງແມ່ຍິງລາວບັນດາເຜົ່າ ແລະ ເປັນການຮັກສາປະເພນີ, ຊຶ່ງສ່ວນໃຫຍ່ຜູ້ທີ່ເຂົ້າປະກວດແມ່ນເຮົາໄດ້ຄັດເລືອກມາຈາກ ນະຄອນຫລວງວຽງຈັນ, ເພື່ອເປັນຕົວແທນໃຫ້ແກ່ ໃນການເຜີຍແຜ່ວັດທະນະທຳຂອງແຕ່ລະຊົນເຜົ່າ, ໂດຍຜູ້ທີ່ໄດ້ຮັບຊະນະເລີດ ຈະໄດ້ຮັບມົງກຸດຂອງຮ້ານ ຄຳພູວົງ ມູນຄ່າ ກ່ວາ 40 ລ້ານກີບ ພ້ອມທັງເງີນສົດ 5 ລ້ານກີບ.
ທ່ານ ພູວົງ ໃຫ້ຮູ້ວ່າ: ສວນພຶກສາ ເປັນສະຖານທີ່ທ່ອງທ່ຽວແຫ່ງໜຶ່ງ ກຳລັງໄດ້ຮັບຄວາມນິຍົມ ຢູ່ ນະຄອນຫລວງວຽງຈັນ ພາຍຫລັງເປີດບໍລິການມາແຕ່ປີ 2017 ພ້ອມເປັນບ່ອນສະໜອງຄວາມຮູ້ແກ່ນັກຮຽນ, ນັກສຶກສາ ທີ່ສາມາດເຂົ້າມາທັດສະນະສຶກສາຫາຄວາມຮູ້ກ່ຽວກັບການປູກພຶດປອດສານພິດ, ດ້ານຮີດຄອງປະເພນີ ແລະ ຊີວິດການເປັນຢູ່ຂອງຊົນເຜົ່າຕ່າງໆໃນລາວ.
ທ່ານ ພູວົງ ໃຫ້ຮູ້ອີກວ່າ: ສວນດັ່ງກ່າວ ມີເນື້ອທີ່ຫລາຍກ່ວາ 35 ເຮັກຕາ ທີ່ໄດ້ຈັດສັນ ແລະ ແບ່ງເຂດການກໍ່ສ້າງຢ່າງເປັນລະບົບ, ເຊິ່ງສ່ວນໃຫຍ່ແລ້ວຈະຖືກຕົກແຕ່ງດ້ວຍສວນດອກໄມ້ນາໆຊະນິດເປັນຕົ້ນ: ດອກຕາເວັນ, ດອກກຸຫລາບ, ດອກຈຳປາ ແລະ ອື່ນໆໄດ້ຢ່າງສວຍງາມ, ນອກນັ້ນຍັງມີໜອງປາ 8 ໜອງໄວ້ໃຫ້ນັກທ່ອງທ່ຽວໄດ້ເຮັດກິດຈະກຳຕຶກເບັດ, ມີຮ້ານອາຫານທີ່ສາມາດຮອງຮັບການຈັດງານລ້ຽງ, ງານສ້າງສັນຕ່າງໆໄດ້ປະມານ 500-600 ຄົນ, ຊຶ່ງນອກຈາກຈະເປັນສະຖານທີ່ທ່ອງທ່ຽວແລ້ວ, ສວນພຶກສາ ຍັງໄດ້ສ້າງວຽກເຮັດງານທຳໃນຊຸມຊົນ ໂດຍສະເພາະແມ່ນສົ່ງເສີມປະຊາຊົນ ພາຍໃນບ້ານ ໃຫ້ມີວຽກເຮັດງານທຳ ແລະ ລາຍຮັບທີ່ໝັ້ນຄົງເພື່ອຊ່ວຍປັບປຸງ ຊີວິດການເປັນຢູ່ຂອງເຂົາເຈົ້າດີຂຶ້ນເປັນລຳດັບ.
