ຊື່ກິນບໍ່ໝົດ ຄົດກິນບໍ່ນານ

ສະບາຍດີ, ເພື່ອນຜູ້ອ່ານ ທີ່ຮັກແພງ ຈາກຫົວຂໍ້ທີ່ກ່າວຂ້າງເທິງນີ້ ຜູ້ຂຽນຢາກສ່ອງແສງໃຫ້ຜູ້ອ່ານຮູ້ເຖິງບັນຫາຂອງສັງຄົມທີ່ມັກ ມີການສວຍໂອກາດຂຶ້ນລາຄາສິນຄ້າຢູ່ຕາມສະຖານທີ່ທ່ອງທ່ຽວ ຫລື ເທສະການຕ່າງໆ ເຊິ່ງບັນຫານີ້ບໍ່ແມ່ນ ເລື່ອງທຳອິດທີ່ເກີດຂຶ້ນແຕ່ມີຂຶ້ນທຸກເທສະການ, ມີຢູ່ທຸກແຂວງ, ຄືເມື່ອອາທິດຜ່ານມານີ້ຜູ້ຂຽນໄດ້ມີໂອກາດໄປທ່ຽວເທສະການ Vungvieng music festival ກໍປາກົດເຫັນການສວຍໂອກາດ ດັ່ງກ່າວ, ນັບແຕ່ອາຫານ ການກິນ,  ເຮືອນພັກ- ໂຮງ ແຮມ ແລະ ການບໍລິການຕ່າງໆມີລາຄາສູງຂຶ້ນເປັນ  2 ເປັນ 3 ຈົນເຮັດໃຫ້ຜູ້ມາທ່ຽວງານຫລາຍຄົນທໍ້ຖອຍໃຈນຳ ກັບການສວຍໂອກາດແບບນີ້ ແລະ ບໍ່ເຫັນພາກສ່ວນຮັບຜິດຊອບໃດໆເຂົ້າມາຄວບຄຸມ ແລະ ແກ້ໄຂບັນຫາໄດ້, ໂດຍສະເພາະແມ່ຄ້າຊາວຂາຍ ສວຍໂອກາດ ຂຶ້ນລາຄາອາຫານສູງເກີນເຫດເຊິ່ງການກະທຳດັ່ງກ່າວນີ້ຈະສົ່ງຜົນກະທົບບໍ່ໜ້ອຍ ຕໍ່ການສົ່ງເສີມການທ່ອງທ່ຽວລາວເຮົາ.

ບັນຫາດັ່ງກ່າວບໍ່ແມ່ນ ເລື່ອງທໍາອິດທີ່ເກີດຂຶ້ນເຊິ່ງກ່ອນໜ້ານີ້ມີນັກທ່ອງທ່ຽວຫລາຍຄົນໄດ້ສ່ອງແສງມາວ່າ: ຍັງອີກບໍ່ດົນ ງານບຸນຊ້າງຢູ່ແຂວງໄຊຍະບູລີໃນ ລະຫວ່າງເດືອນກຸມພານີ້ກໍຈະໝູນວຽນມາຮອດອີກແລ້ວ, ບັນຫາຮີບດ່ວນກໍຂໍສະເໜີໃຫ້ອໍານາດການປົກຄອງແຂວງ ແລະ ພາກສ່ວນກ່ຽວຂ້ອງຕ່າງໆ ເພີ່ມທະວີການຄວບຄຸມລາຄາ ສິນຄ້າ ແລະ ຄ່າບໍລິການຕ່າງໆໃຫ້ຢູ່ໃນເກນປົກກະຕິ ແລະ ຮັບປະກັນບໍ່ໃຫ້ມີການສວຍໂອກາດໂກງກໍາໄລດັ່ງຜ່ານມາ. ຖ້າເຮັດໄດ້ແນວນັ້ນ ຈຶ່ງຈະເຮັດໃຫ້ງານບຸນດັ່ງກ່າວມີບັນຍາກາດຟົດຟື້ນ ແລະ ສາມາດ ສ້າງສິ່ງດຶງດູດ ໃຈໃຫ້ນັກທ່ອງທ່ຽວເຂົ້າມາທ່ຽວປະເທດເຮົາຫລາຍຂຶ້ນ.