ຜູ້ຄ້າຢາເສບຕິດຂ້າມຊາດຖືກຈັບຕົວມາດຳເນີນຄະດີ
ເຈົ້າໜ້າທີ່ສະກັດກັ້ນ ແລະ ຕ້ານຢາເສບຕິດ ໃຫ້ຮູ້ວ່າ: ເມື່ອບໍ່ດົນມານີ້, ກຳລັງເຈົ້າໜ້າທີ່ຂອງຕົນສາມາດກັກຕົວຜູ້ຄ້າຂາຍຢາເສບຕິດລາຍໃຫຍ່ ຊື່ທ້າວ ຈັນສະໝອນ ອາຍຸ 38 ປີ ຢູ່ບ້ານໂພນເຄັງ ເມືອງໄຊເສດຖາ ນະຄອນຫລວງວຽງຈັນ ພ້ອມຂອງກາງຢາເສບຕິດປະເພດຢາໄອ ມີນ້ຳໜັກ 8 ກິໂລ ໂດຍຜູ້ກ່ຽວຖືກກັກໂຕໃນລະຫວ່າງເອົາຢາເສບຕິດດັ່ງກ່າວໄປຝາກຢູ່ບໍລິສັດດີເຮັສແອລ (DHL) ເພື່ອສົ່ງໄປໃຫ້ລູກຄ້າສັ່ງຊື້ຢູ່ປະເທດຟີລິບປິນ ຈຶ່ງໄດ້ຢຶດໄວ້ເປັນຫລັກຖານ ເພື່ອດຳເນີນຄະດີຕາມລະບຽບກົດໝາຍ.
ເຈົ້າໜ້າທີ່ໃຫ້ຮູ້ວ່າ: ໄດ້ຕິດຕາມການເຄື່ອນໄຫວຂອງທ້າວ ຈັນສະໝອນ ມາດົນແລ້ວ, ກ່ອນນຳກຳລັງເຂົ້າຈັບຕົວພ້ອມຂອງກາງຄັ້ງນີ້, ພ້ອມທັງຈະຂະຫຍາຍຜົນຫາຜູ້ຮ່ວມຂະບວນການ ເພື່ອນຳຕົວມາດຳເນີນຄະດີຕາມລະບຽບກົດໝາຍ.
ສປປ ລາວ ເອົາໃຈໃສ່ຕ້ານ ແລະ ສະກັດກັ້ນຢາເສບຕິດຢ່າງເຂັ້ມງວດ ເຊິ່ງໃນກົດໝາຍອາຍາມາດຕາ 146 ໄດ້ລະບຸວ່າ: ບຸກຄົນໃດຫາກຜະລິດ, ປຸງແຕ່ງ, ມີໄວ້ຄອບຄອງ, ຄ້າຂາຍ, ຈຳໜ່າຍ, ນຳເຂົ້າ-ສົ່ງອອກ, ຂົນສົ່ງຢາອີ, ຢາບ້າ ຫລື ວັດຖຸອອກລິດຕໍ່ປະສາດອື່ນໆຜ່ານ ສປປ ລາວ ນ້ຳໜັກເກີນ 3 ກິໂລ ແມ່ນຈະຖືກລົງໂທດປະຫານຊີວິດ.
