ສຶກສາຄວາມເປັນໄປໄດ້ໃນການສ້າງສູນວັດແທກເຕືອນໄພຂອງເຂື່ອນໄຟຟ້າຢູ່ລາວ
ໃນວັນທີ 18 ທັນວານີ້, ກົມມາດຕະຖານ ແລະ ວັດແທກກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ບໍລິສັດ ອິນເຕີເນເຊິນນໍ ອິນເຕີເກລດ ຊິດສ໌ເຕັມລາວ ຈໍາກັດ, ໄດ້ຮ່ວມລົງນາມບົດບັນທຶກຄວາມເຂົ້າໃຈ (MOU) ກ່ຽວກັບການສຶກສາຄວາມເປັນໄປໄດ້ໃນການສ້າງສູນວັດແທກເຕືອນໄພຂອງເຂື່ອນໄຟຟ້າຢູ່ ສປປ ລາວ, ໂດຍການເຂົ້າຮ່ວມເປັນສັກຂີພິຍານຂອງທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ.
ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ໃຫ້ຮູ້ວ່າ: ການສຶກສາເພື່ອກໍ່ສ້າງສູນດັ່ງກ່າວມັນມີຄວາມໝາຍສໍາຄັນຍິ່ງ ເພື່ອແນໃສ່ປົກປ້ອງປະຊາຊົນ ແລະ ກະຕຸກຊຸກຍູ້ໃຫ້ການກໍ່ສ້າງເຂື່ອນຮັບປະກັນຄຸນນະພາບ ແລະ ມາດຕະຖານສາກົນ. ດັ່ງນັ້ນກົມມາດຕະຖານ ແລະ ການວັດແທກ ຈຶ່ງໄດ້ປະສານສົມທົບກັບພາກສ່ວນກ່ຽວຂ້ອງກະກຽມເງື່ອນໄຂຄື: ດ້ານນິຕິກໍາການພັດທະນາຊັບພະຍາກອນມະນຸດ ແລະ ສ້າງວິຊາການໃຫ້ມີຄວາມຮູ້ຄວາມສາມາດກ່ຽວກັບວຽກງານດັ່ງກ່າວ.
ຕາງໜ້າເຊັນບົດບັນທຶກຄວາມເຂົ້າໃຈ (MOU) ດັ່ງກ່າວ, ໂດຍທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ກະດິງທອງ ສິງດາລາ ຫົວໜ້າສູນວັດແທກ ແລະ ທ່ານ ອາລີວັນ ສີທາລາ ປະທານບໍລິສັດ ອິນເຕີເນເຊິນນໍ ອິນເຕີເກລດ ຊິດສ໌ເຕັມ ລາວ ຈໍາກັດ.
