ເດັກນ້ອຍອິນໂດເນເຊຍພິການຂາລີບ ຍ່າງດ້ວຍມືໄປໂຮງຮຽນທຸກມື້
ນັກຮຽນຊັ້ນ ປ.3 ຊາວອິນໂດເນເຊຍເລີ່ມຕົ້ນການເດີນທາງໄປໂຮງຮຽນທຸກມື້ໂດຍພາຍກະເປົາ ແລະ ມືສອງເບື້ອງມີເກີບໃສ່ໄວ້ກັນຄວາມຮ້ອນຈາກພື້ນດິນ.
ສຳນັກຂ່າວ AFP ລາຍງານວ່າ: ຖືວ່າບໍ່ທຳມະດາສຳລັບເດັກອາຍຸພຽງ8 ປີ ຊື່ທ້າວ ມູຄລິສ ອັບດຸລ ໂຮລິດ ນັກຮຽນຊັັ້ນ ປ.3 ເຊິ່ງມີຮ່າງກາຍພິການຂາລີບ,ສູງພຽງເອວຂອງໝູ່ເມື່ອຢືນທຽບກັນ ອາໄສຢູ່ກັບແມ່ໃນບ້ານແຫ່ງໜຶ່ງແຂວງເວສຊະວາຂອງອິນໂດເນເຊຍ,ແຕ່ລາວຕ້ອງເດີນທາງໄປໂຮງຮຽນທຸກມື້ ຜ່ານເສັ້ນທາງທີ່ເປັນພູ ແລະ ຂົວ ດ້ວຍສອງມືທີ່ໃສ່ເກີບເອົາໄວ້ສຳລັບກັນຄວາມຮ້ອນຈາກພື້ນ,ຂະນະທີ່ຂາກໍມີເກີບໃສ່ຄືກັນ ແຕ່ລອຍຢູ່ກາງອາກາດ ພ້ອມກັບພາຍກະເປົາຢູ່ຫລັງ.
ເລື່ອງລາວການສູ້ຊີວິດຂອງທ້າວ ໂຮລິດ ເປັນທີ່ປະທັບໃຈຂອງຄົນໃນການເປັນຄົນສູ້ຊີວິດ ເຖິງວ່າຮ່າງກາຍຈະພິການ ກິນໃຈຄົນທົ່ວອິນໂດເນເຊຍທີ່ມີປະຊາກອນ 260 ລ້ານຄົນ ສົ່ງຜົນໃຫ້ທ້າວ ໂຮລິດ ໄດ້ມີໂອກາດເຂົ້າພົບປະທານາທິບໍດີ ໂຈໂຄ ວິໂດໂດ ຫລັງສື່ມວນຊົນໄດ້ນຳສະເໜີເລື່ອງຂອງລາວ ໂດຍສະເພາະເລື່ອງການເດີນທາງໄປໂຮງຮຽນທຸກມື້ ຈາກເຮືອນໄປໂຮງຮຽນໄປກັບຄິດໄລ່ໄລຍະທາງເກືອບ 6 ກິໂລແມັດ ໂດຍໃຊ້ສອງມືພາຕົນເອງເດີນທາງໄປ.
ທ້າວ ໂຮລິດ ໄດ້ມີໂອກາດພົບປະທານາທິບໍດີ ໂຈໂຄ ວິໂດໂດ ໃນວັນທີ 3 ທັນວາຜ່ານມາ ໃນວັນຄົນພິການສາກົນ ເຊິ່ງປະທານາທິບໍດີ ວິໂດໂດ ເປີດເຜີຍວ່າ: ທ່ານໄດ້ຖາມທ້າວ ໂຮລິດ ວ່າຢາກໄດ້ຫຍັງ ຫລື ບໍ່ ຈາກຜູ້ເປັນປະທານາທິບໍດີ ເຊິ່ງທ່ານຄິດວ່າ: ທ້າວ ໂຮລິດ ອາດຢາກໄດ້ຂອງຂວັນ, ແຕ່ຄຳຕອບຄືທ້າວ ໂຮລິດ ບໍ່ຕ້ອງການຫຍັງ, ລາວບອກພຽງວ່າ: ຕ້ອງການຮຽນເຖິງລະດັບມະຫາວິທະຍາໄລ ແລະ ມີຄວາມສຸກຫລາຍທີ່ໄດ້ພົບປະທານາທິບໍດີ ວິໂດໂດ ເຊິ່ງເປັນບຸກຄົນຕົ້ນແບບຂອງລາວ. ນອກຈາກນັ້ນ ທ້າວ ໂຮລິດ ຍັງມີຄວາມຝັນຫລາຍຢ່າງທີ່ບອກກັບປະທານາທິບໍດີ ວິໂດໂດ ວ່າ: ຢາກເປັນນັກມອດໄຟ, ເປັນໝໍ ແລະ ນັກບິນອະວະກາດ.
