ສະມັດຊາໃຫຍ່ ສປຊ ໃຫ້ສັດຕະຍາບັນ ຂໍ້ຕົກລົງຜູ້ອົບພະຍົບສະບັບໃໝ່
ສະມັດຊາໃຫຍ່ສະຫະປະຊາຊາດມີມະຕິ 152 ສຽງ ໃຫ້ສັດຕະຍາບັນຕໍ່ຂໍ້ຕົກລົງສາກົນ ວ່າດ້ວຍການໂຍກຍ້າຍຖິ່ນຖານທີ່ປອດໄພ, ເປັນລະບຽບ ແລະ ເປັນປົກກະຕິ (GCM) ໂດຍມີ 5 ປະເທດຄັດຄ້ານ ໜຶ່ງໃນນັ້ນຄືອາເມລິກາ.
ສຳນັກຂ່າວຕ່າງປະເທດລາຍງານວ່າ: ສະມັດຊາໃຫຍ່ສະຫະປະຊາຊາດ (UNGA) ມີມະຕິສຽງສ່ວນຫລາຍໃນການລົງມະຕິແບບເປີດເຜີຍໃນວັນທີ 19 ທັນວາ ດ້ວຍສຽງສ່ວນຫລາຍ 152 ປະເທດ ງົດອອກສຽງ 12 ປະເທດ ແລະ ຄັດຄ້ານ 5 ປະເທດ ໄດ້ແກ່ ອາເມລິກາ, ອິດສະລາແອນ, ຮົງກາລີ, ສາທາລະນະຊັດເຊັກ ແລະ ໂປໂລຍ ໃຫ້ສັດຕະຍາບັນຕໍ່ຂໍ້ຕົກລົງສາກົນ ວ່າດ້ວຍການໂຍກຍ້າຍຖິ່ນຖານທີ່ປອດໄພ, ເປັນລະບຽບ ແລະ ເປັນປົກກະຕິ (GCM) ແຕ່ອາທິດຜ່ານມາມີ 164 ປະເທດຮ່ວມລົງນາມຂໍ້ຕົກລົງດັ່ງກ່າວ ເຊິ່ງມີຊື່ເອີ້ນບໍ່ເປັນທາງການວ່າ: “ປະລິນຍາມາຣາເກດ” ຕາມສະຖານທີ່ຈັດກອງປະຊຸມ ຄືເມືອງມາຣາເກດ ໃນໂມຣັອກໂກ.
ທັງນີ້, ຂໍ້ຕົກລົງ GCM ເຊິ່ງບໍ່ມີຜົນຜູກພັນໃນທາງກົດໝາຍສາກົນ ລະບຸເນື້ອໃນສຳຄັນ 23 ຂໍ້ ເພື່ອເປັນແນວທາງຕອບສະໜອງດຽວກັນຂອງບັນດາລັດພາຄີໃນການໂຍກຍ້າຍຖິ່ນຖານ ແລະ ເຄື່ອນຍ້າຍຄັ້ງໃຫຍ່ຂອງຜູ້ອົບພະຍົບ ດ້ວຍເປົ້າໝາຍສຳຄັນ ຄືການຫລຸດອັດຕາການຂ້າມຊາຍແດນຢ່າງຜິດກົດໝາຍ ໂດຍລາຍງານຂອງອົງການສາກົນເພື່ອການໂຍກຍ້າຍຖິ່ນຖານ (IOM) ລະບຸສະຖິຕິການເຄື່ອນຍ້າຍຂ້າມຊາຍແດນຂອງຜູ້ອົບພະຍົບເພີ່ມຂຶ້ນເປັນເກືອບ 260 ລ້ານຄົນໃນປີນີ້ ຄິດເປັນ 3,4% ຂອງຊາກອນໂລກ, ເຖິງວ່າ 80% ຂອງຈຳນວນຜູ້ໂຍກຍ້າຍຖິ່ນຖານໃນສະຖິຕິດັ່ງກ່າວເປັນການດຳເນີນການຢ່າງຖືກກົດໝາຍ, ແຕ່ມີລາຍງານປະຊາຊົນຫລາຍກວ່າ 60.000 ຄົນຕ້ອງເສຍຊີວິດ ລະຫວ່າງຄວາມພະຍາຍາມຂ້າມຊາຍແດນດ້ວຍທາງບົກ ແລະ ທາງທະເລ ນັບແຕ່ປີ 2000 ຈົນເຖິງປັດຈຸບັນ.
