ເຊລຊີ-ສະເປີ ພ້ອມເປີດເສິກຍາດ ຮຸມເມິ່ລ ໜ້າໜາວນີ້
ເຊລຊີ ແລະ ທ໊ອດແນ່ມ ຮ໊ອດສະເປີ ສະໂມສອນແຫ່ງພຣີເມຍລີກ ຕົກເປັນຂ່າວວ່າຕ່າງພ້ອມຈະເດີນໜ້າຄວ້າ ມັດສ໌ ຮຸມເມິ່ລ ເຊັນເຕີຮາບ ບາເຢິນ ມິວນິກ ສະໂມສອນຍັກໃຫຍ່ແຫ່ງ ບຸນເດສລິກາ ມາເສີມທີມໃນຊ່ວງເປີດຕະຫລາດຊື້-ຂາຍນັກເຕະເດືອນມັງກອນນີ້.
ໜັງສືພິມບິລ ລະບຸວ່າ: ມາກ ໂຄຊິດເກ້ ເອເຢນຂອງ ຮຸມເມິ່ລ ໄດ້ເດີນທາງມານະຄອນຫລວງລອນດອນ ເພື່ອຫາລືເຖິງຄວາມເປັນໄປໄດ້ໃນການທີ່ນັກເຕະໄວ 30 ປີ ຈະຍ້າຍມາຫລິ້ນໃນອັງກິດ ຫລັງຈາກນັກເຕະບໍ່ມີຄວາມສຸກກັບການບໍ່ໄດ້ຮັບໂອກາດລົງສະໜາມເທົ່າທີ່ຄວນກັບ ບາເຢິນ ໃນລະດູການນີ້.
ເຖິງຢ່າງໃດກໍຕາມ, ຫລ້າສຸດ ຄາຣ໌ລ-ໄຮ ຣຸມເມນິກເກ້ ປະທານບໍລິຫານ ບາເຢິນ ຢືນຢັນວ່າ: ຮຸມເມິ່ລ ຈະຢູ່ກັບຕົ້ນສັງກັດຕໍ່ໄປຢ່າງໜ້ອຍຈົບລະດູການນີ້ ຫລັງດາວເຕະທີມຊາດເຢຍລະມັນ ຄວ້າແຊ້ມບຸນເດສລີກາມາແລ້ວ 2 ສະໄໝກັບ ບາເຢິນ ນັບແຕ່ຍ້າຍມາຈາກ ໂບຣຸສເຊຍ ດອດມຸນ ໃນປີ 2016.
