ມີຫລາຍບໍລິສັດສົນໃຈລົງທຶນດ້ານບໍ່ແຮ່ຢູ່ລາວ
ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ປັດຈຸບັນໄດ້ມີຫລາຍບໍລິສັດທັງພາຍໃນ ແລະ ຕ່າງປະເທດສົນໃຈລົງທຶນດ້ານບໍ່ແຮ່ຢູ່ລາວ ຄື: ມີ 35 ບໍລິສັດພວມຢູ່ໃນໄລຍະສ້າງບົດວິພາກເສດຖະກິດ-ເຕັກນິກ ແລະ ໃນຜ່ານມາ, ລັດຖະບານ ແລະ ອົງການປົກຄອງທ້ອງຖິ່ນໄດ້ອະນຸຍາດໃຫ້ບໍລິສັດຢູ່ພາຍໃນ ແລະ ຕ່າງປະເທດລົງທຶນໃນຂະແໜງບໍ່ແຮ່ມີ 718 ບໍລິສັດ, ໃນນີ້ຂັ້ນສູນກາງອະນຸມັດ 275, ສ່ວນທີ່ເຫລືອແມ່ນຂັ້ນທ້ອງຖິ່ນອະນຸມັດ ເຊິ່ງມີ 12 ປະເພດແຮ່ທີ່ມີການຂຸດຄົ້ນ, ໂດຍໂຄງການທີ່ມີຂະໜາດໃຫຍ່ແມ່ນໂຄງການຂຸດຄົ້ນຄຳ-ທອງເຊໂປນ ແຂວງສະຫວັນນະເຂດ, ໂຄງການຂຸດຄົ້ນຄຳ-ທອງພູເບ້ຍ ແຂວງໄຊສົມບູນ, ໂຄງການຂຸດຄົ້ນຄຳຢູ່ເມືອງຄຳເກີດ ແຂວງບໍລິຄຳໄຊ, ໂຄງການຂຸດຄົ້ນເກືອໂປຕາສ ຢູ່ແຂວງຄຳມ່ວນ ແລະ ໂຄງການຂຸດຄົ້ນຖ່ານຫີນສະໜອງໃຫ້ໂຮງງານໄຟຟ້າຄວາມຮ້ອນຢູ່ແຂວງໄຊຍະບູລີ. ຂະນະທີ່ມາຮອດດຽວນີ້ ຂະແໜງກ່ຽວຂ້ອງສາມາດພົບຈຸດປາກົດແຮ່ທາດຫລາຍກວ່າ 570 ຈຸດໃນຂອບເຂດ 162.100 ກວ່າກິໂລຕາແມັດ ເທົ່າກັບ 68% ຂອງເນື້ອທີ່ປະເທດ ເຊິ່ງປະກອບມີຄຳ, ທອງ, ເງິນ, ນິແກນ, ກົ່ວ, ຖ່ານຫີນ, ບົກຊິດ, ຫີນກາວ, ເຫລັກ, ແກ້ວ, ເກືອ, ເກືອໂປຕາສ, ຊືນ, ສັງກະສີ, ມັງການ, ຫີນປູນ, ຫີນໂດໂລໄມ, ບາລິດ ແລະ ແຮ່ອື່ນໆ.
ທ່ານລັດຖະມົນຕີ ກ່າວວ່າ: ແຮ່ທາດແມ່ນຂະແໜງການໜຶ່ງທີ່ສຳຄັນໃນລະບົບເສດຖະກິດຂອງຊາດ, ສ້າງລາຍຮັບສະເລ່ຍກວ່າ 150 ລ້ານໂດລາສະຫະລັດຕໍ່ປີ. ນອກນີ້ ໂຄງການລົງທຶນຕ່າງໆຍັງໄດ້ປະກອບສ່ວນເຂົ້າໃນການພັດທະນາທ້ອງຖິ່ນ, ພື້ນຖານໂຄງລ່າງ, ສ້າງວຽກເຮັດງານທຳໃຫ້ປະຊາຊົນ ແລະ ຍົກລະດັບການພັດທະນາຢູ່ຊົນນະບົດໃຫ້ກາຍເປັນຕົວເມືອງນ້ອຍເທື່ອລະກ້າວ.
