ເມສຊີ ຄວ້າລາງວັນເກີບຄຳສະໄໝທີ 5
ລິໂອເນລ ເມສຊີ ຫົວຫອກອາເຈນຕິນາຂອງ ບາເຊໂລນາ ຄວ້າລາງວັນເກີບຄຳ ເຊິ່ງເປັນສະໄໝທີ 5 ຂອງລາວ ຫລັງສ້າງຜົນງານຍິງປະຕູໄດ້ 34 ລູກເໜືອກວ່າ ໂມ ຊາລາ ດາວເຕະຂອງ ລິເວີພູລ ທີ່ຍິງໃນພຣີເມຍລີກໜ້ອຍກວ່າພຽງແຕ່ 2 ປະຕູ.
ລິໂອເນລ ເມສຊີ ກອງໜ້າອັດສະລິຍະບາເຊໂລນາ ຄວ້າລາງວັນເກີບຄຳ ຫລື ດາວຊັລໂວລີກຢູໂຣບ ເປັນສະໄໝທີ 5 ຫລັງຍິງປະຕູໄດ້ໃນການຫລິ້ນ ລາ ລີກາ ສະເປນ ເໜືອກວ່າຜົນງານຂອງ ໂມຮາເໝັດ ຊາລາ ດາວເຕະຈາກ ລິເວີພູລ ໃນພຣີເມຍລີກ ອັງກິດ.
ຫົວຫອກຊາວອາເຈນຕິນາ ໄດ້ຮັບລາງວັນອັນຊົງກຽດດັ່ງກ່າວຈາກການຍິງປະຕູໄດ້ຫລາຍທີ່ສຸດຈຳນວນ 34 ປະຕູໃນເກມລີກສະເປນ ໂດຍສູງທີ່ສຸດໃນລີກບານເຕະເອີຣົບເມື່ອລະດູການຜ່ານມາ ແຊງໜ້າ ໂມ ຊາລາ (32 ປະຕູ) ແລະ ແຮຣີ ແຄນ ຫົວຫອກທ໊ອດແນ່ມ ຮ໊ອດສະເປີ (30 ປະຕູ).
ເມສຊີ ເຊິ່ງເຄີຍໄດ້ຮັບລາງວັນນີ້ມາແລ້ວ 4 ຄັ້ງກ່ອນໜ້ານີ້ໃນລະດູການ 2009-10 (34 ປະຕູ), 2011-12 (50 ປະຕູ), 2012-13 (46 ປະຕູ) ແລະ 2016-17 (37 ປະຕູ) ໄດ້ເດີນທາງມາຮ່ວມງານ ທີ່ຈັດຂຶ້ນຢູ່ເມືອງບາເຊໂລນາ ໂດຍມີ ເຊຄິໂອ ບຸສເກດ ແລະ ເຊຄິໂອ ໂຣແບຣໂຕ້ ເພື່ອນຮ່ວມສັງກັດຢູ່ໃນງານນຳ.
