ທະນາຄານ ລາວ-ຫວຽດ ເປີດສາຂາໃໝ່ ທີ່ແຂວງບໍລິຄຳໄຊ
ພິທີເປີດສາຂາໃໝ່ຂອງທະນາຄານ ລາວ-ຫວຽດ ທີ່ແຂວງບໍລິຄຳໄຊໄດ້ມີຂຶ້ນໃນວັນທີ 12 ທັນວາຜ່ານມານີ້ ໂດຍການເຂົ້າຮ່ວມຂອງຄະນະນຳແຂວງບໍລິຄຳໄຊແລະ ຄະນະອຳນວຍການຂອງທະນາຄານດັ່ງກ່າວ ພ້ອມດ້ວຍມວນຊົນຊາວເມືອງປາກຊັນເຂົ້າຮ່ວມເປັນຈຳນວນຫລາຍ.
ການເປີດສາຂາດັ່ງກ່າວກໍເພື່ອແນໃສ່ຕອບສະໜອງຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມຂອງແຂວງບໍລິຄຳໄຊທີ່ນັບມື້ຂະຫຍາຍຕົວ ໂດຍສະເພາະແມ່ນແນໃສ່ໃຫ້ແກ່ປະຊາຊົນ ແລະ ບັນດາຫົວໜ່ວຍທຸລະກິດຕ່າງໆສາມາດເຂົ້າເຖິງການບໍລິການຂອງທະນາຄານມີຄວາມສະດວກດີຂຶ້ນກວ່າເກົ່າ.
ທ່ານ ຟ້າມ ກວັກ ກົງ ຮອງຜູ້ອຳນວຍການໃຫຍ່ LaoVietBank ໃຫ້ຮູ້ວ່າ: ທະນາຄານຮ່ວມທຸລະກິດ ລາວ-ຫວຽດ ໄດ້ຮັບການສ້າງຕັ້ງຂຶ້ນໃນປີ 1999 ພາຍໃຕ້ການຊີ້ນຳຂອງສອງພັກ, ລັດຖະບານ ແລະ ປະຊາຊົນສອງຊາດ ລາວ-ຫວຽດນາມ ໂດຍການຮ່ວມມືລະຫວ່າງທະນາຄານການຄ້າຕ່າງປະເທດລາວ ມະຫາຊົນ (BCEL) ແລະ ທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ (BIDV) ເພື່ອແນໃສ່ເຊື່ອມໂຍງການຮ່ວມມືເສດຖະກິດ ແລະ ການພົວພັນສາມັກຄີມິດຕະພາບພິເສດອັນເປັນມູນເຊື້ອລະຫວ່າງສອງຊາດລາວ ແລະ ຫວຽດນາມ. ພາຍຫລັງ 19 ປີ ແຫ່ງການເຕີບໃຫຍ່ຂະຫຍາຍຕົວ, ປັດຈຸບັນ LaoVietBank ໄດ້ພັດທະນາຢ່າງເຂັ້ມແຂງດ້ານເຄືອຂ່າຍ ແລະ ປະສິດທິຜົນຂອງການເຄື່ອນໄຫວ, ກາຍເປັນໜຶ່ງໃນບັນດາສະຖາບັນການເງິນຢູ່ໃນແຖວໜ້າຂອງ ສປປ ລາວ ແລະ ໄດ້ປະກອບສ່ວນຢ່າງໃຫຍ່ຫລວງເຂົ້າໃນການພັດທະນາເສດຖະກິດ-ສັງຄົມຂອງສອງປະເທດ. ພ້ອມກັນນັ້ນ ກໍເປັນການສ້າງໂອກາດໃນການດຳເນີນທຸລະກິດ, ຂະຫຍາຍເຄືອຂ່າຍທຸລະກິດ ແລະ ການພັດທະນາຢູ່ເຂດທ້ອງຖິ່ນໄດ້ເຕີບໃຫຍ່ເຂັ້ມແຂງ.
