ກະຊວງສຶກສາຮັບຮອງຮ່າງດໍາລັດວ່າດ້ວຍການຮຽນຮູ້ຕະຫຼອດຊີວິດ

    ໃນວັນທີ 14 ທັນວານີ້, ກະຊວງສຶກສາທິການ ແລະ ກິລາ, ໄດ້ຈັດກອງປະຊຸມຜ່ານແລະ ຮັບຮອງ ເອົາຮ່າງດໍາລັດວ່າດ້ວຍ ການຮຽນຮູ້ຕະຫຼອດຊີວິດ, ໂດຍການເປັນປະທານຂອງທ່ານຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ມີຜູ້ອໍານວຍການ ຫ້ອງການຮ່ວມມືນາໆຊາດເພື່ອການສຶກສາຜູ້ໃຫຍ່ຂອງເຢຍລະມັນ,ພ້ອມດ້ວຍຮອງເຈົ້າແຂວງ ແລະ ຫົວໜ້າພະແນກສຶກສາທິການ ແລະ ກິລາ ທົ່ວປະເທດ ເຂົ້າຮ່ວມຢ່າງພ້ອມພຽງ.

ກອງປະຊຸມຍັງເປັນໂອກາດໃຫ້ບັນດາຜູ້ແທນໄດ້ປະກອບຄໍາຄິດຄໍາເຫັນ ເຂົ້າໃນຮ່າງດໍາລັດດັ່ງກ່າວໃຫ້ມີເນື້ອຄົບຖ້ວນສົມບູນ ເພື່ອຈະນໍາສະເໜີ ຂໍອະນຸມັດຈາກຂັ້ນເທິງຕາມຂັ້ນຕອນ ແລະ ແຜນການທີ່ໄດ້ວາງອອກ.

ໂອການີ້, ທ່ານ ຄໍາຜາຍ ສີສະຫວັນ ໄດ້ມີຄໍາເຫັນວ່າ: ກອງປະຊຸມຄັ້ງນີ້, ແມ່ນມີຄວາມໝາຍສໍາຄັນຫຼາຍໃນການບັນລຸເປົ້າໝາຍການພັດທະນາແບບຍືນຍົງ SDGs ໂດຍສະເພາະແມ່ນເປົ້າ ໝາຍທີ 4 ແລະ ຂອບພັດທະນາຂະແໜງການສຶກສາ ແລະ ແຜນຍຸດທະສາດການປະຕິຮູບລະບົບການສຶກສາແຫ່ງຊາດໄລຍະ 2. ການຮຽນຮູ້ຕະຫຼອດຊີວິດ ແມ່ນການປະສົມປະສານລະຫວ່າງການສຶກສາໃນໂຮງຮຽນ, ນອກໂຮງຮຽນ ແລະ ການຮຽນຮູ້ຕາມອັດຕະຍາໄສ ເພື່ອສົ່ງເສີມໃຫ້ທຸກຄົນ ໄດ້ຮັບການຮຽນຮູ້ຕະຫຼອດຊີວິດ ເພື່ອສ້າງສັງຄົມພູມປັນຍາຕາມຄວາມຮຽກຮ້ອງຕ້ອງການຂອງການພັດທະນາ ແລະ ທັງເປັນການປະກອບສ່ວນທີ່ສໍາຄັນເຂົ້າໃນລະບົບການສຶກສາແຫ່ງຊາດ, ເຊິ່ງເປັນໃຈກາງຂອງການພັດທະນາຊັບພະຍາກອນມະນຸດ.

ຮ່າງດໍາລັດວ່າດ້ວຍການຮຽນຮູ້ຕະຫຼອດຊີວິດ ໄດ້ກໍານົດຫຼັກການກ່ຽວກັບການຈັດຕັ້ງ, ການຄຸ້ມຄອງ, ຕິດຕາມ, ກວດກາ, ຊຸກຍູ້ ແລະ ສົ່ງເສີມວຽກງານຮຽນຮູ້ຕະຫຼອດຊີວິດຢູ່ລາວ ເພື່ອເຮັດໃຫ້ການຈັດຕັ້ງການຮຽນການສອນ, ການປະເມີນ, ການຮັບຮູ້ ແລະ ຢັ້ງຢືນຮັບຮອງ, ການທຽບ ແລະ ການໂອນ ຜົນການຮຽນທີ່ໄດ້ຈາກການຮຽນຮູ້ຢູ່ໃນໂຮງຮຽນ, ນອກໂຮງຮຽນ ແລະ ການຮຽນຮູ້ຕາມອັດຕະຍາໄສ ໃຫ້ມີຄວາມເປັນເອກະພາບ ແລະ ຄຸນນະພາບ ເຮັດໃຫ້ພົນລະເມືອງລາວທຸກຄົນ ໄດ້ຮັບໂອກາດຍົກລະດັບການສຶກສາ, ຄວາມຮູ້, ຄວາມສາມາດ ທາງດ້ານວິຊາຊີບ ແລະ ຄຸນສົມບັດສິນທໍາປະຕິວັດ ຂອງຜົນລະເມືອງສາມາດປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ສາມາດເຊື່ອມໂຍງກັບພາກພື້ນ ແລະ ສາກົນໄດ້.