ແຂວງຫຼວງພະບາງຈັດງານຂີ່ລົດຖີບລົດລຸດຜ່ອນມົນລະພິດ ສະເຫຼີມສະຫຼອງປີທ່ອງທ່ຽວລາວ 2018
ເຊົ້າວັນທີ 15 ທັນວານີ້, ແຂວງຫຼວງພະບາງ ໄດ້ຈັດງານຂີ່ລົດຖີບຫຼຸດຜ່ອນມົນລະຜິດດ້ານສິ່ງແວດລ້ອມ ແລະ ຂັບຂີ່ປອດໄພ ກິດຈະກຳສຸດທ້າຍຂອງການສະເຫຼີມສະຫຼອງປີທ່ອງທ່ຽວລາວ 2018 ຢູ່ແຂວງຫຼວງພະບາງ ໂດຍມີທ່ານ ສຸກັນ ບຸນຍົງ ເຈົ້ານະຄອນຫຼວງພະບາງ ພ້ອມດ້ວຍຜູ້ຕາງໜ້າກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ມວນຊົນເຂົ້າຮ່ວມເປັນຈຳນວນຫລາຍ.
ທ່ານ ສຸກັນ ບຸນຍົງ ມີຄຳເຫັນວ່າ: ການຈັດງານຄັ້ງນີ້ ເພື່ອເປັນການໂຄສະນາດຶງດູດເອົານັກທ່ອງທ່ຽວເຂົ້າມາທ່ອງທ່ຽວຫຼວງພະບາງໃຫ້ຫລາຍຂຶ້ນ ທັງປະກອບສ່ວນຮັກສາສິ່ງແວດລ້ອມໃນຕົວເມືອງ, ທັງເປັນການປຸກລະດົມໃຫ້ປະຊາຊົນຊາວຫຼວງພະບາງຫັນມາໃສ່ໃຈໃນການຮັກສາສິ່ງແວດລ້ອມ ພ້ອມກັນຂີ່ລົດຖີບເພື່ອສຸຂະພາບ ແລະ ການຂັບຂີ່ທີ່ປອດໄພຕາມທ້ອງຖະໜົນ.
ການຂີ່ລົດຖີບໃນຄັ້ງນີ້ມີໄລຍະທາງປະມານ 6.000 ກວ່າແມັດ ໄດ້ເລີ່ມຈາກໜ້າສຳນັກງານທ່ອງທ່ຽວຂອງແຂວງໄປຕາມເສັ້ນທາງສີສະຫວ່າງວົງ, ເສັ້ນທາງໄກສອນ ພົມວິຫານ, ເສັ້ນທາງສຸພານຸວົງ, ເສັ້ນທາງແຄມນ້ຳຄານ ແລ້ວກັບຄືນສູ່ສຳນັກງານທ່ອງທ່ຽວ ເພື່ອຈັດກິດຈະກຳຖາມຕອບຄວາມຮູ້ດ້ານການທ່ອງທ່ຽວອີກດ້ວຍ.
