ນັກກິລາເພາະກາຍລາວຄວ້າ ອັນດັບ 3 ແລະ 4 ຊີງແຊ້ມໂລກ 2018

     ນັກກິລາເພາະກາຍທີມຊາດລາວ ສາມາດສ້າງປະຫວັດສາດ ແລະ ຜົນງານອັນໃຫມ່ໃນເວທີລະດັບສາກົນ ດ້ວຍການຄວ້າອັນດັບ 3 ແລະ ອັນດັບ 4 ການແຂ່ງຂັນເພາະກາຍຊີງແຊ້ມໂລກ ຄັ້ງທີ 10 (10th WBPF World Bodybuilding and Physique Sports Championship 2018) ໃນວັນທີ 11-17 ທັນວານີ້ ທີ່ຊຽງໃຫມ່ ປະເທດໄທ.

       ການແຂ່ງຂັນຄັ້ງນີ້ ມີນັກກິລາຈາກ 51 ປະເທດເຂົ້າຮ່ວມ, ສະເພາະສະຫະພັນກິລາເພາະກາຍແຫ່ງຊາດລາວ ສົ່ງນັກກິລາເຂົ້າຮ່ວມ 4 ຄົນ (ຊາຍ 3 ຍິງ 1) ຮ່ວມແຂ່ງຂັນ 5 ລາຍການ, ສາມາດຄວ້າອັນດັບ 3 (ຫລຽນທອງ) ຈາກນາງ ພອຍໄພລິນ ພັນທະລີ ລາຍການ Women’s Model Physique ຄວາມສູງ 160 ຊັງຕີແມັດ, ຫລຽນຄຳເປັນຂອງນັກກິລາຈາກໄທເຈົ້າພາບ, ຫລຽນເງິນນັກກິລາຈາກມົງໂກລີ.

       ຂະນະທີ່ ທ້າວ ສັນຕິສຸກ ດວງແກ້ວມະນີ ໄດ້ອັນດັບທີ 4 ລາຍການ Men’s Sport Physique ຄວາມສູງ 175 ຊັງຕີແມັດ, ຫລຽນຄຳເປັນຂອງນັກກິລາຈາກໄທເຈົ້າພາບ, ຫລຽນເງິນນັກກິລາຈາກນິວຄາເລໂດເນຍ (New Caledonia) ແລະ ຫລຽນທອງນັກກິລາຈາກ ສປ ຈີນ.