ຈະເປີດນຳໃຊ້ໂຄງການ Smart VAT2ທີ່ຂົວມິດຕະພາບ 1 ໃນທ້າຍເດືອນທັນວານີ້
ວັນທີ 12 ທັນວານີ້,
ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ລົງຕິດຕາມຄວາມຄືບໜ້າການພັດທະນາລະບົບການຈັດເກັບຄ່າທຳນຽມຜູ້ໂດຍສານ
ແລະ ພາຫະນະແບບເອເລັກໂຕຣນິກ (Smart VAT ໃນໄລຍະທີ 2) ທີ່ດ່ານສາກົນຂົວມິດຕະພາບ 1 ນະຄອນຫລວງວຽງຈັນ-ໜອງຄາຍ ລາຊະອານາຈັກໄທ, ມີທ່ານຮັກສາການຫົວໜ້າກົມພາສີ, ຫົວໜ້າກອງຄຸ້ມຄອງພາສີເຂດ V, ຫົວໜ້າດ່ານພາສີສາກົນຂົວມິດຕະພາບ 1 ພ້ອມດ້ວຍພະນັກງານວິຊາການກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ໂອກາດນີ້, ທ່ານຮອງລັດຖະມົນຕີກະຊວງການເງິນ ໄດ້ຮັບຟັງການລາຍງານໂດຍສັງເຂບກ່ຽວກັບຄວາມຄືບໜ້າໂຄງການພັດທະນາລະບົບການຈັດເກັບຄ່າທຳນຽມຜູ້ໂດຍສານ ແລະ ພາຫະນະແບບເອເລັກໂຕຣນິກ ທີ່ດ່ານພາສີສາກົນດັ່ງກ່າວ ຈາກຮອງອຳນວຍການທະນາຄານການຄ້າຕ່າງປະເທດລາວ ມະຫາຊົນ (ທຄຕລ) (ຜູ້ພັດທະນາລະບົບ) ຊຶ່ງມາຮອດປັດຈຸບັນລະບົບດັ່ງກ່າວໄດ້ສຳເລັດເກືອບຮ້ອຍສ່ວນຮ້ອຍ ໂດຍສະເພາະການຕິດຕັ້ງຕູ້ບໍລິການອັດຕະໂນມັດ (KIOSK) ຈຳນວນ 10 ເຄື່ອງທັງຂາເຂົ້າ-ຂາອອກ ເພື່ອຄິດໄລ່ຮັບຄ່າຊໍາລະຄ່າທຳນຽມສຳລັບຜູ້ໂດຍສານ ແລະ ພາຫະນະທີ່ເດີນທາງເຂົ້າ-ອອກ ສປປ ລາວ ຜ່ານດ່ານດັ່ງກ່າວ ແລະ ມີຄວາມພ້ອມ 100% ທີ່ຈະເປີດນຳໃຊ້ຢ່າງເປັນທາງການໃນວັນທີ 19 ທັນວານີ້.
ໂຄງການ Smart VAT2 ເປັນໂຄງການສືບຕໍ່ຈາກຜົນສໍາເລັດໂຄງການພັດທະນາລະບົບການຈັດເກັບອາກອນມູນຄ່າເພີ່ມ 10% (Smart VAT ໄລຍະທີ 1) ແນໃສ່ການຈັດເກັບລາຍຮັບຈາກຄ່າທຳນຽມຜູ້ໂດຍສານ-ພາຫະນະຂາເຂົ້າ-ຂາອອກ ແລະ ຄ່າທຳນຽມອື່ນໆທີ່ເດີນທາງເຂົ້າ-ອອກປະເທດ, ທັງເປັນການຫຼຸດຜ່ອນຂັ້ນຕອນເຮັດວຽກບໍລິການຕ່າງໆຂອງເຈົ້າໜ້າທີ່ ແລະ ຜູ້ໂດຍສານເຂົ້າ-ອອກມີຄວາມວ່ອງໄວຂຶ້ນໃນການຊໍາລະຄ່າທໍານຽມຕ່າງໆ ແລະ ຊ່ວຍຫຼຸດຜ່ອນຄວາມແອອັດ ເຮັດໃຫ້ການເກັບເງິນເຂົ້າງົບປະມານຄົບຖ້ວນ, ໂປ່ງໃສ ແລະ ໄດ້ຮັບຄວາມເຊື່ອໝັ້ນຈາກສັງຄົມ.
ໂຄງການດັ່ງກ່າວເປັນການຫັນເອົາຄວາມທັນສະໄໝເຂົ້າໃນວຽກງານການຈັດເກັບລາຍຮັບຂອງຂະແໜງພາສີໃຫ້ມີຄວາມຖືກຕ້ອງ ແລະ ສາມາດກວດສອບໄດ້. ສຳລັບການຊໍາລະຄ່າທຳນຽມດັ່ງກ່າວມຄື: ໜັງສືຜ່ານແດນຂອງຜູ້ໂດຍສານ 10.000 ກີບ/ປີ້, ປຶ້ມອະນຸຍາດຂົນສົ່ງລະຫວ່າງປະເທດ 10.000 ກີບ/ປີ້ ສາມາດຊໍາລະຜ່ານ 3 ທາງເລືອກຄື: ປ່ອງບໍລິການຂອງ ທຄຕລ ຜ່ານ 5 ຈຸດບໍລິການຄື: ສໍານັກງານໃຫຍ່, ໜ່ວຍບໍລິການຂົວມິດຕະພາບ, ຈອມເພັດ, ໜອງໄຮ ແລະ ໜ່ວຍບໍລິການທ່ານາແລ້ງ; ຊໍາລະຜ່ານ App BCEL One ແລະ ຕູ້ບໍລິການເກັບຄ່າທໍານຽມແບບອັດຕະໂນມັດ (KIOSK) ທີ່ດ່ານພາສີສາກົນຂົວມິດຕະພາບ 1 ໄດ້ທຸກເວລາ.
