ເນປານເຜີຍມີນັກທ່ອງທ່ຽວມາທ່ຽວ ປີລະ 1 ລ້ານຄົນເປັນເທື່ອທຳອິດ
ການທ່ອງທ່ຽວເນປານ ເປີດເຜີຍຕົວເລກນັກທ່ອງທ່ຽວຕ່າງປະເທດທີ່ເດີນທາງມາທ່ອງທ່ຽວໃນປີນີ້ ໂດຍເປັນເທື່ອທຳອິດໃນປະຫວັດສາດທີ່ມີນັກທ່ອງທ່ຽວເດີນທາງເຂົ້າມາທ່ຽວປີລະກວ່າ 1 ລ້ານຄົນ.
ການທ່ອງທ່ຽວເນປານ ລະບຸວ່າ: ໃນໄລຍະເດືອນມັງກອນຫາເດືອນພະຈິກປີນີ້, ເນປານມີນັກທ່ອງທ່ຽວຕ່າງປະເທດເດີນທາງເຂົ້າມາທ່ອງທ່ຽວຈຳນວນເຖິງ 1.001.930 ຄົນ ເພີ່ມຂຶ້ນ 17% ຈາກໄລຍະດຽວກັນຂອງປີ 2017 ເຊິ່ງມີນັກທ່ອງທ່ຽວຕ່າງປະເທດມາທ່ຽວ 940.218 ຄົນ, ແຕ່ຕົວເລກດັ່ງກ່າວຍັງບໍ່ລວມນັກທ່ອງທ່ຽວຕ່າງປະເທດທີ່ເດີນທາງເຂົ້າມາໂດຍທາງບົກໃນໄລຍະເດືອນຕຸລາຫາເດືອນພະຈິກປີນີ້. ລາຍງານລະບຸວ່າ: ນັກທ່ອງທ່ຽວສ່ວນຫລາຍທີ່ເດີນທາງມາເນປານ ເປັນນັກທ່ອງທ່ຽວຈາກອິນເດຍ ແລະ ຈີນ ໂດຍໄລຍະ 11 ເດືອນຂອງປີນີ້ ມີນັກທ່ອງທ່ຽວຈາກອິນເດຍເຂົ້າມາທ່ຽງ 260.124 ຄົນ ແລະ ນັກທ່ອງທ່ຽວຈາກຈີນ 134.362 ຄົນ. ທັງອິນເດຍ ແລະ ຈີນຖືເປັນຕະຫລາດໃຫຍ່ສຳລັບການທ່ອງທ່ຽວເນປານ ຮອງລົງມາໄດ້ແກ່ອາເມລິກາ, ອັງກິດ ແລະ ເຢຍລະມັນ.
