ສປປ ລາວສະໜັບສະໜູນຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ເພື່ອເຊື່ອມຈອດສາກົນ.

ໃນໂອກາດເຂົ້າຮ່ວມກອງປະຊຸມເວທີປືກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງໜຶ່ງເສັ້ນທາງ” ລະຫວ່າງວັນທີ 14-15 ພຶດສະພານີ້, ທີ່ ສປຈີນ ຂອງທ່ານປະທານປະເທດ ບຸນຍັງ ວໍລະຈິດ ແລະ ໄດ້ມີຄໍາປາໄສຕໍ່ທີ່ປະຊຸມໃນຫົວຂໍ້: “ ການຮ່ວມມືດ້ານການເຊື່ອມຈອດເພື່ອການພັດທະນາທີ່ຕິດຈອດ” ວ່າ: ໃນຍຸກແຫ່ງການເຊື່ອມໂຍງພາກພື້ນ ແລະ ສາກົນຄືດັ່ງປັດຈຸບັນນີ້, ການຮ່ວມມືດ້ານການພັດທະນາແມ່ນສິ່ງຈຳເປັນ ແລະ ມີການເພິ່ງພາອາໄສເຊິ່ງກັນ ແລະ ກັນ. ດ້ວຍເຫດນີ້ການເຊື່ອມຈອດຈຶ່ງມີບົດບາດສຳຄັນໃນການສ້າງເງື່ອນໄຂໃຫ້ແກ່ການພັດທະນາທີ່ຕິດຈອດກັນ, ການພັດທະນາທີ່ມີຄວາມຍືນຍົງ ແລະ ຮັບປະກັນຜົນປະໂຫຍດດ້ານເສດຖະກິດ-ສັງຄົມ.

ການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ທີ່ລວມທັງການສົ່ງເສີມການພັດທະນາ, ສັນຕິພາບ ແລະ ການເຊື່ອມຈອດດ້ານພື້ນຖານໂຄງລ່າງ ແລະ ການໄປມາຫາສູ່ກັນຂອງປະຊາຊົນມີຄວາມສຳຄັນຍິ່ງ ແລະ ເປັນການປະກອບສ່ວນສຳຄັນເຂົ້າໃນຄວາມພະຍາຍາມຂອງບັນດາປະເທດ, ພາກພື້ນ ແລະ ສາກົນໃນການພັດທະນາການເຊື່ອມຈອດໂຄງລ່າງເຊັ່ນ: ການຄົມມະນາຄົມໃນຮູບແບບຕ່າງໆ ເປັນຕົ້ນ: ທາງບົກ, ທາງອາກາດ ແລະ ທາງນ້ຳ, ການເຊື່ອມຈອດທາງດ້ານສະຖາບັນການເງິນ ແລະ ລະບົບກົນໄກການເຊື່ອມຈອດຕ່າງໆ ລວມທັງການສົ່ງເສີມແລກປ່ຽນການໄປມາຫາສູ່ເຊິ່ງກັນ ແລະ ກັນລະຫວ່າງປະຊາຊົນ, ອັນຈະເປັນການສ້າງເງື່ອນໄຂສະດວກໃຫ້ແກ່ການພັດທະນາເສດຖະກິດ-ສັງຄົມ, ການຄ້າ, ການລົງທຶນ ກໍຄືການຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ເພື່ອບັນລຸເປົ້າໝາຍດັ່ງກ່າວ, ໃນກອບອາຊຽນພວກເຮົາໄດ້ຮັບຮອງເອົາຍຸດທະສາດ ແລະ ມາດຕະການຫລາຍຢ່າງ ຄື: ແຜນແມ່ບົດການເຊື່ອມຈອດອາຊຽນ 2025, ແຜນປະຕິບັດງານການເຊື່ອມໂຍງອາຊຽນສະບັບທີ 3 ແລະ ອື່ນໆ. ສຳລັບ ສປປ ລາວ ເຊິ່ງເປັນປະເທດບໍ່ມີຊາຍແດນຕິດທະເລ, ໄດ້ຖືເອົາການເຊື່ອມຈອດເປັນບູລິມະສິດໜຶ່ງໃນການພັດທະນາປະເທດຂອງຕົນ ໂດຍໄດ້ດຳເນີນນະໂຍບາຍຫັນຈາກປະເທດທີ່ບໍ່ມີຊາຍແດນຕິດທະເລເປັນປະເທດເຊື່ອມຈອດ ໂດຍສຸມໃສ່ພັດທະນາລະບົບພື້ນຖານໂຄງລ່າງ ເພື່ອເຊື່ອມຈອດພາຍໃນປະເທດໃຫ້ທົ່ວເຖິງ ແລະ ລະຫວ່າງ ສປປ ລາວ ກັບປະເທດໃກ້ຄຽງ ເຊັ່ນ: ສ້າງ ແລະ ປັບປຸງຖະໜົນຫົນທາງ, ຂະຫຍາຍຕາໜ່າງການບິນ, ພັດທະນາການເດີນເຮືອຕາມລຳແມ່ນ້ຳຂອງ, ກໍ່ສ້າງເສັ້ນທາງລົດໄຟຈາກຊາຍແດນ ສປ ຈີນຫານະຄອນຫລວງວຽງຈັນ ເພື່ອເຊື່ອມຈອດກັບເສັ້ນທາງລົດໄຟຂອງປະເທດໃກ້ຄຽງ, ພ້ອມທັງມີການສຶກສາເພື່ອຂະຫຍາຍຕາໜ່າງເສັ້ນທາງລົດໄຟໃຫ້ກວ້າງຂວາງຫລາຍຂຶ້ນ.

ນອກຈາກນັ້ນ, ສປປ ລາວ ກໍໄດ້ມີການຮ່ວມກັບປະເທດໃກ້ຄຽງໃນການສ້າງແລວເສດຖະກິດຕາເວັນອອກ-ຕາເວັນຕົກ, ແລວເສດຖະກິດເໜືອ-ໃຕ້ ເພື່ອຕິດຈອດກັບປະເທດໃກ້ຄຽງ, ແນໃສ່ພັດທະນາລະບົບຄົມມະນາຄົມໃຫ້ສະດວກດີ, ທັງມີການຂະຫຍາຍລະບົບຕາຂ່າຍໄຟຟ້າເພື່ອສະໜອງພະລັງງານໃຫ້ແກ່ປະເທດໃນອະນຸພາກພື້ນ.

ໂດຍລວມແລ້ວ, ການຮ່ວມມືການເຊື່ອມຈອດຈະພາໄປສູ່ການພັດທະນາທີ່ຕິດພັນກັນ ແລະ ຈະກາຍເປັນລະບົບທີ່ກົມກຽວກັນ, ອັນຈະເປັນການຮັບປະກັນໃຫ້ແກ່ການພັດທະນາແບບຍືນຍົງ, ບົນຈິດໃຈດັ່ງກ່າວ, ສປປ ລາວ ຕີລາຄາສູງຕໍ່ຄວາມສຳຄັນ ແລະ ສະໜັບສະໜູນຍຸດທະສາດ “ໜຶ່ງແລວທາງໜຶ່ງເສັ້ນທາງ” ພ້ອມທັງກຽມພ້ອມເຂົ້າຮ່ວມການຈັດຕັ້ງປະຕິບັດບັນດາກິດຈະກຳ ແລະ ໂຄງການຕ່າງໆຕາມຄວາມສາມາດຂອງຕົນເພື່ອນຳຜົນປະໂຫຍດມາສູ່ພາກພື້ນ ແລະ ສົ່ງເສີມການເຊື່ອມຈອດກັນຂອງບັນດາປະເທດຕາມແລວທາງ. ຂ້າພະເຈົ້າຫວັງຢ່າງຍິ່ງວ່າການຈັດຕັ້ງປະຕິບັດຂໍ້ລິເລີ່ມນີ້, ບັນດາປະເທດດ້ອຍພັດທະນາກໍຄືປະເທດທີ່ບໍ່ມີຊາຍແດນຕິດກັບທະເລຈະໄດ້ຮັບການສະໜັບສະໜູນ ແລະ ຮ່ວມມືຈາກບັນປະເທດທີ່ມີທ່າແຮງ ກໍຄືອົງການຈັດຕັ້ງສາກົນຕ່າງໆຫລາຍຂື້ນຕື່ມໃນການພັດທະນາລະບົບເຊື່ອມຈອດຕ່າງໆ.