ລັດຖະມົນຕີ ກະຊວງ ຖວທ ເຂົ້າຮ່ວມກອງປະຊຸມເວທີປຶກສາຫາລື ການທ່ອງທ່ຽວສາກົນ 2018 ທີ່ຮົງກົງ ສປ ຈີນ
ປະຕິບັດຕາມການເຊື້ອເຊີນຂອງເຂດປົກຄອງພິເສດຮົງກົງສປ ຈີນ, ຄະນະຜູ້ແທນ ສປປ ລາວ ນໍາໂດຍທ່ານ ບໍ່ແສງຄໍາ ວົງດາລາລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເວທີປຶກສາຫາລືດ້ານການທ່ອງທ່ຽວສາກົນ2018ຈັດຂຶ້ນທີ່ເຂດປົກຄອງພິເສດຮົງກົງ ໃນລະຫວ່າວັນທີ 11-13 ທັນວານີ້.
ພາຍໃຕ້ການເປັນປະທານຂອງທ່ານ ນາງ ແຄຣີແລັມເຈັງ (Carrie Lam Cheng) ປະທານຜູ້ບໍລິຫານຄຸ້ມຄອງເຂດປົກຄອງພິເສດຮົງກົງ ແລະ ມີບັນດາຜູ້ຕາງໜ້າຂັ້ນສູງຈາກປະເທດຕ່າງໆ ໃນພາກພື້ນອາຊີ-ປາຊີຟິກ ແລະ ພາກສ່ວນທຸລະກິດເຂົ້າຮ່ວມເປັນຈໍານວນຫລວງຫລາຍ.
ກອງປະຊຸມຄັ້ງນີ້, ໄດ້ຮັບຟັງການບັນຍາຍຈາກນັກວິທະຍາກອນຫລາຍພາກສ່ວນ ທັງພາກລັດ ແລະ ເອກະຊົນກ່ຽວກັບການເຊື່ອມໂຍງຂໍ້ລິເລີ່ມໜຶ່ງແລວໜຶ່ງເສັ້ນທາງເຂົ້າໃນວຽກງານການພັດທະນາການທ່ອງທ່ຽວສາກົນ ແລະ ຍູ້ແຮງສາຍພົວພັນການພັດທະນາເຂດອ່າວທະເລກວາງຕຸງ, ຮົງກົງ, ມາເກົາ ເຊື່ອມໂຍງກັບການທ່ອງທ່ຽວພາກພື້ນ ແລະ ສາກົນ.
ໃນໂອກາດນີ້, ຄະນະຜູ້ແທນຂອງລາວ ໄດ້ພົບປະສອງຝ່າຍກັບກະຊວງວັດທະນະທໍາ ແລະ ທ່ອງທ່ຽວ ຂອງ ສປ ຈີນ ເພື່ອສະຫລຸບການຮ່ວມມືໃນໄລຍະຜ່ານມາ ໃນຂົງເຂດວັດທະນະທໍາ ແລະ ທ່ອງທ່ຽວ ເຊິ່ງສອງຝ່າຍໄດ້ເຫັນດີສືບຕໍ່ຮ່ວມມືໃນຕໍ່ໜ້າ ໂດຍສະເພາະການຈັດປີທ່ອງທ່ຽວ ລາວ-ຈີນ 2019 ຕາມການຕົກລົງເຫັນດີຂອງສອງລັດຖະບານໃຫ້ປາກົດຜົນເປັນຈິງ.
