ກະຊວງໄປສະນີ, ໂທລະຄົມມະນາຄົມເຕືອນ ແລະ ແນະນຳວິທີປ້ອງກັນໄພຄຸກຄາມລະບົບຄອມພິວເຕີ
ໃນວັນທີ 15 ພຶດສະພານີ້, ກະຊວງໄປສະນີ ໂທລະຄົມມະນາຄົມ ແລະ ການສື່ສານ(ປທສ) ໄດ້ອອກແຈ້ງການເຕືອນໄພເຖິງບັນດາກະຊວງ, ອົງການຈັດຕັ້ງຕ່າງໆ ແລະ ຜູ້ຊົມໃຊ້ອິນເຕີເນັດ ໃນທົ່ວປະເທດຊາບວ່າ ປັດຈຸບັນ ໄດ້ມີການພົບເຫັນໄວຣັດ ຄອມພິວເຕີ Wannacry Rasomware ຫລື Wanna Deeryptor 2.0 ທີ່ໄດ້ແຜ່ລະບາດໃນຫລາຍປະເທດ.
ສຳລັບ ສປປ ລາວ ກໍໄດ້ມີການຕິດຕາມເຝົ້າລະວັງໄວຣັດດັ່ງກ່າວ, ເຊິ່ງໄວຣັດຊະນິດນີ້ ຈະໂຈມຕີໄປທີ່ຊ່ອງຫວ່າງ SMBv1.0(Server Message Block) ຂອງລະບົບປະຕິບັດການ Windows. ຖ້າຫາກຜູ້ຄຸ້ມຄອງລະບົບຄອມພິວເຕີ ແລະ ຜູ້ໃຊ້ຄອມພິວເຕີ ບໍ່ໄດ້ຕິດຕັ້ງ ຫລື ອັບເດດໂປຣແກມປ້ອງກັນໄວຣັດ ຫລື ບໍ່ໄດ້ອັບເດດລະບົບປະຕິບັດການ ນັບທັງແນະນຳເຖິງວິທີການປ້ອງກັນ ດັ່ງກ່າວກໍຈະເຮັດໃຫ້ລະບົບຄອມພິວເຕີຕິດເມົາແວ (Malware), ບັນດາຂໍ້ມູນເອເລັກໂທຣນິກ ແລະ ເອກະສານ ໃນຄອມພິວເຕີຈະຖືກເຂົ້າລະຫັດ ເພື່ອຮຽກຄ່າໄຖ່.
ດັ່ງນັ້ນ, ເພື່ອໃຫ້ຮູ້ທັນ ສາມາດປ້ອງກັນ ແລະ ລະມັດລະວັງຕໍ່ໄພຄຸກຄາມດັ່ງກ່າວ, ກະຊວງ ປທສ ຈຶ່ງໄດ້ມີຂໍແນະນຳໃນການປ້ອງກັນ ເຊັ່ນ: ສຳລັບ Windows XP, 7, 8, 10 ຫລື ລະບົບເຊີເວີທີ່ໃຊ້ Windows Server 2003, 2008, 2012, 2016 ໃຫ້ອັບເດດລະບົບປະຕິບັດການໂດຍດ່ວນ. ໃນກໍລະນີ ທີ່ບໍ່ສາມາດອັບເດດລະບົບນີ້ໄດ້ທັນເວລາ ທ່ານສາມາດເຂົ້າໄປປິດການໃຊ້ງານ SMB Server Message Block, ສ່ວນ firewall ໃຫ້ປິດ TCP/UDP SMB Port 135-139 ແລະ 445. ສຳລັບຜູ້ນຳໃຊ້ລະບົບຄອມພິວເຕີທົ່ວໄປ ໃຫ້ຕິດຕັ້ງໂປຣແກມປ້ອງກັນໄວຣັດ ແລະ ອັບເດດໃຫ້ເປັນປົກກະຕິ, ທັງອັບເດດລະບົບປະຕິບັດການ Windows ເພື່ອປິດຊ່ອງຫວ່າງ SMB Server Message Block, ໃຫ້ສຳຮອງເອກະສານໄວ້ໃນທີ່ປອດໄພ, ບໍ່ເປີດເອກະສານທີ່ຂັດຕິດມານຳ ອີເມວ ເຊິ່ງບໍ່ຮູ້ຈັກແຫລ່ງທີ່ມາ ຫລື ລິ້ງຕ່າງໆ, ບໍ່ດາວໂລດໂປຣແກມ ແລະ ຟາຍຕ່າງໆ ຈາກເວັບໄຊທີ່ບໍ່ໜ້າເຊື່ອຖື.
ກະຊວງ ປທສ ໄດ້ແນະນຳເພີ່ມເຕີມວ່າ: ໃນກໍລະນີຕິດໄວຣັດ Wannacry Rasomware ຫລື Wanna Deeryptor 2.0 ໃຫ້ປິດການທຳງານຄອມພິວເຕີຂອງຕົນ, ທັງຢຸດການເຊື່ອມຕໍ່ເຄືອຄ່າຍຄອມພິວເຕີພາຍໃນ ແລະ ອິນເຕີເນັດ, ພ້ອມທັງແຈ້ງໃຫ້ຜູ້ຄຸ້ມຄອງລະບົບຊາບ ແລະ ຊອກຫາວິທີການແກ້ໄຂ. ອີກກໍລະນີ ຫາກພົບເຫັນເຫດການທີ່ໜ້າສົງໃສ ສາມາດແຈ້ງຫາສູນສະກັດກັ້ນ ແລະ ແກ້ໄຂເຫດສຸກເສີນທາງລະບົບຄອມພິວເຕີ ຜ່ານທາງອີເມວ report@laocert.gov.la ຫລື ຜ່ານທາງໂທລະສັບ 030 5764222. ສ່ວນການອັບເດດລະບົບປະຕິບັດການ Windows ແລະ ຂໍ້ມູນເພີ່ມເຕີມ ສາມາດເຂົ້າເບິ່ງທີ່ເວັບໄຊ ຂອງສູນສະກັດກັ້ນ ແລະ ແກ້ໄຂເຫດສຸກເສີນທາງລະບົບຄອມພິວເຕີ www.laocert.gov.la, ທັງນີ້ ກໍເປັນການປ້ອງກັນໃຫ້ທັນເວລາ.
