ສຕລ ຢືນຢັນ ອີໂວ ຢູໄນເຕັດ ໄດ້ສິດເລື່ອນຊັ້ນສູ່ ລາວພຣີເມຍລີກ 2019
ສະຫະພັນບານເຕະແຫ່ງຊາດລາວ (ສຕລ) ຢືນຢັນ ສະໂມສອນບານເຕະ ອີໂວ ຢູໄນເຕັດ (EVO UNITED) ຮອງແຊ້ມການແຂ່ງຂັນບານເຕະສາຍ ກ ຫລື Lao Division 1 ປະຈຳປີ 2018 ທີມນ້ອງໃຫມ່ໄຟແຮງໃນ ສປປ ລາວ ໄດ້ສິດເລື່ອນຊັ້ນສູ່ການແຂ່ງຂັນບານເຕະ ເປບຊີ ລາວພຣີເມຍລີກ ລີກສູງສຸດຂອງລາວ ໃນປີ 2019 ເນື່ອງຈາກສະໂມສອນກະຊວງປ້ອງກັນຄວາມສະຫງົບ (ປກສ ເອັຟຊີ) ແຊ້ມບານເຕະສາຍ ກ ຫລື Lao Division 1 ປີ 2018 ມີທີມຊຸດໃຫຍ່ໃນລີກສູງສຸດແລ້ວ. ດັ່ງນັ້ນ ສິດໃນການເລື່ອນຊັ້ນສູ່ ລາວພຣີເມຍລີກ 2019 ຈຶ່ງຕົກເປັນຂອງຮອງແຊ້ມ ອີໂວ ຢູໄນເຕັດ ຕາມລະບຽບທີ່ໄດ້ກຳນົດໄວ້.
ຂະນະທີ່ ສະໂມສອນ ອີໂວ ຢູໄນເຕັດ ຍັງບໍ່ໄດ້ຕອບຕົກລົງຈະເຂົ້າຮ່ວມການແຂ່ງຂັນ ຫລື ບໍ່ ? ປັດຈຸບັນກຳລັງພິຈາລະນາສຶກສາຄວາມພ້ອມຮອບດ້ານຂອງທີມ ຄາດວ່າຈະໄດ້ຄຳຕອບໃນໄວໆນີ້.
ສຳລັບສະໂມສອນ ອີໂວ ຢູໄນເຕັດ ເປັນສະໂມສອນນ້ອງໃຫມ່ໃນ ສປປ ລາວ ຫາກໍສ້າງທີມໃນເດືອນພຶດສະພາ ປີ 2018 ສ້າງຊື່ດ້ວຍການແຜງລິດຄວ້າແຊ້ມບານເຕະຊີງຂັນເຈົ້າຄອງນະຄອນຫລວງວຽງຈັນ 2018 ຈາກນັ້ນສາມາດເຂົ້າຊີງບານເຕະສາຍ ກ ຫລື Lao Division 1 ປະຈຳປີ 2018 ແບບເໝືອຄວາມຄາດໝາຍ ດ້ວຍສະຖິຕິຍິງປະຕູຄູ່ແຂ່ງຫລາຍສຸດ 26 ປະຕູ ຈາກ 7 ນັດ.
