ທະນາຄານໂລກເບິ່ງອາຊີຕາເວັນອອກ ສົດໃສ ແນະນຳຕ້ອງປັບຕົວໄວ
ທະນາຄານໂລກ ເບິ່ງອະນາຄົດພາກພື້ນອາຊີຕາເວັນອອກມີຄວາມທ້າທາຍສູງ, ພາກລັດຕ້ອງປັບຕົວໃຫ້ທັນ ໂດຍການປະສົມປະສານນະໂຍບາຍເສດຖະກິດແບບເກົ່າ ແລະ ແບບໃໝ່.
ທ່ານ ຊູເດຍ ແຊດຕີ້ ຫົວໜ້ານັກເສດຖະສາດທະນາຄານໂລກປະຈຳພາກພື້ນອາຊີຕາເວັນອອກ ແລະ ປາຊີຟິກ ເປີດເຜີຍວ່າ: ການພັດທະນາຂອງພາກພື້ນອາຊີຕາເວັນອອກໃນໄລຍະຕໍ່ໄປ ອາດມີຄວາມທ້າທາຍສູງ ເນື່ອງຈາກການປ່ຽນແປງທີ່ເກີດຂຶ້ນຢ່າງວ່ອງໄວຂອງໂລກ ແລະ ພາກພື້ນ ໂດຍຜູ້ກຳນົດນະໂຍບາຍຈະຕ້ອງປັບຕົວ, ຮູບແບບການພັດທະນາໃນອາຊີຕາເວັນອອກ ເພື່ອໃຫ້ທັນກັບຄວາມທ້າທາຍໃໝ່ຢ່າງມີປະສິດທິພາບ.
ການວິເຄາະປັດໄຈທ້າທາຍຕ່າງໆ ເຮັດໃຫ້ເຫັນວ່າຜູ້ກຳນົດນະໂຍບາຍຂອງປະເທດກຳລັງພັດທະນາໃນພາກພື້ນອາຊີຕາເວັນອອກສາມາດແກ້ໄຂບັນຫາເຫລົ່ານີ້ໄດ້ ໂດຍການປະສົມປະສານລະຫວ່າງນະໂຍບາຍແບບເກ່ົາ ແລະ ນະໂຍບາຍໃໝ່ 5 ບັນຫາສຳຄັນໄດ້ແກ່: ການສົ່ງເສີມການສ້າງຄວາມສາມາດໃນການແຂ່ງຂັນທາງເສດຖະກິດ, ການສ້າງທັກສະ, ການສົ່ງເສີມການມີສ່ວນຮ່ວມ, ການເສີມສ້າງສະຖາບັນຂອງພາກລັດ ແລະ ຈັດຫາເງິນທຶນເພື່ອການເຂົ້າສູ່ການເປັນປະເທດທີ່ມີລາຍໄດ້ສູງ.
ເຖິງວ່າແນວທາງ ແລະ ຄວາມວ່ອງໄວໃນການປ່ຽນແປງຍັງເປັນສິ່ງທີ່ບໍ່ແນ່ນອນ, ແຕ່ຄວາມຈິງຄື: ການປ່ຽນແປງກຳລັງເກີດຂຶ້ນ ແລະ ເປັນສິ່ງທີ່ບໍ່ສາມາດຫລີກເວັ້ນໄດ້. ການຟື້ນຕົວຂອງພາກພື້ນອາຊີຕາເວັນອອກ ມີຂໍ້ສະຫລຸບວ່າ: ຜູ້ກຳນົດນະໂຍບາຍໃນພາກພື້ນຈຳເປັນຕ້ອງຕອບສະໜອງຕໍ່ການປ່ຽນແປງຢ່າງເດັດຂາດ ເພື່ອບໍ່ໃຫ້ພາດໂອກາດໃນການຮັກສາການພັດທະນາທີ່ໂດດເດັ່ນຂອງອາຊີຕາເວັນອອກ.
ໂດຍ 50 ປີຜ່ານມາ, ຫລາຍປະເທດໃນພາກພື້ນນີ້ຍັງເປັນປະເທດກະສິກຳທີ່ທຸກຍາກ ລວມທັງມີຄວາມຂັດແຍ່ງ, ແຕ່ປັດຈຸບັນກິດຈະກຳທາງເສດຖະກິດໃນພາກພື້ນນີ້ມີຄວາມຄຶກຄື້ນຂຶ້ນຢ່າງຕໍ່ເນື່ອງ ສະທ້ອນເຖິງການປະສົມປະສານລະຫວ່າງເສດຖະກິດຂອງກຸ່ມທີ່ມີລາຍໄດ້ສູງ ແລະ ລາຍໄດ້ປານກາງທີ່ດີຂຶ້ນ ເຊິ່ງຄິດເປັນອັດຕາສ່ວນເກືອບໜຶ່ງໃນສາມຂອງ GDP ໂລກ. ນອກຈາກນີ້ ຫລາຍກວ່າ 90% ຂອງປະຊາກອນໃນອາຊີຕາເວັນອອກໃນປັດຈຸບັນອາໄສຢູ່ໃນ 10 ປະເທດທີ່ມີລາຍໄດ້ປານກາງ ໄດ້ແກ່ກຳປູເຈຍ, ຈີນ, ອິນໂດເນເຊຍ, ສປປ ລາວ, ມຽນມາ, ຟີລິບປິນ, ໄທ ແລະ ຫວຽດນາມ ເຊິ່ງຫລາຍປະເທດມີຄວາມເປັນໄປໄດ້ທີ່ຈະກາຍເປັນປະເທດທີ່ມີລາຍໄດ້ສູງ.
