ປະເມີນຄວາມຄືບໜ້າ ການພັດທະ ນາຊີວິດການເປັນຢູ່ຂອງເດັກໃນລາວ
ກະຊວງແຜນການ ແລະ ການລົງທຶນ ຮ່ວມກັບອົງການຢູນິເຊັບ (UNICEF) ໄດ້ຈັດກອງປະຊຸມປະເມີນຄວາມຄືບໜ້າວຽກງານການພັດທະນາ ຊີວິດການເປັນຢູ່ ເດັກໃນລາວ, ຂຶ້ນໃນວັນທີ 11 ທັນວານີ້ ທີ່ຄອນຫຼວງວຽງຈັນ,ໂດຍມີທ່ານ ກິແກ້ວ ຈັນທະບູລີ, ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ອົກຕາວຽນ ບີໂວນ (Octavian Bivol) ຜູ້ຕາງໜ້າຂອງອົງການຢູນິເຊັບ UNICEF ປະຈໍາລາວ ເຂົ້າຮ່ວມ.
ທ່ານ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ມີຄຳເຫັນວ່າ: ໃນເຫດການໄພພິບັດສຸກເສີນຜ່ານມາທີ່ແຂວງອັດຕະປື ດ້ວຍການສະໜັບສະໜູນຈາກອົງການ ຢູນິເຊັບ UNICEF ແລະ ກະຊວງທີ່ກ່ຽວຂ້ອງ, ໄດ້ມີຜົນສໍາເລັດ ແລະ ຄວາມຄືບໜ້າດີໃນດ້ານສຸຂະພາບ, ໂພຊະນາການ, ການສຶກສາ, ການປົກປ້ອງເດັກ ແລະ ການສ້າງຕົວຊີ້ວັດ, ໂດຍອີງໃສ່ຂໍ້ມູນ ການສໍາຫລວດດັດສະນີໝາຍຂອງສັງຄົມແມ່ນມີຄວາມຄືບຫນ້າທີ່ດີໃນຕົວຊີ້ວັດດ້ານສັງຄົມ, ແຕ່ກໍ່ຍັງມີບາງຂົງເຂດທີ່ຕ້ອງໄດ້ເຮັດວຽກຮ່ວມກັນເພື່ອບັນລຸຜົນສໍາເລັດດີກວ່າເກົ່າສໍາລັບເດັກນ້ອຍ. ເຖິງວ່າຈະມີຄວາມຄືບໜ້າແລ້ວ, ແຕ່ຍັງມີຄວາມແຕກຕ່າງຢູ່ໃນລະດັບແຂວງທີ່ຕ້ອງການລົງທຶນເພີ່ມຕື່ມອີກ ເພື່ອສ້າງຄວາມອາດສາມາດ ແລະ ການປະສານງານໃນທ້ອງຖິ່ນເພື່ອໃຫ້ການບໍລິການທີ່ມີປະສິດທິພາບ ແລະ ປະສິດທິຜົນດີຂຶ້ນ.
ທ່ານ ຜູ້ຕາງໜ້າຂອງອົງການຢູນິເຊັບ UNICEF ໄດ້ຊີ້ໃຫ້ເຫັນຕື່ມວ່າ: ເດັກນ້ອຍພຽງແຕ່ 12% ບໍ່ໄດ້ຮັບຜົນກະທົບຂອງຄວາມທຸກຍາກຂາດເຂີນ, ແຕ່ 70% ແມ່ນກໍາລັງປະເຊີນໜ້າກັບຄວາມທຸກຍາກຂາດເຂີນ, ໃນນີ້ 50% ແມ່ນໄດ້ຮັບຄວາມທຸກຍາກຂາດເຂີນ. ຜົນການຄົ້ນຄ້ວາເຫລົ່ານີ້ແມ່ນເປັນເຄື່ອງມື ສໍາລັບການວາງແຜນໃຫ້ດີຂຶ້ນກ່ວາເກົ່າຄື: ຄວນເພີ່ມທະວີ ຄວາມອາດສາມາດຂອງອໍານາດການປົກຄອງແຂວງ ແລະ ເມືອງ ສໍາລັບການວາງແຜນ, ການປະຕິບັດ ແລະ ການຕິດຕາມເພື່ອແກ້ໄຂບັນຫາຄວາມທຸກຍາກຂາດເຂີນຂອງເດັກນ້ອຍໃຫ້ໄດ້ຜົນສໍາເລັດສູງຂຶ້ນ.
