ຫາລືການຫັນເປັນທັນສະໄໝ ທາງດ້ານດິຈິຕອນ ໃນ ສປປ ລາວ

 ໃນວັນທີ 11 ທັນວາ ນີ້, ກະຊວງໄປສະນີ, ໂທລະຄົມມະນາຄົມ ແລະການສື່ສານ (ປທສ) ຮ່ວມກັບ ຫ້ອງວ່າການສຳນັກງານນາຍົກລັດຖະມົນຕີ ໄດ້ຈັດກອງປະຊຸມສຳມະນາພາຍ​ໃຕ້​ຫົວ​ຂໍ້ “ການຫັນເປັນທັນສະໄໝ ທາງດ້ານດິຈິຕອນ ໃນ ສປປ ລາວ” (Laos Digital Transformation Forum) ຂຶ້ນທີ່​ຫໍ​ປະຊຸມ​ແຫ່ງ​ຊາດ, ​ໃນ​ນະຄອນຫລວງ​ວຽງຈັນ ພາຍໃຕ້ການເປັນປະທານຂອງ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງ ປທສ, ມີ ທ່ານ Mark Wang ປະທານ ບໍລິສັດຫົວເຫວີຍ ເຕັກໂນໂລຊີ (ລາວ) ຈຳກັດ, ​ແລະ ຜູ້ຕາງໜ້າຂອງອົງການຈັດຕັ້ງ ພັກ-ລັດ, ອົງການຈັດຕັ້ງມະຫາຊົນ, ບໍລິສັດໂທລະຄົມມະນາຄົມ, ທະນາຄານ, ສາພາການຄ້າ ແລະພາກສ່ວນກ່ຽວຂ້ອງຕ່າງໆເຂົ້າຮ່ວມ​ເປັນ​ຈຳນວນ​ຫລາຍ. ​ເພື່ອເປັນການແລກປ່ຽນຄວາມຮູ້, ປະສົບການ, ທິດທາງນະໂຍບາຍ ແລະການພັດທະນາທາງດ້ານເຕັກນິກ ເພື່ອຮອງຮັບການຫັນເປັນ ດິຈິຕອນ ຂອງບັນດາ ອົງກອນລັດ, ບໍລິສັດໂທລະຄົມ ແລະຂະແໜງການອຸດສາຫະກໍາທີ່ກ່ຽວຂ້ອງ ພາຍໃນ ສປປ ລາວ. ເພື່ອສົ່ງເສີມໃຫ້ການຫັນເປັນດິຈິຕອນຂອງ ສປປ ລາວ ໃຫ້ມີການ ຂະຫຍາຍຕົວ ແລະກາຍເປັນເຄື່ອງມືທີ່ສໍາຄັນໃນການຂັບເຄື່ອນ ການພັດທະນາເສດຖະກິດ-ສັງຄົມຂອງຊາດໃຫ້ເຂັ້ມແຂງ ແລະທັນກັບຍຸກສະໄໝ.
     ທ່ານ ລັດຖະມົນຕີ ກະຊວງ ​ໄປສະນີ, ​ໂທລະ​ຄົມມະນາຄົມ ​ແລະ ການ​ສື່ສານ ​ໃຫ້​ຮູ້​ວ່າ: ການຫັນເປັນທັນສະໄໝທາງດ້ານດິຈິຕອນແມ່ນ ການນຳໃຊ້ເຕັກໂນໂລຊີຂໍ້ມູນຂ່າວສານ (ICT) ເປັນກົນໄກສຳຄັນ ໃນການຂັບເຄື່ອນການປະຕິຮູບຂະບວນການຜະລິດ, ການດຳເນີນທຸລະກິດ, ການຄ້າ, ການບໍລິການ, ການສຶກສາ, ສາທາລະນະສຸກ, ການບໍລິຫານລັດ ລວມທັງກິດຈະກໍາທາງເສດຖະກິດ ແລະສັງຄົມອື່ນໆ ເຊິ່ງນໍາໄປສູ່ການປະຕິຮູບພື້ນຖານຂອງການບໍລິການ, ການດຳເນີນທຸລະກິດ ແລະສ້າງມູນຄ່າເພີ່ມໃຫ້ແກ່ຜູ້ຊົມໃຊ້ ລວມທັງການປະຕິຮູບພື້ນຖານການຜະລິດ ເພື່ອກ້າວໄປສູ່ອຸດສາຫະກຳຍຸກ 4.0 ເປັນຕົ້ນ. ການນໍາໃຊ້ ICT (e-Government, IoT, Big Data, AI, ແລະອື່ນໆ) ເຂົ້າໃນທຸກຂະແໜງການຂອງລັດ ເພື່ອຮັບໃຊ້ປະຊາຊົນ ເຊັ່ນ: ການຊຳລະພາສີອາກອນຕ່າງໆ ຜ່ານມືຖື, ຜ່ານເວັບໄຊ, ການສົ່ງເສີມໃຫ້ປະຊາຊົນໃດ້ເຂົ້າເຖິງຂໍ້ມູນຂ່າວສານ, ການບໍລິການຜ່ານທາງອິນເຕີເນັດ ແລະນຳໃຊ້ໄອຊີທີໃຫ້ເກີດຜົນປະໂຫຍດສູງສູດ.