ເກີດເຫດຍິງໃນຕະຫລາດຄຣິສມາສ ເມືອງສຕຣາສບູກຂອງຝຣັ່ງ
ຄົນຮ້າຍທີ່ເປັນເປົ້າໝາຍຂອງທາງການຝຣັ່ງຍິງຄົນໃນຕະຫລາດຄຣິສມາສເມືອງສຕຣາສບູກ ທາງຕາເວັນອອກສຽງເໜືອຂອງຝຣັ່ງ ຕິດກັບຊາຍແດນເຢຍລະມັນ ໃນຄືນວັນທີ11 ທັນວາ ກ່ອນຫລົບໜີລອຍນວນ ມີຜູ້ເສຍຊີວິດແລ້ວ 4 ຄົນ.
ເຫດເກີດເມື່ອເວລາ 20:00 ໂມງ ວັນທີ 11 ທັນວາ ຕາມເວລາຝຣັ່ງ ກົງກັບເວລາ 02:00 ໂມງ ວັນທີ 12 ທັນວາ ຕາມເວລາຢູ່ລາວ ເປັນໄລຍະທີ່ບັນດາຮ້ານຂາຍຕ່າງໆກຽມປິດຮ້ານ ແລະ ຮ້ານອາຫານເລີ່ມມີຄົນເຂົ້າໄປໃຊ້ບໍລິການ. ຜູ້ໄປທ່ຽວງານຕ້ອງຫາບ່ອນຫລົບທີ່ປອດໄພທັນທີທີ່ໄດ້ຍິສຽງປືນ. ສສ ສະພາເອີຣົບ ເຊິ່ງພັກຢູ່ໃນໂຮງແຮມໃກ້ຄຽງ ເປີດເຜີຍວ່າ: ຫລຽວລົງມາຈາກປ່ອງຢ້ຽມຫ້ອງພັກ ເຫັນຄົນຊ່ວຍກັນລາກຜູ້ບາດເຈັບໄປບ່ອນປອດໄພທ່າມກາງຜູ້ຄົນທີ່ແຕກຕື່ນ, ທະຫານ-ຕຳຫລວດປິດລ້ອມພື້ນທີ່ເກີດເຫດ. ແຫລ່ງຂ່າວເປີດເຜີຍວ່າ: ມືປືນຖືຈັບກຸມແລ້ວ, ແຕ່ຕຳຫລວດຖະແຫລງໃນພາຍຫລັງວ່າ: ຍັງຕາມລ່າຕົວຢູ່, ມືປືນຄືທ້າວ ເຊີກັນ ເຊີຣິຟ ອາຍຸ 29 ປີ ເກີດໃນເມືອງສຕຣາສບູກ. ລັດຖະມົນຕີປ້ອງກັນຄວາມສະຫງົບ ເປີດເຜີຍວ່າ: ລາວຢູ່ໃນລາຍຊື່ເຝົ້າຕິດຕາມຂອງໜ່ວຍງານຄວາມໝັ້ນຄົງ.
ເຫດດັ່ງກ່າວເກີດຂຶ້ນໃນຂະນະທີ່ຝຣັ່ງເພີ່ມມາດຕະການຮັກສາຄວາມປອດໄພຕະຫລາດຄຣິສມາສທີ່ຈັດຂຶ້ນໃນເຂດເມືອງເກົ່າຂອງເມືອງສຕຣາສບູກ ຫ້າມລົດທີ່ບໍ່ໄດ້ຮັບອະນຸຍາດເຂົ້າໄປໃນເຂດໃກ້ຄຽງໃນໄລຍະເປີດຕະຫລາດ.
