ສານເຄມີປົນເປື້ອນໃນອາຫານຕາມທ້ອງຕະຫຼາດຍັງແພ່ຫຼາຍ
ປັດຈຸບັນນີ້ການນຳໃຊ້ສານເຄມີປົນເປື້ອນໃນອາຫານ
ໂດຍສະເພາະປະເພດອາຫານທະເລ ແລະຊີ້ນຕາມທ້ອງຕະຫຼາດ ໃນນະຄອນຫຼວງວຽງຈັນຍັງແພ່ຫຼາຍ. ໄລຍະ
9 ເດືອນຜ່ານມານີ້ ທາງຄະນະຮັບຜິດຊອບໄດ້ລົງກວດກາສານ ປົນເປື້ອນ ໃນຜະລິດຕະພັນສັດຢູ່ຕາມຕະຫຼາດຕ່າງໆ ໄດ້ພົບສານຟໍມະລິນປົນເປື້ອນໃນຜະລິດຕະພັນປາໝຶກແຊ່ ແລະຢໍ່ຂາວຈຳນວນ 30 ຕົວຢ່າງ,
ຢຶດໄດ້ 76
ກິໂລກຣາມ ຈຶ່ງໄດ້ມາການທຳລາຍ ພ້ອມທັງນຳເອົາຜູ້ປະກອບການດັ່ງກ່າວນັ້ນມາເຮັດບົດບັນທຶກກ່າວເຕືອນ,
ສຶກສາອົບຮົມ.
ພະແນກກະສິກຳປ່າໄມ້ ນະຄອນຫຼວງວຽງຈັນໄດ້ໃຫ້ຮູ້ວ່າເມື່ອບໍ່ດົນມານີ້ ປະຊາຊົນຢູ່ບ້ານໂສກປ່າຫຼວງ ເມືອງສີສັດຕະນາກໄດ້ລາຍງານກ່ຽວກັບຜະລິດ ຕະພັນສິນຄ້າກ່ຽວກັບສັດ ແລະ ອາຫານທະເລ ແຊ່ແຂງປົນເປື້ອນສານ ຟໍມາລິນ ມີຜົນກະທົບຕໍ່ສຸຂະພາບ ແລະ ຊີວິດຂອງຜູ້ບໍລິໂພກ ດັ່ງນັ້ນ ທາງພະແນກທີ່ກ່ຽວຂ້ອງຈຶ່ງໄດ້ລົງເຄື່ອນໄຫວວຽກງານສຸ່ມເກັບຕົວຢ່າງ ເພື່ອມາກວດກາຢ່າງເປັນປົກກະຕິ.
ສ່ວນບັນດາບໍລິສັດ, ຜູ້ປະກອບການ ທີ່ນໍາເຂົ້າ-ສົ່ງອອກ-ຂົນສົ່ງຜ່ານ ແລະ ດໍາເນີນທຸລະກິດພາຍໃນ 9 ເມືອງ ນະຄອນຫຼວງວຽງຈັນມີຈໍານວນໜ້ອຍທີ່ມາ ແຈ້ງຂຶ້ນທະບຽນ ພ້ອມທັງມີການນໍາເຂົ້າບໍ່ຖືກຕ້ອງຕາມຈຸດດ່ານຊາຍແດນຕ່າງໆ ແລ້ວນໍາ ຂົນສົ່ງເຂົ້າມາຈໍາໜ່າຍຢູ່ຕາມທ້ອງຕະຫຼາດພາຍໃນນະຄອນຫຼວງ ວຽງຈັນໂດຍບໍ່ໄດ້ຜ່ານການກວດກາ ຫຼື ອະນຸຍາດຈາກພາກສ່ວນທີ່ກ່ຽວຂ້ອງ. ອີກດ້ານໜຶ່ງປາກົດການການລັກລອບຕາມຊາຍແດນ ແລະການນໍາເຂົ້າຊຸກເຊື່ອງ ຫຼົບຫຼີກການກວດກາຂອງເຈົ້າໜ້າທີ່ກ່ຽວຂ້ອງຍັງມີປາກົດການຕາມດ່ານທ້ອງຖິ່ນ ແລະດ່ານປະເພນີໃນນະຄອນຫຼວງວຽງຈັນ, ຕໍ່ບັນຫາດັ່ງກ່າວຕ້ອງໄດ້ມີສ່ວນຮ່ວມປະສານສົມທົບຂອງຫຼາຍພາກສ່ວນເພື່ອແຈ້ງຂໍ້ມູນເຊັ່ນ: ເຈົ້າໜ້າທີ່ຕໍາຫຼວດ, ເຈົ້າໜ້າທີ່ພາສີອາກອນ, ການຄ້າ ແລະ ຜູ້ຈັດສັນຕະຫາດ ພ້ອມທັງປະສານສົມທົບກັບກໍາລັງ ປກຊ-ປກສ ຕາມຊາຍແດນ ແລະອໍານາດການປົກຄອງທ້ອງຖິ່ນເພື່ອຮັບປະ ກັນຄວາມປອດໄພຕໍ່ຜູ້ບໍລິໂພກໃນສັງຄົມ.
