ລາວ ຈະສ້າງຄູຝຶກໃນຂະແໜງບໍລິການຮ້ານອາຫານ ແລະ ໂຮງແຮມໃຫ້ຫລາຍຂຶ້ນ
ເພື່ອຕອບສະໜອງແຮງງານໃຫ້ມີປະລິມານ
ແລະ ຄຸນນະພາບໃນຂະແໜງທຸລະກິດການບໍລິການຮ້ານອາຫານ ແລະ
ໂຮງແຮມໃນແບບມືອາຊີບ ແລະ ເປັນທີ່ຍອມຮັບຂອງລູກຄ້າ, ໃນວັນທີ 10-14 ທັນວານີ້ ທີ່ເຮືອນຮັບກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດຝຶກອົບຮົມແລກປ່ຽນປະສົບການ ແລະ ບົດຮຽນໃນສາຂາອາຊີບພະນັກງານຕ້ອນຮັບ ໃນໂຄງການຝຶກອົບຮົມສຳລັບຄູຝຶກ ຂອງ
ສປປ ລາວ
ໃນຂະແໜງບໍລິການຮ້ານອາຫານ ແລະ ໂຮງແຮມຂຶ້ນ ໂດຍການກ່າວເປີດຊຸດອົບຮົມຂອງທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ
ສະຫວັດດີການສັງຄົມ, ມີທ່ານ ໂດມີນິກ ກິ (Dominic Goh) ເອກອັກຄະລັດຖະທູດສິງກະໂປ ປະຈຳລາວ, ທ່ານອຸປະທູດລຸກຊຳບວກ ປະຈຳລາວ ແລະ ບັນດາຜູ້ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.
ໂຄງການນີ້ເປັນການຮ່ວມມືລະຫວ່າງ ສປປ ລາວ ກັບ ສິງກະໂປ ໂດຍກວມເອົາ 3 ພາກສ່ວນຄື: ກະຊວງແຮງງານ ແລະ ສະຫວັດດີສັງຄົມ, ກະຊວງສຶກສາທິການ ແລະ ກິລາ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງລັດຖະບານໄດ້ມອບໝາຍໃຫ້ກະຊວງແຮງງານ ແລະ ສະຫວັດດີການສັງຄົມ ເປັນຜູ້ປະສານງານ ແລະ ຈັດຕັ້ງປະຕິບັດໂຄງການ ເພື່ອຝຶກໃຫ້ຄູຝຶກພາກລັດຂອງລາວໃນຂະແໜງບໍລິການຮ້ານອາຫານ ແລະ ໂຮງແຮມໃຫ້ໄດ້ຈຳນວນ 240 ຄົນໃນສາຂາວິຊາຄື: ສາຂາອາຊີບພະນັກງານແມ່ບ້ານ (Housekeeping Operations) HSO, ສາຂາອາຊີບພະນັກ ງານຕ້ອນຮັບ (Front Office Operations) FOO ແລະ ສາຂາອາຊີບພະນັກງານຮ້ານອາຫານ (Restaurant Operations) RSO ໂດຍຝ່າຍສິງກະ ໂປແມ່ນສະຖາບັນບໍລິການດ້ານການສຶກສາ (ITEES ) ເປັນຕົວແທນຮ່ວມມື, ໃຫ້ການຊ່ວຍເຫຼືອດ້ານວິຊາການ ແລະ ງົບປະມານໄດ້ຈາກມູນນິທິສາກົນເທມາເສກ Temasek Foundation International (TFI) ສິງກະໂປ.
ທ່ານ ນາງ ໃບຄໍາ ຂັດທິຍະ ໄດ້ມີຄຳເຫັນວ່າ: ໂຄງການນີ້ມີປະໂຫຍດຫລາຍ ຈະສາມາດຕອບສະໜອງການປັບປຸງການບໍລິການຮ້ານອາຫານ ແລະ ໂຮງແຮມໃຫ້ມີຄຸນນະພາບຕາມມາດຕະ ຖານສາກົນດີຂຶ້ນ.
