ຜູ້ນຳຝຣັ່ງຖະແຫລງມາດຕະການໃໝ່ ຫວັງຢຸດການປະທ້ວງ
ປະທານາທິບໍດີ ເອມານູເອລ ມາຄຣົງ ຂອງຝຣັ່ງ ຖະແຫລງມາດຕະການທາງການເງິນ ເພື່ອຫາທາງຢຸດເຫດການຊຸມນຸມປະທ້ວງຕາມເມືອງຕ່າງໆທົ່ວປະເທດ.
ຜູ້ນຳຝຣັ່ງກ່າວປາໄສທາງໂທລະພາບເປັນເວລາ 15 ນາທີ ຢູ່ທຳນຽບເອລີເຊວ່າ: ທ່ານຍອມຮັບວ່າມີສ່ວນຮັບຜິດຊອບຕໍ່ວິກິດການປະທ້ວງໃນຄັ້ງນີ້ ແລະ ບາງຄັ້ງຖະແຫລງການທີ່ຜ່ານມາຂອງທ່ານອາດເຮັດໃຫ້ບາງຄົນບໍ່ພໍໃຈ ໂດຍເຂົ້າໃຈວ່າເລື່ອງປາກທ້ອງຂອງປະຊາຊົນໃນກຸ່ມຜູ້ມີລາຍໄດ້ໜ້ອຍເປັນບັນຫາຊຳເຮື້ອມາຫລາຍສິບປີ ຈົນກະທັ້ງເກີດເຫດຮຸນແຮງໃນການປະທະທ້ວງຄັ້ງນີ້. ຖືເປັນທ່າທີທີ່ອ່ອນລົງຈາກແຕ່ກ່ອນຂອງຜູ້ນຳຝຣັ່ງ ຫລັງຈາກເຄີຍມີທ່າທີແຂງກະດ້າງຈົນກໍ່ໃຫ້ເກີດສຽງວິຈານຕຳໜິມາແລ້ວ. ມາດຕະການຊຸດໃໝ່ຂອງປະທານາທິບໍດີ ມາຄຣົງ ອາຍຸ 40 ປີ ລວມທັງການເພີ່ມຄ່າແຮງຂັ້ນຕໍ່າຕໍ່ເດືອນ 100 ເອີໂຣ ນັບແຕ່ປີໜ້າເປັນຕົ້ນໄປ. ນອກຈາກນີ້ ຍັງລວມເຖິງການທີ່ລັດຖະບານຈະທົບທວນແຜນການຂຶ້ນພາສີທີ່ປະຊາຊົນບໍ່ເຫັນພ້ອມ ລວມທັງມາດຕະການອື່ນໆທີ່ຈະຕາມມາ ເພື່ອຫວັງບັນເທົາກະແສຄວາມບໍ່ພໍໃຈຂອງປະຊາຊົນ.
ການປະທ້ວງຮຸນແຮງ ແລະ ຈະລາຈົນໃນທ້າຍອາທິດຜ່ານມາຢູ່ປາຣີ ແລະ ເມືອງອື່ນໆທົ່ວປະເທດ ກໍ່ໃຫ້ເກີດການສູນເສຍທາງການເງິນຄັ້ງໃຫຍ່ ແລະ ເປັນບັນຫາທ້າທາຍທີ່ສຸດສຳລັບການດຳລົງຕຳແໜ່ງຂອງປະທານາທິບໍດີ ມາຄຣົງ ນັບແຕ່ເຂົ້າບໍລິຫານປະເທດ ໃນເດືອນພຶດສະພາ 2017 ໂດຍຍົກນະໂຍບາຍປະຕິຮູບເສດຖະກິດຂອງປະເທດ, ແຕ່ຜ່ານມາຄວາມນິຍົມຂອງທ່ານຫລຸດລົງ ແລະ ບາງຄົນກ່າວວ່າເປັນແຜນປະຕິຮູບທີ່ເອື້ອຜົນປະໂຫຍດໃຫ້ຄົນຮັ່ງມີຫລາຍກວ່າ.
