ລັດຖະມົນຕີພະລັງງານອາເມລິກາ-ອາຣັບບີ ຊາອຸດິດ ຫາລືກັນຫລັງໂອເປັກ ຫລຸດກຳລັງການຜະລິດ
ທ່ານ ຄາລິດ ອັລຟາລີ ລັດຖະມົນຕີພະລັງງານອາຣັບບີ ຊາອຸດິດ ໄດ້ຫາລືກັບທ່ານ ຣິກ ເພຣີ ລັດຖະມົນຕີພະລັງງານອາເມລິກາ ພາຍຫລັງອາຣັບບີ ຊາອຸດິດ ແລະ ພັນທະມິດ ບໍ່ປະຕິບັດຕາມແຮງກົດດັນຂອງອາເມລິກາ ແລະ ຫລຸດເພດານຜະລິດນ້ຳມັນ.
ລັດຖະມົນຕີທັງສອງໄດ້ຫາລືເຖິງສະຖານະການໃນຕະຫລາດນ້ຳມັນ ແລະ ການຮ່ວມມືດ້ານພະລັງງານລະຫວ່າງສອງປະເທດ ລະຫວ່າງກອງປະຊຸມໃນເມືອງດາຣານ. ທ່ານ ເພຣີ ກ່າວວ່າ: ທ່ານໄດ້ຫາລືເຖິງສະຖານະການນ້ຳມັນຢ່າງເປີດກວ້າງ, ເສລີ ແລະ ຍຸຕິທຳກັບອາຣັບບີ ຊາອຸດິດ. ກ່ອນໜ້ານີ້ ສະມາຊິກໂອເປັກ ແລະ ປະເທດຜູ້ຜະລິດນ້ຳມັນລາຍໃຫຍ່ 10 ປະເທດ ລວມທັງຣັດເຊຍຕົກລົງກັນຫລຸດປະລິມານການຜະລິດລົງ 1,2 ລ້ານບາເຣລ ນັບແຕ່ເດືອນມັງກອນ ເພື່ອດຶງລາຄານ້ຳມັນທີ່ກຳລັງຫລຸດລົງຢ່າງໜັກ. ການຕັດສິນໃຈດັ່ງກ່າວມີຂຶ້ນຂະນະທີ່ປະທານາທິບໍດີ ໂດນັລ ທຣຳ ຕ້ອງການໃຫ້ຮັກສາປະລິມານການຜະລິດຄືເກົ່າ ເພື່ອໃຫ້ລາຄານ້ຳມັນຫລຸດລົງ.
