ອິນເດຍເກັບຄ່າເຂົ້າຊົມທັດມາຮາເພີ່ມ 5 ເທົ່າ ຫວັງຫລຸດຈຳນວນນັກທ່ອງທ່ຽວ
ທາງການອິນເດຍ ປະກາດເກັບຄ່າທຳນຽມເຂົ້າຊົມ ທັດມາຮາ ອານຸສອນສະຖານແຫ່ງຄວາມຮັກໃນເມືອງອັກຣາ ແຫລ່ງທ່ອງທ່ຽວສຳຄັນທີ່ເປັນສັນຍາລັກຂອງປະເທດ ເພີ່ມຂຶ້ນເປັນ 5 ເທົ່າ ມີເປົ້າໝາຍເພື່ອຫລຸດຈຳນວນນັກທ່ອງທ່ຽວ ແລະ ຫລຸດຄວາມເສຍຫາຍທີ່ຈະເກີດຂຶ້ນກັບທັດມາຮາ.
ທັງນີ້ ໃນແຕ່ລະວັນຈະມີນັກທ່ອງທ່ຽວຊາວອິນເດຍເຂົ້າຢ້ຽມຊົມຄວາມງາມຂອງທັດມາຮາວັນລະ 1-1,5 ໝື່ນຄົນ ແລະ ໝົດປີ 2016 ມີນັກທ່ອງທ່ຽວເຂົ້າມາທ່ຽວສະຖານທີ່ແຫ່ງນີ້ສູງເຖິງ 6,5 ລ້ານຄົນ ເຮັດໃຫ້ລັດຖະບານຕັດສິນໃຈເກັບຄ່າເຂົ້າຊົມສຳລັບນັກທ່ອງທ່ຽວຊາວອິນເດຍເພີ່ມອີກ 5 ເທົ່າເປັນ 250 ຣູປີ ຈາກປັດຈຸບັນເກັບໃນອັດຕາ 50 ຣູປີ.
ສ່ວນນັກທ່ອງທ່ຽວຕ່າງປະເທດຈະຖືກເກັບເພີ່ມຂຶ້ນເຊັ່ນກັນເປັນ 19 ໂດລາ ຈາກປັດຈຸບັນເກັບໃນລາຄາ 16 ໂດລາ ເຊິ່ງທາງການອິນເດຍຫວັງວ່າການເພີ່ມຄ່າເຂົ້າຊົມທັດມາຮາເທື່ອນີ້ຈະຊ່ວຍຫລຸດຈຳນວນນັກທ່ອງທ່ຽວໄດ້ປະມານ 15-20%.
ການເກັບຄ່າເຂົ້າຊົມເພີ່ມ ມີຂຶ້ນຫລັງຈາກທາງການອິນເດຍປະກາດຄຸມຈຳນວນນັກທ່ອງທ່ຽວທີ່ມາທ່ຽວຊົມທັດມາຮາໃຫ້ຢູ່ໃນວັນລະ 4 ໝື່ນຄົນ ຫລັງຈາກທຸກວັນພັກທ້າຍອາທິດຈະມີນັກທ່ອງທ່ຽວອິນເດຍເຂົ້າຊົມສະຖານທີ່ແຫ່ງນີ້ວັນລະ 7 ໝື່ນຄົນ.
