ຕລຊລ ຈະຈຳໜ່າຍພັນທະບັດລັດຖະບານ1.000 ຕື້ກີບໃນວັນທີ 11-17 ທັນວານີ້
ກະຊວງການເງິນ ໄດ້ຕາງໜ້າລັດຖະບານຮ່ວມກັບບໍລິສັດຫຼັກຊັບ ລ້ານຊ້າງ ມະຫາຊົນ, ບໍລິສັດຫຼັກຊັບທຄຕລ-ກທ ຈຳກັດ ແລະບໍລິສັດຫຼັກຊັບ ລາວ-ຈີນ ຈຳກັດ ໄດ້ຈັດງານນຳສະເໜີຂໍ້ມູນໃຫ້ຜູ້ລົງທຶນ (Road show) ໃນການອອກຈໍາໜ່າຍພັນທະບັດລັດຖະບານ ຜ່ານຕະຫຼາດຫຼັກຊັບລາວໃຫ້ນັກລົງທຶນທັງພາຍໃນ-ຕ່າງປະເທດ ຊຶ່ງຈັດຂຶ້ນໃນວັນທີ 7 ທັນວານີ້ ທີ່ຕະຫຼາດຫຼັກຊັບລາວນະຄອນຫຼວງວຽງຈັນ ໂດຍການເຂົ້າຮ່ວມຂອງຜູ້ຕາງໜ້າຈາກກະຊວງການເງິນ; ທະນາ ຄານແຫ່ງ ສປປ ລາວ ແລະບໍລິສັດຫຼັກຊັບທີ່ຖືກແຕ່ງຕັ້ງເປັນທີ່ປຶກສາດ້ານການເງິນ ແລະ ຕົວແທນຈຳໜ່າຍພ້ອມດ້ວຍຜູ້ລົງທຶນເຂົ້າຮ່ວມຈໍານວນໜຶ່ງ.
ການຈັດງານດັ່ງກ່າວ ເພື່ອເປັນການເຜີຍແຜ່ຂໍ້ມູນລາຍລະອຽດຂອງການອອກພັນທະບັດໃຫ້ແກ່ມວນຊົນ ລວມທັງບຸກ ຄົນ ຫຼື ນິຕິບຸກຄົນພາຍໃນ-ຕ່າງປະເທດ ສາມາດກະກຽມຄວາມພ້ອມ ລວມເຖິງທຶນຮອນທີ່ຈະລົງທຶນໃນພັນທະບັດໃນຄັ້ງນີ້ ໂດຍມີຜູ້ອອກພັນທະບັດ ຄື: ກະຊວງການເງິນຕາງໜ້າໃຫ້ລັດຖະບານແຫ່ງ ສປປ ລາວ ຊຶ່ງມີປະເພດພັນທະບັດດຸ່ນດ່ຽງງົບປະມານ ຈຳ ນວນ 1.000.000 ໜ່ວຍ, ມູນຄ່າກໍານົດ 1.000.000 ກີບຕໍ່ໜ່ວຍ, ລາຄາຂາຍ 1.000.000 ກີບຕໍ່ໜ່ວຍ, ມູນຄ່າລວມ 1.000.000.000.000 (1 ພັນຕື້ກີບ) ໂດຍແບ່ງຕາມອາຍຸ ຄື: ອາຍຸ 1 ປີ, ວັນທີ 16 ທັນວາ 2019 ຄົບກຳນົດໄຖ່ຖອນ ແລະ ອັດຕາດອກເບ້ຍ 5,30%/ປີ, ມູນຄ່າ 400 ຕື້ກີບ; ອາຍຸ 3 ປີ, ວັນທີ 16 ທັນວາ 2021 ຄົບກຳນົດໄຖ່ຖອນ ແລະ ອັດຕາດອກເບ້ຍ 6,80%/ປີ; ອາຍຸ 5 ປີ, ວັນທີ 16 ທັນວາ 2023 ຄົບກຳນົດໄຖ່ຖອນ ແລະ ອັດຕາດອກເບ້ຍ 6,95%/ປີ ແລະ ອາຍຸ 7 ປີ, ວັນທີ 16 ທັນວາ 2025 ຄົບກຳນົດໄຖ່ຖອນ ແລະ ອັດຕາດອກເບ້ຍ 7,10%/ປີ ຊຶ່ງຈະອອກຈຳໜ່າຍພັນທະບັດໃຫ້ແກມວນຊົນໄດ້ຈອງຊື້ພັນທະບັດໃນເວລາ 08:30 ໂມງ-15:30 ໂມງ ຂອງວັນທີ 11-17 ທັນວາ 2018.
ໃນງວດການຈ່າຍດອກເບ້ຍ ແມ່ນສອງຄັ້ງຕໍ່ປີ ແລະ ຈະຈ່າຍດອກເບ້ຍໃນວັນທີ 16 ມີຖຸນາ ແລະ 16 ທັນວາ ຂອງແຕ່ລະປີ ຊຶ່ງມີຕົວແທນຈຳໜ່າຍບໍລິສັດຫຼັກຊັບ ລ້ານຊ້າງ ມະຫາຊົນ (ຕົວແທນຈຳໜ່າຍຫຼັກ); ບໍລິສັດຫຼັກຊັບ ທຄຕລ-ກທ ຈຳກັດ ແລະ ບໍລິສັດຫຼັກຊັບ ລາວ-ຈີນ ຈຳກັດ ແລະ ການສະເໜີຂາຍໃຫ້ແກ່ມວນຊົນກໍຄືການອອກພັນທະບັດຊຸດນີ້ ຈະບໍ່ມີການຜິດນັດ ຊໍາລະ ໂດຍມີໄລຍະເວລາເປີດຈອງຊື້ພັນທະບັດ 5 ວັນ ນັບວັນທີ 11 ທັນວາ ເປັນຕົ້ນໄປ ແລະ ພັນທະບັດຊຸດນີ້ຈະຖືກຄຸ້ມຄອງໂດຍກົດໝາຍຂອງ ສປປ ລາວ ແລະ ຂໍສະເໜີໃຫ້ຜູ້ຈອງຊື້ພັນທະບັດທຸກຄົນ ກະລຸນາສອບຖາມຂໍ້ມູນຕາມແບບຟອມການຈອງຊື້ພັນທະບັດໃຫ້ຄົບຖ້ວນ ແລະ ຕ້ອງມີບັນຊີພັນທະບັດນໍາບໍລິສັດຫຼັກຊັບ ໂດຍນາຍທະບຽນ ແລະ ຜູ້ຮັບຝາກພັນທະບັດຢູ່ພະແນກຊໍາລະສະສາງ ແລະ ຮັບຝາກຫຼັກຊັບຂອງ ຕລຊລ ແລະ ຈະມີການຈົດທະບຽນຢູ ຕລຊລ.
ການອອກຈຳໜ່າຍພັນທະບັດໃນຄັ້ງນີ້ ຖືເປັນຄັ້ງທຳອິດຂອງ ສປປ ລາວ ທີ່ຈະນຳເອົາພັນທະບັດດັ່ງກ່າວມາຈົດທະບຽນໃນຕະຫຼາດຫຼັກຊັບລາວ ສາມາດແລກປ່ຽນ ຊື້-ຂາຍ ໄດ້ ແລະ ຖືເປັນອີກຊ່ອງທາງການລົງທຶນອີກປະເພດໜຶ່ງທີ່ໃຫ້ຜົນຕອບແທນສະ ໝໍ່າສະເໝີ, ມີຄວາມສ່ຽງຕໍ່າກວ່າຊ່ອງທາງອື່ນ, ມີອາຍຸການລົງທຶນທີ່ຊັດເຈນ, ອັດຕາຜົນຕອບແທນທີ່ໜ້າສົນໃຈ ແລະ ຖືເປັນອີກທາງເລືອກໜຶ່ງໃນການກະຈາຍຄວາມສ່ຽງໃນການລົງທຶນ; ສຳລັບຜູ້ທີ່ສົນໃຈລົງທຶນໃນພັນທະບັດໃນຄັ້ງນີ້ ສາມາດຕິດຕໍ່ກັບຕົວແທນຈຳໜ່າຍພັນທະບັດ ຜ່ານບໍລິສັດຫຼັກຊັບ ລ້ານຊ້າງ ມະ ຫາຊົນ, ບໍລິສັດຫຼັກຊັບ ທຄຕລ-ກທ ຈຳກັດ ຫຼື ບໍລິສັດຫຼັກຊັບ ລາວ-ຈີນ ຈຳກັດ ຕາມວັນ ແລະ ເວລາລັດຖະການ ຊຶ່ງທັງສາມບໍລິສັດ ມີທີ່ຕັ້ງ ແລະ ຢູ່ອາຄານຕະຫຼາດຫຼັກຊັບລາວ ບ້ານໂພນທັນ, ເມືອງ ໄຊເສດຖາ, ນະຄອນຫຼວງວຽງຈັນ.
# ຂ່າວ–ພາບ: ຣັດສະໝີ ດວງສັດຈະ
