ໂມຣ໊ອກໂກຢຶດໂຄເຄນກວ່າ 1 ໂຕນ

      ​ເຈົ້າໜ້າ​ທີ່​ໂມຣ໊ອກ​ໂກ​ຢຶດ​ໂຄ​ເຄນ​ໄດ້​ນ້ຳໜັກ​ກວ່າ 1 ​ໂຕນ ​ແລະ ຈັບ​ຜູ້​ຕ້ອງ​ສົງ​ໄສ​ໄດ້ 7 ຄົນ​ທີ່​ລັກລອບ​ຂົນ​ຢາ​ເສບ​ຕິດ​ຈາກ​ອາ​ເມ​ລິ​ກາ​ໃຕ້​ເຂົ້າ​ເອີຣົບ.

      ສຳນັກ​ຂ່າວ​ໂມຣ໊ອກ​ໂກ​ລາຍ​ງານ​ວ່າ: ສຳນັກງານ​ສອບ​ສວນ​​ໂມຣ໊ອກ​ໂກ​ຖະ​ແຫລ​ງວ່າ: ພົບ​ໂຄ​ເຄນ​ພາຍ​ໃນ​ລົດ​ບັນທຸກ​ທີ່​ຈອດ​ຢູ່​ໃກ້​ກັບ​ເຮືອ​ບໍລິ​ເວນ​ທ່າ​ເຮືອ​ເມືອງ​ເອລ​ເຈ​ດິດາ ພ້ອມ​ຈັບ​ກຸມ​ຊາວ​ໂມຣ໊ອ​ກ​ໂກ 7 ຄົນ​ທີ່​ຄາດ​ວ່າ​ຢູ່​ໃນ​ແກ້ງອາ​ຊະ​ຍາ​ກຳ​ຂ້າມ​ຊາດ​ພົວພັນ​ລັກລອບ​ຂົນ​ໂຄ​ເຄນ​ຈາກ​ຕ່າງປະ​ເທດ​ໃນ​ເຄືອ​ຂ່າຍ​ໂມຣ໊ອກ​ໂກ, ອາ​ເມ​ລິ​ກາ​ລາ​ຕິນ ​ແລະ ​ເອີຣົບ. ​ເຈົ້າໜ້າ​ທີ່​ກ່າວ​ວ່າ: ຈາກ​ການ​ສອບ​ສວນ​ເບື້ອງຕົ້ນພົບ​ວ່າ​ຄົນ​ຮ້າຍ​ຂົນ​ສົ່ງ​ຢາ​ເສບ​ຕິດ​ຈາກ​ອາ​ເມ​ລິ​ກາ​ໃຕ້​ມາ​ທາງ​ເຮືອ​ກ່ອນ​ຂົນ​ຍ້າຍ​ໃສ່​ໄວ້​​ໃນ​ເຮືອ​ປະມົງ​ທີ່​ນຳ​ມາ​ຈອດ​ຢູ່​ທ່າ​ເຮືອ​ໂມຣ໊ອກ​ໂກ. ຂໍ້​ມູນ​ສະຫະ​ປະຊາ​ຊາດ​ລາຍ​ງານ​ວ່າ: ​ແກ້ງ​ລັກລອບ​ຂົນ​ໂຄ​ເຄນ​ພະຍາຍ​າມຫາ​ເສັ້ນທາງ​ໃໝ່ໆ​ໃນ​ການ​ນຳ​ເອົາ​​ໂຄ​ເຄນ​ເຂົ້າ​ເອີຣົບ​ໃນ​ໄລຍະ 10 ກວ່າ​ປີຜ່ານມາ ​ໂດຍ​ມີ​ລາຍ​ງານ​ວ່າ​ໂມ​ຣ໊ອກ​ໂກ​ຢຶດ​​ໂຄ​ເຄນ​ໄດ້​ຫລາຍ​ຂຶ້ນ​ໃນ​ໄລຍະ 2-3 ປີຜ່ານມາ.