ຣອນນີ້ ຄວ້າແຊ້ມສະນຸກເກີ UK Championship ສະໄຫມທີ 7
ການແຂ່ງຂັນສະນຸກເກີລະດັບໂລກ ລາຍການ UK Championship ປະຈຳປີ 2018 ທີ່ເມືອງຢ໊ອກ ປະເທດອັງກິດ ຊີງເງິນລາງວັນລວມ 850.000 ປອນ ໃນວັນທີ 27 ພະຈິກ ຫາວັນທີ 9 ທັນວາ 2018 ຮອບຊີງຊະນະເລີດວັນທີ 9 ທັນວາ ຣອນນີ້ ໂອຊຸນລີແວນ ແຊ້ມເກົ່າ ມື 1 ຂອງລາຍການ ຈາກເຈົ້າພາບອັງກິດ ເອົາຊະນະ ມາກ ອາວເລນ ມື 7 ຂອງລາຍການ ຈາກໄອແລນເໝືອ ອະດີດຮອງແຊ້ມປີ 2011: 10-6 ເຟຣມ.
ຣອນນີ້ ໂອຊຸນລີແວນ ແຊ້ມໂລກ 5 ສະໄຫມ ກາຍເປັນຄົນທີ 3 ສາມາດປ້ອງກັນແຊ້ມລາຍການນີ້ ຕໍ່ຈາກ ສະຕີບ ເດວິດ ຊາວອັງກິດ ແລະ ສະຕີເຟັນ ເຮັນຣີ້ ຊາວສະກັອດແລນ ແລະ ຄົນທຳອິດໄດ້ແຊ້ມລາຍການນີ້ສູງສຸດ 7 ສະໄຫມ ແຊງ ສະຕີບ ເດວິດ ນັກສະນຸກເກີລຸ້ນອ້າຍຊາວອັງກິດ ທີ່ອຳລາວົງການ ໃນປີ 2016.
ຣອນນີ້ ຄວ້າແຊ້ມສະນຸກເກີ ລະດັບສະສົມຄະແນນໂລກ ເປັນລາຍການທີ 34 ຮັບຂັນແຊ້ມ ພ້ອມເງິນລາງວັນ 170.000 ປອນ, ຮອງແຊ້ມຮັບ 75.000 ປອນ. ລະດູການ 2018-19 ຣອນນີ້ ລົງແຂ່ງ 5 ລາຍການ ໄດ້ແຊ້ມ 3 ລາຍການ, ຮອງແຊ້ມ 1 ລາຍການ ແລະ ເຂົ້າຮອບຮອງຊະນະເລີດ 1 ລາຍການ.
ໃນອາທິດນີ້ ຣອນນີ້ ຈະເຂົ້າຮ່ວມລາຍການ Scottish Open 2018 ທີ່ເມືອງກາສໂກລ ປະເທດສະກັອດແລນ ໃນວັນທີ 10-16 ທັນວານີ້ ຊີງເງິນລາງວັນລວມ 366.000 ປອນ ຊຶ່ງ ຣອນນີ້ ເປັນອະດີດແຊ້ມ 2 ສະໄຫມ ປີ 1998 ແລະ 2000 ຮອບທີ 1 ຈະພົບກັບ ແດນ້ຽວ ເວວສ໌ ມືອັນດັບ 66 ຂອງໂລກຈາກເວວ.
