ລັດເລັ່ງສະກັດກັ້ນການດູດແຮ່-ຊາຍຜິດລະບຽບ
ລັດຖະມົນຕີກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ປັດຈຸບັນ ຂະແໜງການຂອງຕົນໄດ້ເປັນເຈົ້າການສົມທົບກັບພາກສ່ວນກ່ຽວຂ້ອງອື່ນໆໃນການຕິດຕາມການເຄື່ອນໄຫວຂອງຜູ້ປະກອບການດູດແຮ່-ຊາຍຕາມສາຍນ້ຳຕ່າງໆ ເພື່ອສະກັດກັ້ນການເຄື່ອນໄຫວທີ່ຜິດລະບຽບ ແລະ ກໍ່ໃຫ້ເກີດການປ່ຽນແປງຂອງແລວນ້ຳ ເຊິ່ງຈະເຮັດໃຫ້ປະເທດເຮົາເສຍດິນແດນໂດຍບໍ່ຮູ້ຕົວ.
ລັດຖະມົນຕີ ໃຫ້ຮູ້ວ່າ: ຜ່ານມາ ລັດຖະບານໄດ້ຊີ້ນຳຢ່າງໃກ້ຊິດກ່ຽວກັບການຂຸດຄົ້ນຫີນ-ແຮ່ຊາຍຕາມແມ່ນ້ຳຂອງ ແລະ ແມ່ນ້ຳສາຂາທີ່ມີຜົນກະທົບຕໍ່ຕາຝັ່ງເຈື່ອນ ແລະ ເສັ້ນຊາຍແດນລະຫວ່າງຊາດ ກ່ອນຈະອະນຸມັດໃຫ້ມີການຂຸດຄົ້ນຕ້ອງໄດ້ຮັບການຕົກລົງເຫັນດີເປັນເອກະພາບຈາກຂະແໜງກ່ຽວຂ້ອງຕ່າງໆ ເປັນຕົ້ນກະຊວງໂຍທາທິການ ແລະ ຂົນສົ່ງ, ອົງການປົກຄອງທ້ອງຖິ່ນກ່ຽວຂ້ອງ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງພະລັງງານ ແລະ ບໍ່ແຮ່, ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ. ຈາກນັ້ນຈຶ່ງສະເໜີລັດຖະບານພິຈາລະນາອະນຸຍາດເປັນແຕ່ລະກໍລະນີ, ພ້ອມທັງໄດ້ມີການກວດຄືນການເຄື່ອນໄຫວຂອງຜູ້ປະກອບການທີ່ໄດ້ຮັບອະນຸຍາດໃນແຕ່ລະປີ ເພື່ອຮັບປະກັນການດຳເນີນກິດຈະການໃຫ້ຖືກຕ້ອງຕາມລະບຽບກົດໝາຍ ແລະ ບໍ່ສົ່ງຜົນກະທົບຕໍ່ສິ່ງແວດລ້ອມ, ລະບົບການໄຫວຂອງແລວນ້ຳຮຸນແຮງ. ໃນຜ່ານມາ ຂະແໜງກ່ຽວຂ້ອງກໍໄດ້ສັ່ງໂຈະດຳເນີນກິດຈະການດູດຫີນ-ຊາຍຢູ່ນ້ຳງື່ມ ເມືອງທຸລະຄົມ ແຂວງວຽງຈັນ ທີ່ສົ່ງຜົນກະທົບຕໍ່ສິ່ງແວດລ້ອມ ດັ່ງນີ້ເປັນຕົ້ນ.
ທ່ານລັດຖະມົນຕີ ໃຫ້ຮູ້ອີກວ່າ: ນັບແຕ່ປີ 2010 ເປັນຕົ້ນມາ, ລັດຖະບານໄດ້ສຸມທຶນຮອນກໍ່ສ້າງຕາຝັ່ງເຈື່ອນຫລາຍໂຄງການຄື: ແຕ່ປີ 2010-2015 ກໍ່ສ້າງສຳເລັດ 23 ໂຄງການ, ມີຄວາມຍາວທັງໝົດ 23,3 ກວ່າກິໂລແມັດ ລວມມີມູນຄ່າຫລາຍກວ່າ 40 ຕື້ກີບ; ແຕ່ປີ 2016-2018 ມີ 20 ໂຄງການ ກໍ່ສ້າງສຳເລັດ 8 ໂຄງການ ລວມມີມູນຄ່າ 182 ຕື້ກວ່າກີບ ແລະ ຜ່ານການເກັບກຳຂໍ້ມູນຂອງຄະນະກຳມະການຊາຍແດນແຫ່ງຊາດ ເມື່ອບໍ່ດົນມານີ້ເຫັນວ່າ ຍັງມີຄວາມຕ້ອງການກໍ່ສ້າງກັນຕາຝັ່ງເຈື່ອນຕື່ມອີກ ໃນຄວາມຍາວທັງໝົດ 129 ກິໂລແມັດ ລວມມີມູນຄ່າ 2.079 ຕື້ກີບ ໃນນີ້ມີ 3 ຈຸດມີຄວາມຍາວທັງໝົດ 15 ກິໂລແມັດ ຕ້ອງໄດ້ຮີບຮ້ອນກໍ່ສ້າງດ່ວນໃນປີ 2019, ສ່ວນທີ່ເຫລືອແມ່ນຈະໄດ້ສະເໜີເຂົ້າແຜນງົບປະມານ 2021-2025.
