ປາກິດສະຖານຈະເລີ່ມເຮັດສຳມະໂນປະຊາກອນເທື່ອທຳອິດໃນຮອບ 19 ປີ
ປາກິດສະຖານຈະເຮັດປຶ້ມສຳມະໂນປະຊາກອນເປັນເທື່ອທຳອິດໃນຮອບເກືອບ 2 ທົດສະວັດ ໂດຍມີກຳນົດຈະເພີ່ມເກັບກຳຂໍ້ມູນໃນໄລຍະທຳອິດວັນທີ 15 ມີນານີ້.
ລາຍງານລະບຸວ່າ: ປາກິດສະຖານມີຈຳນວນປະຊາກອນ 200 ລ້ານຄົນ ເຊິ່ງເປັນປະເທດທີ່ມີປະຊາ ກອນຫລາຍທີ່ສຸດເປັນອັນດັບ 6 ຂອງໂລກ, ແຕ່ບໍ່ມີການເຮັດປຶ້ມສຳມະໂນມາແຕ່ປີ 1998, ເຖິງວ່າລັດຖະທຳມະນູນກຳນົດໄວ້ວ່າຈະຕ້ອງເກັບກຳຂໍ້ມູນຈາກປະຊາກອນໃນປະເທດທຸກໄລຍະ 10 ປີກໍຕາມ. ທັງນີ້ຂະບວນການເຮັດສຳມະໂນເທື່ອໃໝ່ຂອງປາກິດສະຖານທີ່ພວມຈະເລີ່ມຂຶ້ນໃນວັນທີ 15 ມີນານີ້ ຈະມີການສົ່ງໜ່ວຍງານກວ່າ 300.000 ຄົນລົງພື້ນທີ່ ແລະ ໃຊ້ແບບຟອມ 55 ລ້ານຊຸດໃນການເກັບຮວບຮວມຂໍ້ມູນ ໂດຍການແຈ້ງນັບຈະແບ່ງອອກເປັນ 2 ໄລ ຍະ ຄືໄລຍະທໍາອິດນັບແຕ່ວັນທີ 15 ມີນາຫາວັນທີ 15 ເມສາ ແລະ ໄລຍະທີສອງນັບແຕ່ວັນທີ 25 ເມສາຫາວັນທີ 25 ພຶດສະພາ, ຈາກນັ້ນຄາດວ່າຈະສະ ຫລຸບຜົນສຳເລັດໄດ້ພາຍໃນເດືອນກໍລະກົດ.
ຂໍ້ມູນຈາກການເຮັດສຳມະໂນປະຊາກອນຈະຖືກນຳໄປໃຊ້ໃນການປ່ຽນແປງແບ່ງເຂດທາງການເມືອງ, ການຈັດສັນບ່ອນນັ່ງໃນລັດຖະສະພາ ແລະ ການຈັດສັນງົບປະມານ. ອີກທັງ ຂໍ້ມູນດັ່ງກ່າວປຽບເໝືອນການສະທ້ອນຈຳນວນຊົນກຸ່ມນ້ອຍທາງສາສະໜາໃນປະເທດທີ່ປະຊາກອນສ່ວນຫລາຍນັບຖືສາສະໜາອິດສະລາມ ແລະ ເປັນການແຈ້ງນັບຈຳນວນປະຊາກອນຂ້າມເພດເປັນເທື່ອທຳອິດ. ການຈັດເກັບຂໍ້ມູນຈາກປະຊາກອນໃນປະເທດເທື່ອນີ້ມີຄວາມສຳຄັນຫລາຍ ເພາະມີຂຶ້ນກ່ອນຈະມີການເລືອກຕັ້ງພຽງ 1 ປີ.
