ປກສ ນະຄອນຫລວງເຕືອນໃຫ້ມີສະຕິລະວັງຕົວ ພາຍຫລັງມີແກ້ງລັກຊັບອອກອາລະວາດ
ເຈົ້າໜ້າທີ່ ປກສ ນະຄອນຫລວງວຽງຈັນ ໄດ້ອອກມາເຕືອນປະຊາຊົນໃຫ້ເພີ່ມສະຕິລະວັງຕົວ ແລະ ຮັກສາຊັບສິນຂອງຕົນໃຫ້ດີ, ພາຍຫລັງເຫັນວ່າໄລຍະນີ້ໄດ້ມີກຸ່ມແກ້ງວິສາຊີບ ແລະ ຊີງຊັບອອກອາລະວາດກໍ່ເຫດໃນຫລາຍຈຸດໃນຕົວເມືອງ ໂດຍເປົ້າໝາຍຕົ້ນຕໍຂອງພວກມັນແມ່ນເພດຍິງ ແລະ ຜູ້ອາຍຸສູງທີ່ຢູ່ຕາມເສັ້ນທາງປ່ຽວມືດ. ດັ່ງໃນເດືອນພະຈິກຜ່ານມານີ້ ໄດ້ມີຜູ້ເສຍຫາຍເຂົ້າມາແຈ້ງຕໍ່ເຈົ້າໜ້າທີ່ຄື: ຄ້າຍແລງຂອງວັນທີ 14 ພະຈິກ ມີຄົນຮ້າຍດຶງສາຍຄໍໜັກ 1 ບາດຂອງຍິງຄົນໜຶ່ງທີ່ກຳລັງຂັບຂີ່ລົດຈັກຢູ່ເຂດໄຟອຳນາດບ້ານນາຄຳ ເມືອງສີໂຄດຕະບອງ, ແລະ ເຊົ້າຂອງວັນທີ 15 ພະຈິກ ມີຍິງຄົນໜຶ່ງອາຍຸ 75 ປີ ຖືກຄົນຮ້າຍດຶງກະເປົາໃນຂະນະຍ່າງເລາະແຄມທາງໜ້າຕະຫລາດເຂດບ້ານໂພນປ່າເປົ້າ ໃນກະເປົາມີສາຍຄໍຄຳ 1 ເສັ້ນ ໜັກ 2 ບາດ, ເງິນ 2.500 ບາດ (ສະກຸນເງິນໄທ), ແຫວນຄຳ 1 ວົງນ້ຳໜັກ 1 ສະຫລຶງ, ກີ້ແຫວນເພັດ 1 ອັນ ມູນຄ່າ 2,5 ລ້ານກີບ ແລະ ເງິນ 1 ລ້ານກີບ; ຕອນທ່ຽງຂອງວັນທີ 17 ພະຈິກ ໄດ້ມີຄົນຮ້າຍ 2 ຄົນຂີ່ລົດຈັກດຶງເອົາສາຍຄໍຄຳໜັກ 3 ບາດຂອງປະຊາຊົນຢູ່ເຂດບ້ານສາຍລົມ ເມືອງຈັນທະບູລີ ແລະ ຕອນທ່ຽງຂອງວັນທີ 18 ພະຈິກ ໄດ້ມີຄົນຮ້າຍ 2 ຄົນຂີ່ລົດຈັກບໍ່ມີປ້າຍທະບຽນ ດຶງສາຍຄໍຄຳໜັກ 5 ບາດ ຢູ່ເຂດບ້ານສີສະຫວາດ ເມືອງຈັນທະບູລີ, ຕອນແລງຂອງວັນທີ 20 ພະຈິກ ໄດ້ມີຄົນຮ້າຍ 2 ຄົນດຶງກະເປົາຍິງຄົນໜຶ່ງຢູ່ເຂດເສັ້ນທາງຕໍ່ໜ້າສູນການຄ້າວຽງຈັນເຊັນເຕີ ມີເງິນ 8 ລ້ານກີບ, 800 ໂດລາ, ໂທລະສັບມືຖື 2 ໜ່ວຍ ແລະ ເອກະສານຈຳນວນໜຶ່ງ ແລະ ຕອນທ່ຽງຂອງວັນດຽວກັນ ໄດ້ມີຄົນຮ້າຍ 2 ຄົນຂີ່ລົດຈັກດຶງກະເປົາຍິງຄົນໜຶ່ງຂະນະຂີ່ລົດຈັກຢູ່ເສັ້ນທາງຕໍ່ໜ້າຕະຫລາດສະພານທອງ ເມືອງສີສັດຕະນາກ ໃນກະເປົາມີເງິນ 15 ລ້ານກີບ, 10 ພັນບາດ (ສະກຸນເງິນໄທ) ແລະ ເອກະສານຈຳນວນໜຶ່ງ. ຈາກສະພາບທີ່ເກີດຂຶ້ນນີ້ຈຶ່ງຂໍໃຫ້ປະຊາຊົນມີສະຕິລະວັງຕົວສູງໃນການປົກປັກຮັກສາຊັບສິນ ແລະ ເຄື່ອງຂອງມີຄ່າຕ່າງໆຂອງຕົນໃຫ້ດີ ເພື່ອບໍ່ຕົກເປັນເຫຍື່ອຂອງແກ້ງຊິງຊັບດັ່ງກ່າວ.
