ລາວດຳເນີນກອງປະຊຸມໂຕະມົນ ປະຈຳປີ 2018
ຕາມແຫລງຂ່າວ ຂປລ. ໃຫ້ຮູ້ວ່າ: ກອງປະຊຸມໂຕະມົນປະຈຳປີ 2018 ໄດ້ຈັດຂຶ້ນໃນວັນທີ 4 ທັນວານີ້ ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ກິແກ້ວ ຈັນທະບູຣີ ຮອງລັດຖະ ມົນຕີ ກະຊວງແຜນການ ແລະ ການລົງທຶນ, ມີ ທ່ານ ນາງ ຄາຣິນາ ອິມໂມເນັນ ຜູ້ປະສານງານອົງ ການສະຫະປະຊາຊາດ, ທັງເປັນຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ ພ້ອມທັງບັນດາຄູ່ຮ່ວມພັດທະນາ, ອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ອົງການທີ່ບໍ່ຫວັງຜົນກຳໄລ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ກອງປະຊຸມຈັດຂຶ້ນພາຍໃຕ້ຫົວຂໍ້ “ການສະຫລຸບກາງສະໄໝ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII, ຄວາມຄືບໜ້າການຈັດຕັ້ງປະຕິບັດເປົ້າໝາຍພັດທະນາແບບຍືນຍົງ ແລະ ວຽກງານຮ່ວມມືເພື່ອການພັດທະນາທີ່ມີປະສິດທິຜົນ” ເຊິ່ງກອງປະຊຸມໄດ້ຮັບຟັງການລາຍງານ ຜົນຂອງການທົບທວນກາງສະໄໝ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ແລະ ໄດ້ຈັດການປຶກສາຫາລື ໃນຮູບແບບກຸ່ມສົນທະນາ ເຊິ່ງໄດ້ສຸມໃສ່ປຶກສາຫາລື ໃນ 4 ຂົງເຂດຕົ້ນຕໍ ຄື ເປົ້າໝາຍ 1 ຂອງແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ VIII ການເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະ ສົມດຸ່ນດ້ານເສດຖະກິດ; ເປົ້າໝາຍ 2 ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ການພັດທະນາຊັບພະຍາກອນມະນຸດ ແລະ ສັງຄົມ; ເປົ້າໝາຍ 3 ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ດ້ານຊັບພະ ຍາກອນທຳມະຊາດ-ສິ່ງແວດລ້ອມ ແລະ ກຽມພ້ອມຮັບມືກັບໄພທຳມະຊາດ ແລະ ການປ່ຽນແປງດິນຟ້າອາກາດ; ດ້ານວຽກງານຈຸດສຸມປິ່ນອ້ອມ ທີ່ຕິດພັນກັບຫລາຍຂະແໜງການ ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ການປົກຄອງລັດດ້ວຍກົດໝາຍ ແລະ ການປະຕິບັດກົດໝາຍ.
ທ່ານ ນາງ ພອນວັນ ອຸທະວົງ ຫົວໜ້າກົມແຜນການ ກະຊວງແຜນການ ແລະ ການລງທຶນ ໄດ້ລາຍງານຄວາມຄືບໜ້າ ໃນການຈັດຕັ້ງປະຕິບັດເປົ້າໝາຍ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ວ່າ: ເປົ້າໝາຍເສດຖະກິດດ້ານກະສິກໍາ ຄາດໝາຍ ປີ 2016-2020 ໃຫ້ໄດ້ 16,8%, ຄາດຄະເນປີ 2018 ໃຫ້ໄດ້ 15,7%; ດ້ານອຸດສາຫະກຳ ຄາດໝາຍ ປີ 2016-2020 ໃຫ້ໄດ້ 39%, ຄາດຄະເນປີ 2018 ໃຫ້ໄດ້ 31,7%; ດ້ານບໍລິການ ຄາດໝາຍ ປີ 2016-2020 ໃຫ້ໄດ້ 35,4% ຄາດຄະເນປີ 2018 ໃຫ້ໄດ້ 41,7% ແລະ ດ້ານອາກອນ ຄາດໝາຍ ປີ 2016-2020 ໃຫ້ໄດ້ 8,8% ຄາດຄະເນ ປີ 2018 ໃຫ້ໄດ້ 10,9%. ສຳລັບດ້ານປະຊາກອນ ໃນປີ 2018 ຄາດຄະເນໃຫ້ໄດ້ 7,04 ລ້ານຄົນ ແລະ ຈີດີພີ (GDP) ຕໍ່ຫົວຄົນ ຄາດໝາຍ ປີ2016-2020 ໃຫ້ໄດ້ 2.978 ໂດລາສະຫະລັດ, ຄາດຄະເນປີ 2018 ໃຫ້ໄດ້ 2.599 ໂດລາສະຫະລັດ.
