ຫວຽດນາມເປີດສາຍດ່ວນ ຮ້ອງຮຽນຕຳຫລວດສຸຈະລິດ
ຫວຽດນາມເປີດສາຍດ່ວນໃຫ້ປະຊາຊົນຮ້ອງຮຽນຕຳຫລວດມີພຶດຕິກຳສຸຈະລິດ ຕາມມາດຕາການກວາດລ້າງການສຸຈະລິດຮັບສິນບົນທີ່ມີຕຳຫລວດຖືກຈຳຄຸກໄປແລ້ວສິບກວ່າຄົນ.
ສຳນັກຂ່າວຫວຽດນາມອ້າງຖະແຫລງການກະຊວງຄວາມໝັ້ນຄົງສາທາລະນະວ່າ: ການຮ້ອງຮຽນທາງສາຍດ່ວນຈະບໍ່ໄດ້ຮັບການພິຈາລະນາ ຖ້າຜູ້ຮ້ອງບໍ່ແຈ້ງຊື່ນາມສະກຸນ, ທີ່ຢູ່, ເບີໂທລະສັບ ຫລື ໃຫ້ຂໍ້ມູນທີ່ຈັບຕ້ອງບໍ່ໄດ້, ສ່ວນຜູ້ຮ້ອງຮຽນທີ່ດູໝິ່ນເຈົ້າໜ້າທີ່ຂະນະປະຕິບັດໜ້າທີ່ຈະບໍ່ໄດ້ຮັບການພິຈາລະນາເຊັ່ນກັນ. ເຈົ້າໜ້າທີ່ຄົນໜຶ່ງເປີດເຜີຍວ່າ: ແຕ່ກ່ອນສາຍດ່ວນນີ້ໃຊ້ລາຍງານພຶດຕິກຳຂອງຕຳຫລວດຈະລາຈອນເທົ່ານັ້ນ, ແຕ່ປັດຈຸບັນນີ້ ຮັບລາຍງານພຶດຕິກຳຕຳຫລວດທັງໝົດ. ເຖິງຢ່າງໃດກໍດີ, ເຈົ້າໜ້າທີ່ບໍ່ຂໍຕອບວ່າ: ແຕ່ລະວັນໄດ້ຮັບເລື່ອງຮ້ອງຮຽນຕຳຫລວດຈຳນວນເທົ່າໃດ.
ລັດຖະບານຫວຽດນາມເລີ່ມກວາດລ້າງສຸຈະລິດຂະໜາດໃຫຍ່ ໂດຍການສອບສວນເຈົ້າໜ້າທີ່ລັດຈຳນວນຫລາຍທີ່ຖືກກ່າວຫາວ່າປະພຶດບໍ່ຖືກຕ້ອງ, ຂະນະທີ່ຜູ້ບໍລິຫານລັດວິສາຫະກິດຫລາຍຄົນຖືກຈຳຄຸກຂໍ້ຫາປະພຶດບໍ່ຖືກຕ້ອງ ຫລື ຢັກຢອກ. ວັນທີ 30 ພະຈິກແລ້ວນີ້ ສານຫວຽດນາມຕັດສິນຈຳຄຸກສູງສຸດ 10 ປີ ຕຳຫລວດອາວຸໂສ 2 ຄົນ ຂໍ້ຫາເປີດແກ້ງພະນັນອອນລາຍໃຕ້ດິນ.
